መዝሙር 29

29 ¹እናንተ የሰማይ ፍጡራን ሆይ፣ ለአባታችን ስጡ፤ ክብርንና ኀይልን ለአባታችን ስጡ። ^a a v1 “የሰማይ ፍጡራን” የሚለው የመላእክትን ሰራዊት የሚያመለክተውን የዕብራይስጥ ሐረግ ይተረጕማል፤ እነርሱም እዚህ እርሱን እንዲያመልኩ የተጠሩ የአባታችን የሰማይ ሸንጎ አባላት ናቸው። ²ለስሙ የሚገባውን ክብር ለአባታችን ስጡ፤ በቅድስና ግርማ አባታችንን አምልኩ።

³የአባታችን ድምፅ በውሆች ላይ ነው፤ የክብር አባት ያንጐደጕዳል፤ አባታችን በኀያላን ውሆች ላይ ነው። ⁴የአባታችን ድምፅ ኀያል ነው፤ የአባታችን ድምፅ ግርማ የተመላ ነው። ⁵የአባታችን ድምፅ ዝግባዎችን ይሰብራል፤ አባታችን የሊባኖስን ዝግባዎች ያደቃል። ⁶ሊባኖስን እንደ ጥጃ ያስፈነጥዛል፤ ሲርዮንንም እንደ ወጣት የሜዳ በሬ። ⁷የአባታችን ድምፅ የእሳት ነበልባልን ያንበለብላል። ⁸የአባታችን ድምፅ ምድረ በዳውን ያናውጣል፤ አባታችን የቃዴስን ምድረ በዳ ያናውጣል። ⁹የአባታችን ድምፅ ዋላዎችን ያስወልዳል፤ ደኖችንም ገላጣ ያደርጋል፤ በመቅደሱም ሁሉ፣ “ክብር!” ብለው ይጮኻሉ።

¹⁰አባታችን በጥፋት ውሃ ላይ በዙፋኑ ተቀምጧል፤ አባታችን ለዘላለም ንጉሥ ሆኖ በዙፋኑ ተቀምጧል። ¹¹አባታችን ለሕዝቡ ኀይልን ይስጥ! አባታችን ሕዝቡን በሰላም ይባርክ!