ዘኍልቍ 30

30 ¹ሙሴ ለእስራኤል ነገድ አለቆች እንዲህ አለ፤ አባታችን ያዘዘው ይህ ነው። ²ማንም ሰው ለአባታችን ስእለት ቢሳል፣ ወይም ራሱን በግዴታ የሚያስር መሐላ ቢምል፣ ቃሉን አያፍርስ፤ ከአፉ የወጣውን ሁሉ ይፈጽም።

³አንዲት ሴት ገና በወጣትነቷ በአባቷ ቤት ስትኖር ለአባታችን ስእለት ብትሳል፣ ራሷንም በግዴታ ብታስር፣ ⁴አባቷም ስእለቷንና ራሷን ያሰረችበትን ግዴታ ሰምቶ ምንም ባይላት፣ ስእለቷ ሁሉ ራሷንም ያሰረችበት ግዴታ ሁሉ ጸንቶ ይኖራል። ⁵አባቷ ግን በሰማበት ቀን ቢከለክላት፣ ከስእለቷና ራሷን ካሰረችባቸው ገደቦች አንዱም አይጸናም፤ አባቷ ስለከለከላት አባታችን ይቅር ይላታል።

⁶በስእለቷ ሳለች፣ ወይም ሳታስብ በተናገረችው ቃል ሳለች ብታገባ፣ ⁷ባሏም ሰምቶ በሰማበት ቀን ዝም ቢላት፣ ስእለቷ ይጸናል፤ ራሷን ያሰረችባቸውም ገደቦች ይጸናሉ። ⁸ባሏ ግን በሰማበት ቀን ቢከለክላት፣ ያሰራትን ስእለትና ሳታስብ የተናገረችውን ቃል ይሽራል፤ አባታችንም ይቅር ይላታል።

⁹የመበለት ወይም የተፈታች ሴት ስእለት ግን፣ ራሷን ያሰረችበት ሁሉ፣ በእርሷ ላይ ይጸናል።

¹⁰በባሏ ቤት ሳለች ብትሳል፣ ወይም በመሐላ ራሷን በግዴታ ብታስር፣ ¹¹ባሏም ሰምቶ ምንም ባይላት፣ ባይከለክላትም፣ ስእለቷ ሁሉ ይጸናል፤ ራሷን ያሰረችበትም ግዴታ ሁሉ ይጸናል። ¹²ባሏ ግን በሰማበት ቀን ቢሽራቸው፣ ከተናገረችው ሁሉ፣ ከስእለቷም ሆነ ራሷን ካሰረችበት ግዴታ አንዱም አይጸናም፤ ባሏ ሽሯቸዋልና አባታችን ይቅር ይላታል። ¹³ራሷን ለማስጨነቅ የተሳለችውን ስእለት ሁሉ የተማለችውንም የግዴታ መሐላ ሁሉ፣ ባሏ ሊያጸናው ወይም ሊሽረው ይችላል። ¹⁴ባሏ ግን ከቀን እስከ ቀን ዝም ቢላት፣ ስእለቷን ሁሉ ራሷንም ያሰረባትን ግዴታ ሁሉ አጽንቶታል፤ በሰማበት ቀን ዝም ስላላት አጽንቶታል። ¹⁵ከሰማቸው በኋላ ግን ቢሽራቸው፣ የእርሷን በደል እርሱ ይሸከማል።

¹⁶አባታችን በሰውና በሚስቱ መካከል፣ ገና በቤቱ ባለችው በአባትና በወጣት ልጁ መካከል ሙሴን ያዘዘው ሥርዓት ይህ ነው።