ଆମ୍ଭ ନିକଟକୁ ଉଠିଆସ

ମୋଶା ନିୟମ ଉଚ୍ଚସ୍ୱରରେ ପାଠ କରନ୍ତି ଏବଂ ଲୋକମାନେ ଉତ୍ତର ଦିଅନ୍ତି ଯେ ସେମାନେ ତାହା ପାଳନ କରିବେ, ତେଣୁ ସେ ସେମାନଙ୍କ ଉପରେ ନିୟମର ରକ୍ତ ଛିଞ୍ଚନ୍ତି। ପ୍ରାଚୀନମାନେ ପର୍ବତ ଉପରକୁ ଚଢ଼ନ୍ତି, ଯାହାଙ୍କ ପାଦତଳେ ନୀଳକାନ୍ତ ମଣିର ଚଟାଣ ଅଛି ସେହି ଇସ୍ରାଏଲର ପିତାଙ୍କୁ ଦେଖନ୍ତି, ଏବଂ ଭୋଜନପାନ କରନ୍ତି। ମୋଶା ମେଘ ଭିତରକୁ ପ୍ରବେଶ କରନ୍ତି।

ଅଧ୍ୟାୟ 24।

ସେ ମୋଶାଙ୍କୁ କହିଲେ, “ତୁମ୍ଭେ, ହାରୋଣ, ନାଦବ, ଅବୀହୂ ଓ ଇସ୍ରାଏଲର ସତୁରି ଜଣ ପ୍ରାଚୀନ ଆମ୍ଭ ନିକଟକୁ ଉଠିଆସ, ପୁଣି ଦୂରରୁ ପ୍ରଣାମ କରି ଉପାସନା କର। କେବଳ ମୋଶା ଆମ୍ଭ ନିକଟକୁ ଆସିବ; ଅନ୍ୟମାନେ ନିକଟକୁ ଆସିବେ ନାହିଁ, ଆଉ ଲୋକମାନେ ତାହା ସହିତ ଉପରକୁ ଉଠିଆସିବେ ନାହିଁ।”

ଅନନ୍ତର ମୋଶା ଆସି ଆମ୍ଭମାନଙ୍କ ପିତାଙ୍କ ସମସ୍ତ ବାକ୍ୟ ଓ ସମସ୍ତ ବିଧି ଲୋକମାନଙ୍କୁ ଜଣାଇଲେ। ସେଥିରେ ସମସ୍ତ ଲୋକ ଏକ ସ୍ଵରରେ ଉତ୍ତର ଦେଲେ, “ଆମ୍ଭମାନଙ୍କ ପିତା ଯାହା ସବୁ କହିଅଛନ୍ତି, ତାହା ଆମ୍ଭେମାନେ କରିବୁ।”

ପୁଣି ମୋଶା ଆମ୍ଭମାନଙ୍କ ପିତାଙ୍କ ସମସ୍ତ ବାକ୍ୟ ଲେଖିଲେ, ତହୁଁ ପ୍ରଭାତରେ ଶୀଘ୍ର ଉଠି ପର୍ବତ ତଳେ ଗୋଟିଏ ଯଜ୍ଞବେଦି ଓ ଇସ୍ରାଏଲର ବାର ଗୋଷ୍ଠୀ ନିମନ୍ତେ ବାର ସ୍ତମ୍ଭ ନିର୍ମାଣ କଲେ। ଆଉ ସେ ଇସ୍ରାଏଲର ଯୁବକମାନଙ୍କୁ ପଠାଇଲେ, ସେମାନେ ଆମ୍ଭମାନଙ୍କ ପିତାଙ୍କ ଉଦ୍ଦେଶ୍ୟରେ ହୋମବଳି ଉତ୍ସର୍ଗ କଲେ ଓ ମଙ୍ଗଳାର୍ଥକ ବଳିରୂପେ ବୃଷମାନଙ୍କୁ ବଳିଦାନ କଲେ। ତେବେ ମୋଶା ରକ୍ତର ଅର୍ଦ୍ଧେକ ନେଇ ପାତ୍ରମାନରେ ରଖିଲେ; ଆଉ ଅର୍ଦ୍ଧେକ ରକ୍ତ ଯଜ୍ଞବେଦି ଉପରେ ଛିଞ୍ଚିଲେ। ତହୁଁ ସେ ନିୟମ-ପୁସ୍ତକ ନେଇ ଲୋକମାନଙ୍କ ଆଗରେ ଉଚ୍ଚସ୍ଵରରେ ପାଠ କଲେ। ସେଥିରେ ସେମାନେ କହିଲେ, “ଆମ୍ଭମାନଙ୍କ ପିତା ଯାହା ସବୁ କହିଅଛନ୍ତି, ତାହା ଆମ୍ଭେମାନେ କରିବୁ ଓ ମାନିବୁ।”

