Wee Ihiga Rĩakwa, Ndũkaanakire
Thaburi ya Daudi.
Guoya wa Daudi nĩ gũkirĩrio: Ithe wake, Ihiga rĩake, angĩaga gũcookia, arĩ o na akuũ. Ahooya ndakanagũcũrũrio na andũ arĩa maaragia ciugo cia ũrata makĩhitha ũũru. Gatagatĩ-inĩ nĩaiguo, narĩo ihooya rĩgatuĩka ngaatho.
28 1Wee Ithe wakwa, nĩngũkaya; Wee Ihiga rĩakwa, ndũkanjirige matũ, amu ũngĩikara ũkĩrĩte ũndorete, ngaahaana ta arĩa maikũrũkaga irima.
2Igua gũthaithana gwakwa kwa tha, rĩrĩa ngũkayagĩra ũndeithie, rĩrĩa njambararagia moko makwa ndorete handũ haku haatheru.
3Ndũkanguucũrũrie hamwe na arĩa aaganu, hamwe na arĩa mekaga ũũru, arĩa marĩria andũ a itũũra ciugo njega o rĩrĩa ũũru ũrĩ ngoroinĩ ciao. 4Marĩhe kũringana na ciĩko ciao, kũringana na waganu wao; marĩhe kũringana na wĩra wa moko mao; macookererie o kĩrĩa kĩmagĩrĩire. 5Tondũ matirũmbũyagia ũndũ wĩgiĩ ciĩko cia Ithe wakwa kana wĩra wa moko make, nĩakamamomora na ndakamaaka rĩngĩ o na rĩ.
6Ithe witũ arogoocwo, amu nĩaiguĩte gũthaithana gwakwa kwa tha. 7Ithe wakwa nĩwe hinya wakwa na ngo yakwa; ngoro yakwa nĩĩmwĩhokete, na nĩndeithĩtio. Ngoro yakwa nĩĩrakena mũno, na nĩngũmũcookeria ngaatho na rwĩmbo rwakwa.
8Ithe wakwa nĩwe hinya wa andũ ake; nĩwe kĩĩhitho kĩa ũhonokio kĩa ũrĩa we aitĩrĩirie maguta. 9Honokia andũ aku, na ũrathime igai rĩaku; marĩithie, na ũmakuue nginya tene na tene.