Lapkeiyennyu, Irimennyu
Ne po Daudi.
Mi Daudi eng' yaityet ne po iman—lugeet, sigootik che po lembech, agot iywetap kole imuuchi kobagaakta kwandanyi ak kamennyi. Ma le kole ming'in yaityet, ago le kole neegit Kwandanyi kosiiro. Soomei kiy agenge: si komenye eng' tainap Kwandanyi.
27 1Kwandanyu ko lapkeiyennyu ak yetunennyu—ng'oo ne aiywei? Kwandanyu ko irimeetap saboondanyu— ng'oo ne aiywei?
2Ye nyoonei yaigap yaityo si koam panyeekyuk—puunikyuk ak icheeget che wecho—icheek ko che riichin ak che butyo. 3Agot ngo yiema lugeet anee, ma iywei muguleldanyu; agot ngo king'eetyee lugeet anee, agoi nooto ko amang'u anee.
4Kiy agenge ne ki asaa Kwandanyu, ni ne acheeng'ei: si amenye koonnyi peetuusyek tugul kotee asabe, si ageere korooronindennyi ak acheeng'e ineendet eng' Hekaluutinnyi. 5Amu uunywa ineendet eng' shelahnyi ye nyoonei nyalilda; koriip anee eng' kurgeetap emainnyi; koeet anee parak eng' rwandet. 6Ak nguno koeet metinnyu parak kosiir puunikyuk che yiema, ak aeng'ji tiseiywek eng' emainnyi kobooto iryagoogap poiboiyet; atyenjini ak atyenji musik Kwandanyu.
7Igas kutinnyu, Kwandanyu, ye aguurse; irireena ak iwolwoo. 8Mwaei muguleldanyu agobo inyee, “Cheeng' togeennyi.” Togeng'ung', Kwandanyu, ne acheeng'ei. 9Ameung'ena togeng'ung'; amewiir otwogindeng'ung' eng' angeet—inyee ki iegu kotorentennyu. Amebagaaktaa anan imetaa, Kwandanyu, yetunennyu. 10Agot ngot kobagaaktaa kwandanyu ak kamennyu, ko inam Kwandanyu anee. a a v10 Agot ngo kong'eten chamyet ne neegit miising' eng' piik, ko iyume Kwandanyo lakweet ne ki kibagaakta eng' kaanyi ineegei—ni ko muguleldanyi agobo lagoonyi tugul age tugul.
11Ineeta oreng'ung', Kwandanyu, ak ikonwo eng' ooreet ne litit amu icheeget che igeno anee. 12Ameinde anee ole machei puunikyuk, amu ki king'eetya anee paorinik che po lembech, che usei koroomnateet.
13Aiiti iman niito: ageere myeeindap Kwandanyu eng' emetap che sobei. 14Igen Kwandanyo; igimitu, ak ingonyiganit muguleldang'ung'; igen Kwandanyo.