Moyize Wazonza kwena Bapfumu
Lusilu luna basila kwena Tata wetu lufweti lungiswa—ndinga ya yakala yisi kumukanga mvimba. Lusilu lwa ndumba holo lwa mukhetu lulenda zuluka mu kilumbu kina tata wandi holo yakala dyandi kayukini lwawu; kaasi yuka ni kalembama, lwafweti telama, amana ndola yosu yisi kituka yandi.
30 1Moyize wázimbula kwena bapfumu ba makanda ma Kiseledi: Mama menina mana káheka Tata wetu. 2Tangwa yakala kasila lusilu kwena Tata wetu, kondilo kadya ndefi mu kukanga yandi-meni ni lukanu, kafweti léwulaku ndinga yandi; kafweti hanga mana moosu mazonzini munwa wandi.
3Yuka ni mukhetu kasila lusilu kwena Tata wetu amana kakikanga ni lukanu buna kakidi ndumba, kazínga mu nzu ya tata wandi, 4tangwa tata wandi kayuka lusilu lwandi yi lukanu luna lumukangidi, amana kázimbulaku kima kwena yandi, lusilu lwandi lwosu yi lukanu lwosu luna lumukangidi lwafweti telama. 5Kaasi yuka ni tata wandi kamukandikisa muna tangwa dina kayukini, lusilu lwandi kondilo lukanu luna kakikangidi lwawu lwazílukaku; amana Tata wetu kamúlolula, mukuma tata wandi wámukandikisa.
6Yuka ni kakwela buna kakidi mu sina dya lusilu lwandi, kondilo mu sina dya lukanu luna kasadi konda kuyindula, 7amana yakala dyandi kayuka dyawu amana kadibata kwena yandi muna tangwa dina kayukini, lusilu lwandi lwafweti telama, amana lukanu luna kakikangidi lwawu lwafweti telama. 8Kaasi yuka ni yakala dyandi kamukandikisa muna tangwa dina kayukini, kakatula lusilu luna lumukangidi yi lukanu luna kasadi konda kuyindula; amana Tata wetu kamúlolula.
9Kaasi lusilu lwa mufwidi kondilo lwa mukhetu bayambudi ku longu, mana moosu kakikangidi lwawu, lwafweti telama hana thandu yandi.
10Yuka ni kasila lusilu mu nzu ya yakala dyandi, kondilo kakikanga ni lukanu mu kudya ndefi, 11amana yakala dyandi wáyuka dyawu, kázimbulaku kima kwena yandi, amana kamukandikisaku, buna lusilu lwandi lwosu lwafweti telama, amana lukanu lwosu luna kakikangidi lwawu lwafweti telama. 12Kaasi yuka ni yakala dyandi kabakatula muna tangwa dina kayukini, kima kyosu kazonzidi —lusilu lwandi kondilo lukanu luna lumukangidi— kyazílukaku: wábakatula kedi, amana Tata wetu kamúlolula. 13Lusilu lwosu yi ndefi yosu ya kukanga ya kudikulumuna, yakala dyandi kalenda luzikisa kondilo kulukatula. 14Kaasi yuka ni yakala dyandi kadibata kwena yandi tangwa ni tangwa, kazikisa lusilu lwandi lwosu kondilo lukanu lwosu luna lumukangidi; wabazikisa kedi, mukuma wádibata kwena yandi muna tangwa dina kayukini mawu. 15Kaasi yuka ni kabakatula kunima dya kuyuka mawu, buna kanáta mbi yandi.
16Mina myenina mitsiku mina káheka Tata wetu kwena Moyize, hana kati dya yakala yi mukhetu wandi, hana kati dya tata yi mwana wandi wa mukhetu wa ndumba wuna wukidi mu nzu yandi.
