Mozese Alonga kuna Atsogoleri
Pikiro pinacitwa kuna Baba wathu pisafunika kukoyiwa — fala ya mamuna isamumanga kwenekwene. Pikiro pya mwana nkazi wa ciwalewale peno pya nkazi wa banja pinakwanisika kufudzwa pa ntsiku inapibva baba wace peno mamuna wace; mbwenye iye angakhala cete, pisakhala, na madawo onsene asakhala ace.
30 1Mozese apanga atsogoleri a madzinza a Izarayeli tenepa: Izi ndi pidatonga Baba wathu. 2Mamuna angapikira pikiro kuna Baba wathu, peno angatsupa toera kumangika ekha na cibvumbulo, nee asafunika kuswa fala yace; iye asafunika kucita pyonsene pidalonga mulomo wace.
3Nkazi angapikira pikiro kuna Baba wathu mbamangika ekha na cibvumbulo mu uphale wace, mbakhala m'nyumba ya babace, 4babace pangabva pikiro yace na cibvumbulo cidamangika iye, mbakhonda kulonga cinthu kuna iye, pikiro zace zonsene na cibvumbulo consene cidamangika iye zinakhala. 5Mbwenye babace angan'khondesa ntsiku idabva iye, nkhabe pikiro zace peno cibvumbulo cidamangika iye cinakhala; Baba wathu anan'lekerera, thangwi babace an'khondesa.
6Angamanga banja mu pikiro zace, peno mu cidumbiro cakucimbiza cidalonga iye, 7mamunace pangabva pyenepi mbakhala dyu kuna iye ntsiku idabva iye, pikiro zace zinakhala, na cibvumbulo cidamangika iye cinakhala. 8Mbwenye mamunace angan'khondesa ntsiku idabva iye, iye asafudza pikiro idamangika iye na cidumbiro cakucimbiza cidalonga iye; na Baba wathu anan'lekerera.
9Mbwenye pikiro ya nzice peno ya nkazi adalambwa—pyonsene pidamangika iye—pinakhala kwa iye.
10Angapikira m'nyumba ya mamunace, peno angamangika ekha na cibvumbulo mukudumbira, 11mamunace mbabva mbakhonda kulonga cinthu kuna iye, mbakhonda kun'khondesa—natenepo pikiro zace zonsene zinakhala, na cibvumbulo consene cidamangika iye cinakhala. 12Mbwenye mamunace angapifudza ntsiku idabva iye, nkhabe cidalonga iye—pikiro zace peno cibvumbulo cidamangika iye—cinakhala: iye apifudza, na Baba wathu anan'lekerera. 13Pikiro iri-yonsene na kudumbira kuri-konsene kwakumangika toera kucepesa ntima wace, mamunace anakwanisa kupilimbisa peno kupifudza. 14Mbwenye mamunace angakhala dyu kuna iye ntsiku na ntsiku, iye asalimbisa pikiro zace zonsene peno mabverano adamangika iye; iye asapilimbisa, thangwi akhala dyu kuna iye ntsiku idabva iye. 15Mbwenye angapifudza pakumala kudzabva, penepo iye anathukula mulando wace.
16Iyi ndi mitemo idatonga Baba wathu kuna Mozese, pakati pa mamuna na nkazace, pakati pa baba na mwanace wankazi wa uphale wakuti acidakhala m'nyumba mwace.
