Iwui Lunghār, Kasaikha Mapamihaialu
Davidwuina.
David na kakhangachee chi kasaikha pam: awui Avā, awui lunghārna mangahānkāmilakha, ana chomli khavābing thāhaora. Khanim tui hāngda alungshonga makaphā ngathumkahai mibingmānga makhuithuimi khavai ana poia. Akhalapli awui kapowui khavaokhon shāmihaowa, kala seihā chi ningshikhami sāhaowa.
28 1Nali, O iwui Avā, ina khangakaona; iwui lunghār, iwuili nakhanā makafakhamihailu, kaja nana iwuili kasaikha pamakha, I chomli khavābing thāhaora.
2Nali ngachonmi khavai ina khangakao tharan, nawui kathara shimshong iwui pāng khāngkāi tharan, iwui kapowui khavaokhon shāmilu.
3Makhayābingmānga, makaphā kasā mibingmānga ili makhuithuimihaialu; athumna alungshonga makaphā leilakha khongnainaoli khanim tui hānga. 4Athumwui makaphā otsak athishurda, athumwui kasāsā athishurda athumli sāman milu; athumwui pāngot athishurda athumli sāman milu; athumwui samphangkhangayi chi athumwuitungli tāngasaklu. 5Khikhalajila athumna iwui Avāwui otsakli, kala awui pāngot chili machāpmimana, ana athumli sākhaira, kala katang mavaila masākāmara.
6Ithumwui Avāli soranu, kaja ana iwui kapowui khavaokhon shāmihaira. 7Iwui Avā iwui pangshap kala iwui chāngveina; iwui ningna ali shitkasanga, kala ana ili ngachonmihaira. Iwui ningna mathānda malungtātunga, kala iwui laa eina ali ningshira.
8Iwui Avā awui mibingwui pangshapna; ana awui thao neomi kahaiawui huikhamewui raipanna. 9Nawui mibingli huimilu, kala nawui shimluikatli somilu; athumwui kahoma ngasālu, kala mashimānla athumli phunglu.