ପୁଣି ମୋଶା ସେହି ରକ୍ତ ନେଇ ଲୋକମାନଙ୍କ ଉପରେ ସିଞ୍ଚନ କରି କହିଲେ, “ଦେଖ, ଏହି ସମସ୍ତ ବାକ୍ୟ ଅନୁସାରେ ଆମ୍ଭମାନଙ୍କ ପିତା ତୁମ୍ଭମାନଙ୍କ ସହିତ ଯେଉଁ ନିୟମ କରିଅଛନ୍ତି, ଏହା ସେହି ନିୟମର ରକ୍ତ।” ^a

ତତ୍ପରେ ମୋଶା, ହାରୋଣ, ନାଦବ, ଅବୀହୂ ଓ ଇସ୍ରାଏଲର ସତୁରି ଜଣ ପ୍ରାଚୀନ ଉପରକୁ ଉଠିଗଲେ। ଆଉ ସେମାନେ ଇସ୍ରାଏଲର ପିତାଙ୍କୁ ଦର୍ଶନ କଲେ; ତାହାଙ୍କ ଚରଣ ତଳେ ନୀଳମଣିର ବନ୍ଧାନ ପଥ ତୁଲ୍ୟ କିଛି, ଯାହା ଆକାଶ ପରି ନିର୍ମଳ ଥିଲା। ପୁଣି ସେ ଇସ୍ରାଏଲର ନେତାମାନଙ୍କ ଉପରେ ହସ୍ତ ଦେଲେ ନାହିଁ; ସେମାନେ ଆମ୍ଭମାନଙ୍କ ପିତାଙ୍କୁ ଦର୍ଶନ କଲେ, ଆଉ ଭୋଜନପାନ କଲେ।

ଆମ୍ଭମାନଙ୍କ ପିତା ମୋଶାଙ୍କୁ କହିଲେ, “ତୁମ୍ଭେ ଆମ୍ଭ ନିକଟକୁ ପର୍ବତ ଉପରକୁ ଉଠିଆସି ସେଠାରେ ରୁହ; ଆମ୍ଭେ ତୁମ୍ଭକୁ ପ୍ରସ୍ତରଫଳକ, ପୁଣି ସେମାନଙ୍କୁ ଶିକ୍ଷା ଦେବା ନିମନ୍ତେ ଆମ୍ଭର ଲିଖିତ ବ୍ୟବସ୍ଥା ଓ ଆଜ୍ଞା ଦେବା।”

ତେବେ ମୋଶା ଆପଣା ସେବକ ଯିହୋଶୂୟଙ୍କୁ ସଙ୍ଗରେ ନେଇ ଯାତ୍ରା କଲେ, ଆଉ ମୋଶା ଆମ୍ଭମାନଙ୍କ ପିତାଙ୍କ ପର୍ବତ ଉପରକୁ ଉଠିଗଲେ। ପୁଣି ସେ ପ୍ରାଚୀନମାନଙ୍କୁ କହିଲେ, “ଆମ୍ଭେମାନେ ତୁମ୍ଭମାନଙ୍କ ନିକଟକୁ ଫେରିଆସିବା ପର୍ଯ୍ୟନ୍ତ ଏଠାରେ ଆମ୍ଭମାନଙ୍କ ପାଇଁ ଅପେକ୍ଷା କର। ଦେଖ, ହାରୋଣ ଓ ହୂର ତୁମ୍ଭମାନଙ୍କ ସଙ୍ଗରେ ଅଛନ୍ତି; ଯାହାର ବିବାଦ ଥାଏ, ସେ ସେମାନଙ୍କ ନିକଟକୁ ଯାଉ।”

ପୁଣି ମୋଶା ପର୍ବତ ଉପରକୁ ଉଠିଯିବା ବେଳେ ମେଘ ତାହା ଆଚ୍ଛାଦନ କଲା, ଆଉ ଆମ୍ଭମାନଙ୍କ ପିତାଙ୍କ ମହିମା ସୀନୟ ପର୍ବତ ଉପରେ ଅବସ୍ଥିତି କଲା, ଆଉ ମେଘ ଛଅ ଦିନ ପର୍ଯ୍ୟନ୍ତ ତାହା ଆଚ୍ଛାଦନ କଲା, ପୁଣି ସପ୍ତମ ଦିନରେ ସେ ମେଘ ମଧ୍ୟରୁ ମୋଶାଙ୍କୁ ଡାକିଲେ। ଆଉ ଇସ୍ରାଏଲ-ସନ୍ତାନମାନଙ୍କ ଦୃଷ୍ଟିରେ ଆମ୍ଭମାନଙ୍କ ପିତାଙ୍କ ମହିମା ପର୍ବତ-ଶିଖରରେ ଗ୍ରାସକାରୀ ଅଗ୍ନି ପରି ଦେଖାଗଲା। ପୁଣି ମୋଶା ମେଘ ମଧ୍ୟରେ ପ୍ରବେଶ କରି ପର୍ବତ ଉପରକୁ ଉଠିଗଲେ; ଆଉ ମୋଶା ଚାଳିଶ ଦିନ ଓ ଚାଳିଶ ରାତ୍ରି ପର୍ବତ ଉପରେ ରହିଲେ।