Ti Lawagko, ti Sarikedkedko

Salmo ni David.

Adda pudno a pagpeggadan ni David — armada, ulbod a saksi, uray ti buteng a baybay-an koma isuna dagiti bukodna a nagannak. Ti sungbatna saan a bassit ti peggad, no di ket asideg ngem dayta ti Amana. Maysa laeng ti dawatenna: agtaeng iti sangoanan ti Amana.

Kapitulo 27.

Ni Amak ti lawagko ken ti pannakaisalakanko—siasino ti butngenko? Ni Amak ti sarikedked ti biagko—siasino ti pagbutngak?

No umasideg kaniak dagiti managdakdakes tapno kanenda ti lasagko— dagiti kalabanko ken dagiti kabusorko—isuda ti masagid ken matnag. Uray no agkampo ti buyot a maibusor kaniak, saan a mabuteng ti pusok; uray no bumangon ti gubat a maibusor kaniak, uray kasta natalgedak.

Maymaysa a banag ti indawatko ken ni Amak, daytoy ti sapulek: ti agnaedak iti balayna iti amin nga aldaw ti biagko, tapno mangkitaak iti kinapintasna ken mangsapulak kenkuana iti templona. Ta ilemmengnakto iti pagkamangna inton dumteng ti riribuk; ilemmengnakto iti sirok ti taptapi ti toldana; ipatakdernakto iti ngato ti bato. Ket ita maitag-ayto ti ulok iti ngatuen dagiti kabusorko a mangpalikmut kaniak, ket mangidatagak kadagiti daton iti toldana buyogen ti naragsak a panagpukkaw; agkantaakto ken agpadayawak ken ni Amak babaen ti musika.

Denggem ti timekko, Amak, no umasugak; ngaasiannak ken sungbatannak. Kuna ti pusok maipapan kenka, “Sapulem ti rupana.” Ti rupam, Amak, ti sapulek. Dimo ilemmeng ti rupam kaniak; dimo ipaadayo ti adipenmo gapu iti pungtot—sika ti tulongko. Dinak baybay-an wenno ibelleng, Amak, ti pannakaisalakanko. Uray no baybay-andak ni amak ken ni inak, awatennak ni Amak. ^a

Isuronak ti dalanmo, Amak, ket idalannak iti patag a dalan gapu kadagiti agur-uray a mangdangran kaniak. Dinak iyawat iti pagayatan dagiti kabusorko, ta timmakder dagiti ulbod a saksi a maibusor kaniak, nga agbugbuga iti kinaranggas.

Siguradoak iti daytoy: makitakto ti kinaimbag ni Amak iti daga dagiti sibibiag. Urayem ni Amatayo; agbalinka a napigsa, ket tumured koma ti pusom; urayem ni Amatayo.