ዘኍልቍ 29

29 ¹“በሰባተኛው ወር በመጀመሪያው ቀን የተቀደሰ ጉባኤ አድርጉ፤ የተለመደውን ሥራ ምንም አትሥሩ፤ መለከት የምትነፉበት ቀን ነውና። ²ለአባታችን መልካም መዐዛ የሚሆን የሚቃጠል መሥዋዕት አቅርቡ፤ አንድ ወይፈን፣ አንድ አውራ በግ፣ የአንድ ዓመት ሰባት ተባዕት ጠቦቶች፣ ሁሉም ነውር የሌለባቸው ይሁኑ። ³በዘይት የተለወሰ መልካም ዱቄት የእህል ቍርባናቸው ይሁን፤ ለወይፈኑ ስድስት ሊትር ያህል፣ ለአውራ በጉ አራት ሊትር ያህል፣ ⁴ለሰባቱ ጠቦቶች ለእያንዳንዳቸው ሁለት ሊትር ያህል፤ ⁵ስለ እናንተም ማስተስረያ ለማድረግ አንድ አውራ ፍየል የኀጢአት መሥዋዕት አድርጋችሁ አቅርቡ። ⁶ይህም ከመባቻው የሚቃጠል መሥዋዕትና ከእህል ቍርባኑ፣ ከዘወትሩ የሚቃጠል መሥዋዕትና ከእህል ቍርባኑ፣ እንደ ሥርዐታቸውም ከመጠጥ ቍርባናቸው በተጨማሪ ነው፤ ይህም ለአባታችን የሚያረካ መዐዛ፣ በእሳት የሚቀርብ መሥዋዕት ነው።

የማስተስረያ ቀን

⁷“በዚህ በሰባተኛው ወር በዐሥረኛው ቀን የተቀደሰ ስብሰባ አድርጉ፤ ራሳችሁንም አስጨንቁ፤ ምንም ሥራ አትሥሩ። ⁸ለአባታችን መልካም መዐዛ የሚሆን የሚቃጠል መሥዋዕት አቅርቡ፤ አንድ ወይፈን፣ አንድ አውራ በግ፣ የአንድ ዓመት ሰባት ተባዕት ጠቦቶች፣ ሁሉም ነውር የሌለባቸው ይሁኑ። ⁹በዘይት የተለወሰ መልካም ዱቄት የእህል ቍርባናቸው ይሁን፤ ለወይፈኑ ስድስት ሊትር ያህል፣ ለአንዱ አውራ በግ አራት ሊትር ያህል፣ ¹⁰ለሰባቱ ጠቦቶች ለእያንዳንዳቸው ሁለት ሊትር ያህል፤ ¹¹ደግሞም አንድ አውራ ፍየል የኀጢአት መሥዋዕት አድርጋችሁ አቅርቡ፤ ይህም ከማስተስረያው የኀጢአት መሥዋዕት፣ ከዘወትሩ የሚቃጠል መሥዋዕትና ከእህል ቍርባኑ፣ ከመጠጥ ቍርባናቸውም በተጨማሪ ነው።

የዳስ በዓል

¹²“በሰባተኛው ወር በዐሥራ አምስተኛው ቀን የተቀደሰ ጉባኤ አድርጉ፤ የተለመደውን ሥራ ምንም አትሥሩ፤ ለአባታችንም ሰባት ቀን በዓልን አክብሩ። ¹³ለአባታችን መልካም መዐዛ የሚሆን በእሳት የሚቀርብ መሥዋዕት፣ የሚቃጠል መሥዋዕት አቅርቡ፤ ዐሥራ ሦስት ወይፈኖች፣ ሁለት አውራ በጎች፣ የአንድ ዓመት ዐሥራ አራት ተባዕት ጠቦቶች፣ ሁሉም ነውር የሌለባቸው ይሁኑ። ¹⁴በዘይት የተለወሰ መልካም ዱቄት የእህል ቍርባናቸው ይሁን፤ ለዐሥራ ሦስቱ ወይፈኖች ለእያንዳንዳቸው ስድስት ሊትር ያህል፣ ለሁለቱ አውራ በጎች ለእያንዳንዳቸው አራት ሊትር ያህል፣ ¹⁵ለዐሥራ አራቱ ጠቦቶች ለእያንዳንዳቸው ሁለት ሊትር ያህል፤ ¹⁶አንድ አውራ ፍየልም የኀጢአት መሥዋዕት አድርጋችሁ አቅርቡ፤ ይህም ከዘወትሩ የሚቃጠል መሥዋዕት፣ ከእህል ቍርባኑና ከመጠጥ ቍርባኑ በተጨማሪ ነው።

¹⁷“በሁለተኛው ቀን ዐሥራ ሁለት ወይፈኖች፣ ሁለት አውራ በጎች፣ የአንድ ዓመት ዐሥራ አራት ተባዕት ጠቦቶች፣ ሁሉም ነውር የሌለባቸው ይቅረቡ፤ ¹⁸ለወይፈኖቹ፣ ለአውራ በጎቹና ለጠቦቶቹ እንደ ቍጥራቸው፣ እንደ ተወሰነውም የእህልና የመጠጥ ቍርባናቸውን አቅርቡ፤ ¹⁹ደግሞም አንድ አውራ ፍየል የኀጢአት መሥዋዕት አድርጋችሁ አቅርቡ፤ ይህም ከዘወትሩ የሚቃጠል መሥዋዕት፣ ከእህል ቍርባኑና ከመጠጥ ቍርባናቸው በተጨማሪ ነው።

