A Ditadi dyama, Kudibataku
Dya Tavidi.
Bweya bwa Tavidi bwenina talala: yuka ni Tata wandi, Ditadi dyandi, kavutulaku, buna yandi wenina keti ha kati dya bafwa. Kisi lomba kangokwaku kumosi yi batu bana bisi zonza ndinga za ngemba kaasi bisi sweka mbi muna mbundu za bawu. Ha kati-kati wisi yukwa, amana lombilu lusi kituka matondu.
28 1Kwena ngeyi, A Tata wama, yisi kutela; A Ditadi dyama, kukalaku hanga kahuwa kwena meni, mukuma yuka ni wadibata kwena meni, yikála hanga batu bana bisi tuluka mu dibulu.
2Yuka bokwadila byama bya kyadi tangwa yisi kalunga kwena ngeyi mu kulomba lusadisu, tangwa yisi thuta moku mama kuna kikumbu kyaku kyatoma.
3Kungokaku kumosi yi batu ba mbi, kumosi yi bana bisi hanga mambu mambi, bana bisi zonza ndinga za ngemba kwena bakwa mukombu wa bawu, kaasi mbi yenina muna mbundu za bawu. 4Bafuta bwosu bwenina mihangu mya bawu, bwosu bwenina mihangu mya bawu mya mbi; bafuta bwosu bwenina kisalu kya moku ma bawu; vutula hana thandu ya bawu mana mabafwanani. 5Mukuma bawu kababanzaku keti kima mu mihangu mya Tata wama, wadi mu kisalu kya moku mandi, yandi kabamwánga amana kabatungaku bawu hika.
6Tata wetu kakála wasakumunu, mukuma wáyuka bokwadila byama bya kyadi. 7Tata wama kenina ngolu zama yi kibalaka kyama; mbundu yama yisi kwikila muna yandi, amana yisadiswa. Mbundu yama yisi sangwala kyesi, amana mu makana mama yisi vutula matondu kwena yandi.
8Tata wama kenina ngolu za batu bandi; yandi kenina kikumbu kya luhulusu kya mutu wandi wuna wásita mananasi. 9Hulula batu baku amana sakumuna kimvwama kyaku; kala kalema wa bawu amana banata bawu mvula yi mvula.
