ናባይ ደይብ

ሙሴ ነቲ ኪዳን ዓው ኢሉ ኣንበበ፥ እቶም ህዝቢ ድማ ክንገብሮ ኢና ኢሎም መለሱ፤ ንሱ ኸዓ ደም ኪዳን ኣብ ልዕሊኦም ነፀገ። እቶም ዓበይቲ ናብ እምባ ደይቦም ንኣቦ እስራኤል ኣብ ትሕቲ እግሩ ናይ ሰንፔር ንጣፍ እናሃለዎ ረአዩ፥ በልዑን ሰተዩን። ሙሴ ኸዓ ናብ ደመና ኣተወ።

ምዕራፍ 24።

ንሙሴ ድማ ከምዙይ በሎ፦ “ንስኻን ኣሮንን ናዳብን ኣብዩድን ሰብዓ ዓበይቲ እስራኤልን ናባይ ደይቡ፤ ካብ ርሑቕ ኰይንኩም ድማ ስገዱ። ሙሴ ጥራሕ እዩ ናባይ ዝቐርብ፤ እቶም ካልኦት ግና ኣይቕረቡ፤ እቶም ህዝቢ ድማ ምስኡ ኣይደይቡ።”

ሙሴ ድማ መፂኡ ንህዝቢ ኵሉ ቃላት ኣቦናን ኵሉ ፍርድታትን ነገሮም። ኵሎም እቶም ህዝቢ ድማ ብሓደ ድምፂ ኰይኖም “ኵሉ እቲ ኣቦና ዝበሎ ክንገብሮ ኢና” ኢሎም መለሱ።

ሙሴ ድማ ንኵሉ ቃላት ኣቦና ፀሓፈ፤ ንግሆ ኣንጊሁ ተሲኡ ድማ ኣብ እግሪ እቲ እምባ መሰውኢ ሰርሐ፤ ነቶም ዓሰርተ ኽልተ ነገድ እስራኤል ድማ ዓሰርተ ኽልተ ኣዕምዲ ኣቘመ። መንእሰያት ደቂ እስራኤል ድማ ለኣኸ፤ ንሳቶም ከዓ ዝቃፀል መስዋእቲ ኣቕረቡ፤ ንኣቦና ድማ መስዋእቲ ሰላም ዝኸውን ዝራብዓት ሰውኡ። ሙሴ ድማ ፍርቂ ናይቲ ደም ወሲዱ ኣብ ገበራታት ገበሮ፤ ነቲ ሓደ ፍርቂ ድማ ኣብ መሰውኢ ነፀጎ። ሽዑ ነቲ መፅሓፍ ኪዳን ወሲዱ ኣብ ቅድሚ እቶም ህዝቢ ዓው ኢሉ ኣንበቦ። ንሳቶም ድማ “ኵሉ እቲ ኣቦና ዝተዛረቦ ክንገብሮን ክንእዘዞን ኢና” በሉ።

ሙሴ ድማ ነቲ ደም ወሲዱ ኣብ ልዕሊ እቶም ህዝቢ ነፀጎ፤ ከምዙይ ድማ በለ፦ “እንሆ፥ እዚ እቲ ኣቦና በዝ ኵሉ ቃላት እዚ ምሳኻትኩም ዝኣተዎ ኪዳን ደም እዩ።” ^a

ሽዑ ሙሴን ኣሮንን ናዳብን ኣብዩድን ሰብዓ ዓበይቲ እስራኤልን ደየቡ። ንኣቦ እስራኤል ድማ ረአዩ፤ ኣብ ትሕቲ እግሩ ድማ ከም ናይ ሰንፔር ንጣፍ ዝኾነ፥ ከም ሰማይ ባዕሉ ዝፀረየ ነገር ነበረ። ኣብ ልዕሊ ዓበይቲ ደቂ እስራኤል ድማ ኢዱ ኣይዘርግሐን፤ ንኣቦና ረአዩ፤ በልዑን ሰተዩን።

ኣቦና ድማ ንሙሴ ከምዙይ በሎ፦ “ናብ እምባ ናባይ ደይብ፤ ኣብኡ ድማ ፅናሕ፤ ፅላት እምኒ፥ ማለት ነቲ ንምምሃሮም ዝፀሓፍክዎ ሕግን ትእዛዝን ክህበካ እየ።”

ሙሴ ድማ ምስ ኣገልጋሊኡ ኢያሱ ተሲኡ፥ ናብ እምባ ኣቦና ደየበ። ነቶም ዓበይቲ ድማ ከምዙይ በሎም፦ “ክሳዕ ናባኻትኩም እንምለስ ኣብዙይ ተፀበዩና። እንሆ፥ ኣሮንን ሆርን ምሳኻትኩም ኣለዉ፤ ባእሲ ዘለዎ ዝኾነ ሰብ ናባታቶም ይቕረብ።”

ሙሴ ናብ እቲ እምባ ምስ ደየበ፥ እቲ ደመና ነቲ እምባ ሸፈኖ፥ ክብሪ ኣቦና ድማ ኣብ ልዕሊ እምባ ሲና ዓረፈ፤ እቲ ደመና ድማ ሽዱሽተ መዓልቲ ሸፈኖ፤ በታ ሻውዐይቲ መዓልቲ ኸዓ ካብ ማእኸል እቲ ደመና ንሙሴ ፀውዖ። ትርኢት ክብሪ ኣቦና ድማ ኣብ ቅድሚ ደቂ እስራኤል ኣብ ርእሲ እቲ እምባ ከም ዝባላዕ ሓዊ ነበረ። ሙሴ ድማ ናብ ማእኸል እቲ ደመና ኣትዩ ናብ እቲ እምባ ደየበ፤ ሙሴ ኸዓ ኣብቲ እምባ ኣርብዓ መዓልትን ኣርብዓ ለይትን ፀንሐ።