²⁰“በሦስተኛው ቀን ዐሥራ አንድ ወይፈኖች፣ ሁለት አውራ በጎች፣ የአንድ ዓመት ዐሥራ አራት ተባዕት ጠቦቶች፣ ሁሉም ነውር የሌለባቸው ይቅረቡ፤ ²¹ለወይፈኖቹ፣ ለአውራ በጎቹና ለጠቦቶቹ እንደ ቍጥራቸው፣ እንደ ተወሰነውም የእህልና የመጠጥ ቍርባናቸውን አቅርቡ። ²²ከዘወትሩ የሚቃጠል መሥዋዕት ከእህልና ከመጠጥ ቍርባኑ ጋር በተጨማሪ አንድ አውራ ፍየል የኀጢአት መሥዋዕት አድርጋችሁ አቅርቡ።

²³“በአራተኛው ቀን ዐሥር ወይፈኖች፣ ሁለት አውራ በጎች፣ የአንድ ዓመት ዐሥራ አራት ተባዕት ጠቦቶች፣ ሁሉም ነውር የሌለባቸው ይቅረቡ፤ ²⁴ለወይፈኖቹ፣ ለአውራ በጎቹና ለጠቦቶቹ እንደ ቍጥራቸው፣ እንደ ተወሰነውም የእህልና የመጠጥ ቍርባናቸውን አቅርቡ፤ ²⁵ከዘወትሩ የሚቃጠል መሥዋዕት ከእህልና ከመጠጥ ቍርባኑ ጋር በተጨማሪ አንድ አውራ ፍየል የኀጢአት መሥዋዕት አድርጋችሁ አቅርቡ።

²⁶“በአምስተኛው ቀን ዘጠኝ ወይፈኖች፣ ሁለት አውራ በጎች፣ የአንድ ዓመት ዐሥራ አራት ተባዕት ጠቦቶች፣ ሁሉም ነውር የሌለባቸው ይቅረቡ፤ ²⁷ለወይፈኖቹ፣ ለአውራ በጎቹና ለጠቦቶቹ እንደ ቍጥራቸው፣ እንደ ተወሰነውም የእህልና የመጠጥ ቍርባናቸውን አቅርቡ። ²⁸ደግሞም አንድ አውራ ፍየል የኀጢአት መሥዋዕት አድርጋችሁ አቅርቡ፤ ይህም ከዘወትሩ የሚቃጠል መሥዋዕት፣ ከእህል ቍርባኑና ከመጠጥ ቍርባኑ በተጨማሪ ነው።

²⁹“በስድስተኛው ቀን ስምንት ወይፈኖች፣ ሁለት አውራ በጎች፣ የአንድ ዓመት ዐሥራ አራት ተባዕት ጠቦቶች፣ ሁሉም ነውር የሌለባቸው ይቅረቡ፤ ³⁰ለወይፈኖቹ፣ ለአውራ በጎቹና ለጠቦቶቹ እንደ ቍጥራቸው፣ እንደ ተወሰነውም የእህልና የመጠጥ ቍርባናቸውን አቅርቡ፤ ³¹አንድ አውራ ፍየልም የኀጢአት መሥዋዕት አድርጋችሁ አቅርቡ፤ ይህም ከዘወትሩ የሚቃጠል መሥዋዕት፣ ከእህል ቍርባኑና ከመጠጥ ቍርባናቸው በተጨማሪ ነው።

³²“በሰባተኛው ቀን ሰባት ወይፈኖች፣ ሁለት አውራ በጎች፣ የአንድ ዓመት ዐሥራ አራት ተባዕት ጠቦቶች፣ ሁሉም ነውር የሌለባቸው ይቅረቡ፤ ³³ለወይፈኖቹ፣ ለአውራ በጎቹና ለጠቦቶቹ እንደ ቍጥራቸው፣ እንደ ተደነገገውም የእህልና የመጠጥ ቍርባናቸውን አቅርቡ፤ ³⁴አንድ አውራ ፍየልም የኀጢአት መሥዋዕት አድርጋችሁ አቅርቡ፤ ይህም ከዘወትሩ የሚቃጠል መሥዋዕት፣ ከእህል ቍርባኑና ከመጠጥ ቍርባኑ በተጨማሪ ነው።

³⁵“በስምንተኛው ቀን የመደምደሚያ ጉባኤ አድርጉ፤ አንዳች የድካም ሥራ አትሥሩ። ³⁶ለአባታችን መልካም መዐዛ የሚሆን በእሳት የሚቀርብ መሥዋዕት፣ የሚቃጠል መሥዋዕት አቅርቡ፤ አንድ ወይፈን፣ አንድ አውራ በግ፣ የአንድ ዓመት ሰባት ተባዕት ጠቦቶች፣ ሁሉም ነውር የሌለባቸው ይቅረቡ፤ ³⁷ለወይፈኑ፣ ለአውራ በጉና ለጠቦቶቹ እንደ ቍጥራቸው፣ እንደ ተደነገገውም የእህልና የመጠጥ ቍርባናቸውን አቅርቡ። ³⁸ከዘወትሩ የሚቃጠል መሥዋዕት፣ ከእህል ቍርባኑና ከመጠጥ ቍርባኑ በተጨማሪ አንድ አውራ ፍየል የኀጢአት መሥዋዕት አድርጋችሁ አቅርቡ።

³⁹“ይህን በተወሰኑ በዓላታችሁ ለአባታችን አቅርቡ፤ ይህም ከስእለታችሁና በፈቃዳችሁ ከምታቀርቡት ቍርባን በተጨማሪ ነው፤ የሚቃጠል መሥዋዕት ቢሆን፣ የእህል ቍርባን ቢሆን፣ የመጠጥ ቍርባን ቢሆን ወይም የኅብረት መሥዋዕት ቢሆን ይሁን።”