ዘሑልቍ 30 FHB Father's Heart Bible™

30 ¹ሙሴ ድማ ነሕሉቕ ነገዳት ደቂ እስራኤል ከምዙይ ኢሉ ተዛረቦም፦ እቲ ኣቦና ዝኣዘዞ ነገር እዙይ እዩ። ²ሰብኣይ ንኣቦና መብፅዓ እንተ ተመባፅዐ፥ ወይ ርእሱ ብመእሰሪ ኣሲሩ ማሕላ እንተ መሓለ፥ ቃሉ ኣየፍርስ፤ ከምቲ ኻብ ኣፉ ዝወፀ ዅሉ ይፈፅም።

³ሰበይቲ ድማ ገና ጓል እንተላ ኣብ እንዳ ኣቦኣ እናነበረት ንኣቦና መብፅዓ እንተ ተመባፅዐት፥ ርእሳውን ብመእሰሪ እንተ ኣሰረት፥ ⁴ኣቦኣ ድማ መብፅዓኣን ነቲ ርእሳ ዝኣሰረትሉ መእሰሪን ምስ ሰምዐ፥ ገለ እንተ ዘይበላ፥ ኵሉ መብፅዓኣን ነፍሲ ወከፍ ርእሳ ዝኣሰረትሉ መእሰሪን ይፀንዕ። ⁵ኣቦኣ ግና በታ ዝሰምዖ መዓልቲ እንተ ኸልከላ፥ ካብ መብፅዓኣን ካብቲ ርእሳ ዝኣሰረትሉ መእሰሪን ሓደኳ ኣይፀንዕን፤ ኣቦኣ ስለ ዝኸልከላ ኸዓ ኣቦና ይቕረ ክብለላ እዩ።

⁶ኣብ ትሕቲ መብፅዓኣ፥ ወይ ብዘይ ምስትውዓል ካብ ከናፍራ ዝወፀ ቃል እንተላ፥ እንተ ተመርዐወት፥ ⁷ሰብኣያ ድማ ሰሚዑ፥ በታ ዝሰምዖ መዓልቲ ስቕ እንተ ኢሉ፥ መብፅዓኣ ይፀንዕ፤ እቲ ርእሳ ዝኣሰረትሉ መእሰሪውን ይፀንዕ። ⁸ሰብኣያ ግና በታ ዝሰምዖ መዓልቲ እንተ ኸልከላ፥ ነቲ ርእሳ ዝኣሰረትሉ መብፅዓን ነቲ ብዘይ ምስትውዓል ካብ ከናፍራ ዝወፀ ቃልን ይስርዞ፤ ኣቦናውን ይቕረ ክብለላ እዩ።

⁹ናይ መበለት ወይ ናይ ፍትሕቲ ሰበይቲ መብፅዓ ግና፥ ኵሉ እቲ ርእሳ ዝኣሰረትሉ፥ ኣብ ልዕሊኣ ይፀንዕ።

¹⁰ኣብ እንዳ ሰብኣያ እንተ ተመባፅዐት፥ ወይ ብማሕላ ርእሳ ብመእሰሪ እንተ ኣሰረት፥ ¹¹ሰብኣያ ድማ ሰሚዑ፥ ገለ እንተ ዘይበላ፥ እንተ ዘይከልከላ ኸዓ፥ ኵሉ መብፅዓኣ ይፀንዕ፤ ነፍሲ ወከፍ ርእሳ ዝኣሰረትሉ መእሰሪውን ይፀንዕ። ¹²ሰብኣያ ግና በታ ዝሰምዖ መዓልቲ እንተ ሰረዞ፥ ካብቲ ዝተዛረበቶ፥ ካብ መብፅዓኣን ካብቲ ርእሳ ዝኣሰረትሉ መእሰሪን ሓደኳ ኣይፀንዕን፤ ሰብኣያ ሰሪዙዎ እዩ እሞ፥ ኣቦና ይቕረ ክብለላ እዩ። ¹³ኵሉ መብፅዓን፥ ርእሳ ንምዋራድ ዝኣሰረትሉ ኵሉ ማሕላን፥ ሰብኣያ ከፅንዖ ወይ ክስርዞ ይኽእል። ¹⁴ሰብኣያ ግና ካብ መዓልቲ ናብ መዓልቲ ስቕ እንተ ኢሉ፥ ንዅሉ መብፅዓኣ ወይ ነቲ ርእሳ ዝኣሰረትሉ መእሰሪ የፅንዖ፤ በታ ዝሰምዖ መዓልቲ ስቕ ስለ ዝበላ፥ ኣፅኒዑ እዩ። ¹⁵ድሕሪ ምስምዑ እንተ ሰረዞ ግና፥ ንሱ በደላ ክፅወር እዩ።

¹⁶እዝ ኣቦና ንሙሴ ዝኣዘዞ ሕግጋት እዩ፤ ኣብ መንጎ ሰብኣይን ሰበይቱን፥ ኣብ መንጎ ኣቦን ገና ጓል እንተላ ኣብ ገዛኡ እትነብር ጓሉን።