Thanthwe Langa, Musakhale Chete
Salimo la Davide.
Mantha a Davide ndi kukhala chete: ngati Atate wake, Thanthwe lake, sayankha, ndiye kuti iye ali kale pakati pa akufa. Akupempha kuti asakokedwe pamodzi ndi anthu olankhula mawu aubwenzi pamene akubisa zoipa. Pakati pa pemphero amamvedwa, ndipo pemphero limasanduka chiyamiko.
28 1Kwa Inu, Atate wanga, ndikuitana; Thanthwe langa, musagonthe kwa ine, pakuti ngati mukhala chete kwa ine, ndidzakhala ngati iwo amene amatsikira kudzenje.
2Imvani mapempho anga a chifundo pamene ndikulirira kwa Inu kupempha thandizo, pamene ndikweza manja anga kuloza kumalo anu oyera.
3Musandikokere pamodzi ndi anthu oipa, pamodzi ndi amene amachita zoipa, amene amayankhula mau abwino kwa anansi awo pamene zoipa zili m'mitima mwawo. 4Abwezereni molingana ndi ntchito zawo, molingana ndi machitidwe awo oipa; abwezereni molingana ndi ntchito ya manja awo; bweretsani pa iwo zoyenerana nawo. 5Chifukwa iwo sasamala ntchito za Atate wanga kapena ntchito ya manja ake, Iye adzawagwetsa ndipo sadzawamanganso.
6Atate wathu ayamikidwe, pakuti wamva mapempho anga a chifundo. 7Atate wanga ndiye mphamvu yanga ndi chishango changa; mtima wanga umakhulupirira mwa Iye, ndipo ndathandizidwa. Mtima wanga umalumpha ndi chimwemwe, ndipo ndi nyimbo yanga ndimamuyamika.
8Atate wanga ndiye mphamvu ya anthu ake; Iye ndiye linga la chipulumutso cha wodzozedwa wake. 9Pulumutsani anthu anu ndipo dalitsani cholowa chanu; muwaweteni ndipo muwanyamule kwamuyaya.
