Umunsi mukuru wo Kuvuza Impanda

Ukwezi kwa karindwi kuruzuye: kuvuza impanda, kwisonzesha ku Munsi w'impongano, hanyuma Iminsi mikuru y'ingando, aho ibimasa bigabanuka kuva ku cumi na bitatu bikagera ku birindwi mu minsi irindwi mbere y'ikoraniro risoza. Buri munsi mukuru ufite igitambo cyawo nyacyo, buri gihe hamwe n'icya buri munsi.

Igice cya 29.

“Mu kwezi kwa karindwi, ku munsi wa mbere, muzakore ikoraniro ryo kunsenga. Ntimukagire imirimo mukora, ni umunsi muzavuzaho impanda. Muzature igitambo gikongorwa n'umuriro, impumuro yacyo ishimishe Data wa twese: ikimasa kimwe n'impfizi y'intama imwe, n'abana b'intama barindwi batarengeje umwaka, byose bidafite inenge. Amaturo yabyo y'ibinyampeke azabe ifu nziza ivanze n'amavuta, muturane na litiro esheshatu ku kimasa, na litiro enye ku mpfizi y'intama, naho buri mwana w'intama muri ba barindwi uwuturane na litiro ebyiri; n'isekurume y'ihene imwe y'igitambo cyo guhongerera ibyaha, kugira ngo mubabarirwe. Ibyo mujye mubyongera ku gitambo gikongorwa n'umuriro cy'imboneko y'ukwezi n'amaturo yacyo y'ibinyampeke, no ku gitambo gisanzwe cya buri munsi n'amaturo yacyo y'ibinyampeke, n'amaturo yabyo asukwa, nk'uko bitegetswe: impumuro yabyo ishimisha, ni amaturo atwikwa n'umuriro mwegurira Data wa twese.

Umunsi wo Guhongererwa Ibyaha

“Ku munsi wa cumi w'uku kwezi kwa karindwi, muzakore ikoraniro ryo kunsenga, mwisonzeshe; ntimukagire imirimo na mike mukora. Muzature Data wa twese igitambo gikongorwa n'umuriro cy'impumuro imushimisha: ikimasa kimwe n'impfizi y'intama imwe, n'abana b'intama barindwi batarengeje umwaka, byose bidafite inenge. Amaturo yabyo y'ibinyampeke azabe ifu nziza ivanze n'amavuta, muturane na litiro esheshatu ku kimasa, na litiro enye ku mpfizi y'intama imwe, naho buri mwana w'intama muri ba barindwi uwuturane na litiro ebyiri; n'isekurume y'ihene imwe y'igitambo cyo guhongerera ibyaha, mubyongera ku gitambo cyo guhongerera ibyaha, no ku gitambo gisanzwe gikongorwa n'umuriro n'amaturo yacyo y'ibinyampeke, n'amaturo yabyo asukwa.

Umunsi mukuru w'Ingando

“Ku itariki ya cumi n'eshanu y'ukwezi kwa karindwi, muzakore ikoraniro ryo kunsenga. Ntimukagire imirimo mukora, mwizihize umunsi mukuru wa Data wa twese mumare iminsi irindwi. Muzature igitambo gikongorwa n'umuriro, ituro rikongorwa n'umuriro, impumuro yaryo ishimishe Data wa twese: ibimasa cumi na bitatu n'impfizi z'intama ebyiri, n'abana b'intama cumi na bane batarengeje umwaka, byose bidafite inenge. Amaturo yabyo y'ibinyampeke azabe ifu nziza ivanze n'amavuta, muturane na litiro esheshatu kuri buri kimasa muri ibyo cumi na bitatu, na litiro enye kuri buri mpfizi y'intama muri izo ebyiri, naho buri mwana w'intama muri ba cumi na bane uwuturane na litiro ebyiri; n'isekurume y'ihene imwe y'igitambo cyo guhongerera ibyaha, mubyongera ku gitambo gisanzwe gikongorwa n'umuriro cya buri munsi n'amaturo yacyo y'ibinyampeke n'ituro ryacyo risukwa.

“Ku munsi wa kabiri: ibimasa cumi na bibiri n'impfizi z'intama ebyiri, n'abana b'intama cumi na bane batarengeje umwaka, byose bidafite inenge, mubiturane n'amaturo yabyo y'ibinyampeke n'ay'ibisukwa ku bimasa no ku mpfizi z'intama no ku bana b'intama, ukurikije umubare wabyo nk'uko bitegetswe; n'isekurume y'ihene imwe y'igitambo cyo guhongerera ibyaha, mubyongera ku gitambo gisanzwe gikongorwa n'umuriro n'amaturo yacyo y'ibinyampeke, n'amaturo yabyo asukwa.

