Mwala Wanga, Lekani Kunyamala
Ya Dhavidhi.
Cinagopa Dhavidhi ndi kukhala cete: Baba wace, Mwala wace, angakhonda kutawira, iye ali kale pakati pa anyakufa. Iye asaphemba kuti nkhabe kukokedwa pabodzi na amuna analonga mafala a uxamwali mbabisa pyakuipa. Pakati pa phembero iye asabvekeswa, ndipo phembero isacinja kukhala kutenda.
28 1Kuna Imwe, Baba wanga, ndisacemera; Mwala Wanga, lekani kukhonda kundibvera, thangwi mungakhala cete kuna ine, ndinakhala ninga ale anatsika m'dindi.
2Bverani kuphemba kwanga kwa ntsisi pandakuwa kuna Imwe mbandiphemba ciphedzo, pandakweza manja anga kuna mbuto yanu yakucena.
3Lekani kundikwekweta pabodzi na anthu akuipa, pabodzi na ale anacita pyakuipa, ale analonga mafala akudeka kuna andzawo, mbwenye kuipa kuli m'mitima mwawo. 4Abwezereni mwakubverana na macitiro awo, mwakubverana na macitiro awo akuipa; abwezereni mwakubverana na mabasa a manja awo; aperekereni pinafunika iwo kutambira. 5Thangwi iwo nkhabe kusamala mabasa a Baba wanga nee basa ya manja ace, Iye anadzaagwisa pantsi, mbakhonda kuamanga pontho.
6Mbasimbwe Baba wathu, thangwi abva kuphemba kwanga kwa ntsisi. 7Baba wanga ndiye mphambvu zanga na xango yanga; ntima wanga usannyindira Iye, pontho ndisaphedzwa. Ntima wanga usadumphadumpha na kutsandzaya, pontho na nyimbo yanga ndisampereka takhuta.
8Baba wanga ndiye mphambvu za anthu ace; Iye ndiye linga lakupulumusa la nyakudzodzwa wace. 9Pulumusani mbumba yanu, mbamusimba unthaka wanu; akumbizeni, mbamuathukula mpaka muyaya.
