Miresaka amin’ny Mpitondra i Mosesy

Ny voady atao amin'i Rayntsika dia tsy maintsy tanterahina — ny teny nolazain'ny lehilahy dia mamatotra azy tanteraka. Ny voadin'ny zanakavavy mbola tanora na ny vady dia azo foanana amin'ny andro re'ny rainy na ny vadiny izany; raha mangina izy, dia mijanona izany, ary ny helony dia lasa azy.

Toko 30.

Niteny tamin’ny lohan’ny foko any Israely i Mosesy hoe: Izao no nandidian’i Raintsika. Raha misy lehilahy mivoady amin’i Raintsika, na mianiana mamatotra ny tenany amin’ny fianianana, dia tsy tokony hivadika ny teniny; ny rehetra nolazain’ny vavany no tsy maintsy ataony.

Raha misy vehivavy mivoady amin’i Raintsika ka mamatotra ny tenany amin’ny fianianana, fony izy mbola tanora ary mipetraka ao an-tranon’ny rainy, ary renesan’ny rainy ny voadiny sy ny fianianana namatotra azy, nefa tsy niteny taminy ny rainy, dia mijoro ny voadiny rehetra sy ny fianianana rehetra namatotra azy. Fa raha mandrara azy ny rainy amin’ny andro renesany, dia tsy hijoro ny voadiny na ny fehim-pianianana namatotra ny tenany; i Raintsika no hamela heloka azy, satria nandrara azy ny rainy.

Raha manambady izy, mbola ao ambanin’ny voady, na teny tsy nieritreretana izay nivoakan’ny molony, ary renesan’ny vadiny ka mangina taminy amin’ny andro renesany izany, dia mijoro ny voadiny, ary mijoro ny fehim-pianianana namatotra ny tenany. Fa raha mandrara azy ny vadiny amin’ny andro renesany, dia manafoana ny voady mamatotra azy sy ny teny tsy nieritreretana nataony izy; ary i Raintsika no hamela heloka azy.

Fa ny voadin’ny mpitondratena na ny vehivavy nisaraka amin’ny vadiny, dia izay rehetra namatorany ny tenany, dia mijoro hanohitra azy.

Raha nivoady tao an-tranon’ny vadiny izy, na namatotra ny tenany tamin’ny fianianana, ary renesan’ny vadiny, nefa tsy niteny taminy ary tsy nandrara azy, dia mijoro ny voadiny rehetra, ary mijoro ny fehim-pianianana rehetra namatorany ny tenany. Fa raha ovan’ny vadiny ho tsinontsinona ireny amin’ny andro renesany, dia tsy hijoro izay rehetra nivoakan’ny molony, na ny voadiny na ny fehim-pianianana namatotra azy: nataony tsinontsinona ireny, ary i Raintsika no hamela heloka azy. Ny voady rehetra sy ny fianianana rehetra mamatotra mba hanetry tena, ny vadiny no mahazo manamafy na manafoana azy. Fa raha mangina taminy ny vadiny isan’andro, dia manamafy ny voadiny rehetra na ny fatorany rehetra mamatotra azy izy; manamafy ireny izy, satria nangina taminy tamin’ny andro nandrenesany ireny. Fa raha manafoana ireny izy rehefa renesany, dia izy no hitondra ny helok’ilay vehivavy.

Ireto no fitsipika nandidian’i Raintsika an’i Mosesy, eo amin’ny lehilahy sy ny vadiny, eo amin’ny ray sy ny zanany vavy mbola tanora ao an-tranony.