Alung, Thiap Thiap Ong Mako
David om laa.
David om kachinu ga thiap thiapnu gaye: baom Pa, baom Lung na, baom akhou ong laye dabe, maan ga khun bi tanu mi nun danga ting amme. Innai lounai rwan khou dai bazaangnu chong rinluga bani sung bi kasianu amnu mi nun le diga ei kai thou sat mako diga maan hweini nge. Chongsung bi maan hweini zanu ngaisu rwe, atiga hweininu ga swankanu han channe.
28 1Apa, Nakhou eina kouwe; Alung, akhou kana set danga ong mako, balangbe Nang akhou thiap thiap ong nge dabe, eina khun bi tanu mi nun danga tolune.
2Eina paang lang Nakhou paonu kaan bi, eina akut Nabathiangnu riak khou basaang la phaangnu kaan bi, aom phaangkriang lang hweininu ding ngaisu ngo.
3Sa maknu mi nun le diga, kasianu chwan tonu, bani innai lounai rwan khou dai bazaangnu chong rinnu nun le diga, bani sung bi kasianu amnu kaan bi, ating kai thou sat mako. 4Bani om chwan bing nung suiga bani khou takhum baan thang ngo, bani om kasianu chwan bing nung suiga; bani kut om chwan nung suiga bani khou takhum baan thang ngo; bani khou khopnu ga bani lu chung bi baan thou thang ngo. 5Balangbe banina Apa om chwan bing khatle Bakut om chwan ding banang thang make briakpina, Maanna bani ding rai sat thanglune khatle bani ding khwa seiga bacha thou thang laye.
6Ani Pa ding swanka to ding ngo, balangbe Maanna aom phaangkriang lang hweininu ngaisu rwe. 7Apa ga aom ngam khatle aom kapho gaye; asung na Bating balumsaye, atiga ei paang thang rwe. Asung ga karo takka ong nge, atiga aom laa na Bating swanka thang nge.
8Apa ga Baom mi nun om ngam gaye; Maan ga Bathao kanun thangnu lang kan thangnu ngam amnu gaye. 9Naom mi nun ding kan thang ngo khatle Narakhum ding rithoi pi thang ngo; bani ding zao danga sian ngo khatle khwa seiga bani ding phun thang ngo.