Laa 27

27 ¹Iwui Avā hi iwui kahor kala iwui huikhamina; khipāli ina ngacheerakhala? Iwui Avā hi iwui mirinwui raipanna; khipāli ina ngacheerakhala?

²Makaphā kasābingna, iwui yangkashebing kala iwui khangararbing, iwui asā tukshai khavai ili rākuinama tharan, athumva phei ngaphokta kongluihaora. ³Raimibingna iwuitungli rāmrah vasāpama, iwui ningli khangacheela maleimara; rai iwuitungli thuingararlala, chithālala ina ning nganungra.

⁴Ot akha ina iwui Avāli poikahaina, hi china ina phana: iwui mirin peida awui shimli ina pamkhavaina, awui khamathā yangkhavai kala awui khorumshimli ali phākhavaina. ⁵Kaja kakhanang tharan ana ili awui ngayin khavaipamli thummira; awui kachonshimwui khaya̱li ana ili thummira; lunghār tungli ana ili reingasakra. ⁶Ara ili rākuinama iwui yangkashebingwui tungli iwui kui maiya khāngkāra, kala awui kachonshimli khamathānkhon eina pha̱kaphayā chigatra; ina laa sāra kala iwui Avāli mayori laa sāra.

⁷O iwui Avā, ina ngakao tharan, iwui khon shāmilu; ili lumashanmilu kala ngahānkāmilu. ⁸Iwui ningna nawui vang hānga, "Awui mai phālu." Nawui mai, O iwui Avā, ina phana. ⁹Namai iwui eina mathummihaialu; malungkhavāt eina nawui raoli mangareithuihaialu; na iwui ngachonkhame sāhaira. O iwui Avā, iwui huikhame, ili mahormihaialu lah horchao kahai masamialu. ¹⁰Ivā kala ishava̱na ili horhailala, iwui Avāna ili khuiungmira. ^a a v10 Miwui leikashi reikhameikap chi vānhaikhala, ithumwui Avāna horhaipai nao chi awui shim khalattali khuiungmira — hi china awui nao saikorawui vang awui ningna.

¹¹O iwui Avā, nawui apong ili tamchitheimilu, kala ili rimkapambingwui vang, ngachamthamhai shongfali ili thānmilu. ¹²Iwui yangkashebingwui kaphaningli ili mahorsangmialu, kaja khayon machitta minama shākhibing iwuitungli thuinganinga.

¹³Hi china ina shitkasanga: kharingabingwui ramli iwui Avāwui kaphā ina theira. ¹⁴Ithumwui Avāli chihānlu; panglu, kala nawui ning pingngasaklu; ithumwui Avāli chihānlu.