“Ku munsi wa gatatu: ibimasa cumi na kimwe n'impfizi z'intama ebyiri, n'abana b'intama cumi na bane batarengeje umwaka, byose bidafite inenge, mubiturane n'amaturo yabyo y'ibinyampeke n'ay'ibisukwa ku bimasa no ku mpfizi z'intama no ku bana b'intama, ukurikije umubare wabyo nk'uko bitegetswe. N'isekurume y'ihene imwe y'igitambo cyo guhongerera ibyaha, mubyongera ku gitambo gisanzwe gikongorwa n'umuriro n'amaturo yacyo y'ibinyampeke n'ay'ibisukwa.

“Ku munsi wa kane: ibimasa icumi n'impfizi z'intama ebyiri, n'abana b'intama cumi na bane batarengeje umwaka, byose bidafite inenge, mubiturane n'amaturo y'ibinyampeke n'ay'ibisukwa ku bimasa no ku mpfizi z'intama no ku bana b'intama, ukurikije umubare wabyo nk'uko bitegetswe; n'isekurume y'ihene imwe y'igitambo cyo guhongerera ibyaha, mubyongera ku gitambo gisanzwe gikongorwa n'umuriro cya buri munsi n'amaturo yacyo y'ibinyampeke n'ay'ibisukwa.

“Ku munsi wa gatanu: ibimasa icyenda n'impfizi z'intama ebyiri, n'abana b'intama cumi na bane batarengeje umwaka, byose bidafite inenge, mubiturane n'amaturo y'ibinyampeke n'ay'ibisukwa ku bimasa no ku mpfizi z'intama no ku bana b'intama, ukurikije umubare wabyo nk'uko bitegetswe. N'isekurume y'ihene imwe y'igitambo cyo guhongerera ibyaha, mubyongera ku gitambo gisanzwe gikongorwa n'umuriro n'amaturo yacyo y'ibinyampeke n'ituro ryacyo risukwa.

“Ku munsi wa gatandatu: ibimasa umunani n'impfizi z'intama ebyiri, n'abana b'intama cumi na bane batarengeje umwaka, byose bidafite inenge, mubiturane n'amaturo yabyo y'ibinyampeke n'ay'ibisukwa ku bimasa no ku mpfizi z'intama no ku bana b'intama, ukurikije umubare wabyo nk'uko bitegetswe; n'isekurume y'ihene imwe y'igitambo cyo guhongerera ibyaha, mubyongera ku gitambo gisanzwe gikongorwa n'umuriro n'amaturo yacyo y'ibinyampeke n'amaturo yacyo asukwa.

“Ku munsi wa karindwi: ibimasa birindwi n'impfizi z'intama ebyiri, n'abana b'intama cumi na bane batarengeje umwaka, byose bidafite inenge, mubiturane n'amaturo yabyo y'ibinyampeke n'ay'ibisukwa ku bimasa no ku mpfizi z'intama no ku bana b'intama, ukurikije umubare wabyo nk'uko byategetswe; n'isekurume y'ihene imwe y'igitambo cyo guhongerera ibyaha, mubyongera ku gitambo gisanzwe gikongorwa n'umuriro cya buri munsi n'amaturo yacyo y'ibinyampeke n'ituro ryacyo risukwa.

“Ku munsi wa munani, muzakore ikoraniro rizarangiza iyo minsi mikuru; ntimukagire imirimo iruhije mukora. Muzature igitambo gikongorwa n'umuriro, ituro rikongorwa n'umuriro, impumuro yaryo ishimishe Data wa twese: ikimasa kimwe n'impfizi y'intama imwe, n'abana b'intama barindwi batarengeje umwaka, byose bidafite inenge, mubiturane n'amaturo yabyo y'ibinyampeke n'ay'ibisukwa ku kimasa no ku mpfizi y'intama no ku bana b'intama, ukurikije umubare wabyo nk'uko byategetswe. N'isekurume y'ihene imwe y'igitambo cyo guhongerera ibyaha, mubyongera ku gitambo gisanzwe gikongorwa n'umuriro n'amaturo yacyo y'ibinyampeke n'ituro ryacyo risukwa.

“Ibyo mujye mwegurira Data wa twese ku minsi mikuru yanyu yagenwe, mubyongera ku maturo yanyu yo guhigura imihigo n'ay'ubushake, yaba amaturo atwikwa n'umuriro cyangwa ay'ibinyampeke cyangwa ay'ibisukwa cyangwa ay'umusangiro.”

Musa abwira Abisiraheli ibyo byose, nk'uko Data wa twese yabitegetse Musa.