Tata Wetu Wasobula Batu Bandi ku Ngiligali
Ku thwala ya mvita yosu, kuvundu. Kanda dyahika dyayotisa amana dyasiwa mu homa hanga dyabeluka, Pasaka yalundwa, amana maana mazima muna kilumbu bádya madya ma tsi meni. Buna yakala mosi wenina yi mbeli mu koku wuzimbudi kwena Yosuwe ni yandi kenina pfumu wa basuta ba Tata wetu.
Tata wetu kisi zonza mu mavese 2, 9
5 1Buna bakyamvu boosu ba Amoli bana benina ku mazyokidi ma Yolutani yi bakyamvu boosu ba bisi Kanana bana benina kuna yanga dya mbuta, báyuka ni Tata wetu wákangisa mamba ma Yolutani ku thwala ya Kiseledi tii yi kuna básabuka, mbundu za bawu zádikuka amana kitembu kyásalaku mwena bawu kikuma kya Kiseledi.
2Muna tangwa dina, Tata wetu wázimbula kwena Yosuwe: «Disadila mbedi za matadi amana yotisa bisi Kiseledi mu mbala yikwawu, mbala ya zodi.»
3Buna Yosuwe wásala mbedi za matadi amana wáyotisa bana ba Kiseledi kuna Ngibeyati-Haalaloti, Mongu wa Mikanda. 4Kikuma kya bwabuna Yosuwe kábayotisila: batu boosu bana bálubuka mu Ngiphiti, bayakala, basuta boosu ba mvita, báfwa muna nganga, muna nzila, kunima dya kulubuka mu Ngiphiti. 5Batu boosu bana bálubuka bákala bayotisa, kaasi bana bábutukila muna nganga, muna nzila ya kulubuka mu Ngiphiti, bakalaku bayotisa. 6Bisi Kiseledi bádyata mvula makumaya muna nganga tii yi kuna kanda dyosu, basuta ba mvita bana bálubuka mu Ngiphiti, bámana fwa, mukuma bálemvukaku ndinga ya Tata wetu. Kwena bawu, Tata wetu wázenga ndefi ni bámonaku tsi yina kázenga ndefi kwena bakhaka ba bawu mu kutuheka, tsi yina midiki yi bwiki bisi kumba. 7Wátelamisa bana ba bawu mu kifulu kya bawu, amana Yosuwe wábayotisa, mukuma bákala bangulungu, bakalaku bayotisa muna nzila. 8Buna kuyotisa kwa kanda dyosu kwálungila, bánanga muna mbanza tii yi kuna bákola.
9Buna Tata wetu wázimbula kwena Yosuwe: «Lelu yibundumuni tsoni ya Ngiphiti kwena benu.» Kikuma kya bwabuna kifulu kina bisi tela ni Ngiligali tii yi lelu dyadi.
10Bisi Kiseledi bana bákala muna Ngiligali bálunda mukinzi wa Phaki mu kilumbu kya kumi yi ya kya ngonda, ha masikidika, muna mazala ma Yediko. 11Kilumbu kyálanda Phaki, muna kilumbu kina kyeku, bádya madya ma tsi: mapha makonda muvimbu yi bule bwayokila. 12Maana mázenga muna kilumbu kina kyálanda kuna bádya madya ma tsi. Bisi Kiseledi bakalaku hika yi maana; muna mvula yina bádya bibundu bya tsi ya Kanana.
Tudibeni wa Basuta ba Tata Wetu
13Bwosu Yosuwe kakala bela-bela yi Yediko, wávumbula mesu amana wámona mutu mosi watelama ku thwala yandi, wasimbidila mbedi ya phoku mu koku yandi. Yosuwe wábwesuka kwena yandi amana wumuhyudi: «Ngeyi wenina wa betu, holo wa bambeni betu?»
14«Nkatu», wuvutudi. «Buthwena yisidi nana tudibeni wa basuta ba Tata wetu.» Yosuwe wudilosi ha tsi, mbunzu mu mafu, amana wámufukamina, wuzimbudi: «Khi kazimbula pfumu wama kwena musadi wandi?»
15Tudibeni wa basuta ba Tata wetu wázimbula kwena Yosuwe: «Womuna tsabatu zaku, mukuma homa haka wutelamiki hena hatoma.» Amana Yosuwe wásala bwabuna.
