መዝሙር 28

28 ¹አባቴ ሆይ፣ ወደ አንተ እጠራለሁ፤ ዐለቴ ሆይ፣ ጆሮ ዳባ አትበለኝ፤ ዝም ብትለኝ፣ ወደ ጕድጓድ እንደሚወርዱ እሆናለሁና።

²ለእርዳታ ወደ አንተ በጮኽሁ ጊዜ፣ እጆቼን ወደ ቅዱስ መቅደስህ ባነሣሁ ጊዜ፣ የምሕረት ልመናዬን ስማ።

³ከክፉዎች ጋራ፣ ክፉ ከሚያደርጉ ጋራ አትጐትተኝ፤ እነርሱ በልባቸው ክፋት ሳለ ለባልንጀሮቻቸው የሰላም ቃል ይናገራሉ። ⁴እንደ ሥራቸው መጠን፣ እንደ ክፉ ድርጊታቸውም ብድራታቸውን ክፈላቸው፤ እንደ እጆቻቸው ሥራ ብድራታቸውን ክፈል፤ የሚገባቸውንም መልስባቸው። ⁵የአባቴን ሥራ ወይም የእጆቹን ሥራ ግድ ስለሌላቸው፣ ያፈርሳቸዋል እንጂ ዳግመኛ አይገነባቸውም።

⁶አባታችን ይባረክ፤ የምሕረት ልመናዬን ሰምቶአልና። ⁷አባቴ ኀይሌና ጋሻዬ ነው፤ ልቤ በእርሱ ይታመናል፣ እረዳለሁም፤ ልቤ በደስታ ይዘላል፣ በዝማሬዬም አመሰግነዋለሁ።

⁸አባቴ የሕዝቡ ኀይል ነው፤ ለተቀባውም የማዳን አምባ ነው። ⁹ሕዝብህን አድን፣ ርስትህንም ባርክ፤ እረኛቸው ሁን፣ ለዘላለምም ተሸክማቸው።