Gilgala Bouei Haoeibü Mütshuong Haanbou Kümbei
Wapyo lamle shaanga, meimeibei. Meten nyibou shuong kipan apan, langngaila shaishanga jouletkei, Ijep ka longbü damenbü chalou kümbei, hoba haoen kaonyekeibü wentek shaubü chaloua tho ka longbü wentek thonkei. Kheijinei in satan lengbü müt cheei Joshua to, ngo seneibü Boueibü sepai tan thükkabou ki dogo laukei.
5 1Jordan chanep aepheinei kibü Amorbü Choba pendou hoba yungnyu peiko kibü Kananbü Choba pendouei, Bouei Israel thedang ka haoen danan shongko Jordan dei hau yaangbü dogo ngekei dogo ditjinei, Israel shangabü haoeneibü maangpon tühnyinkei hoba haoen aoto ong maang kaangbü soushou ajoukei.
2Kho chaloua Bouei Joshua to laukei, “Nyi laang akbü in kümashi, hoba Israelbü nyibou kipan apashi.”
3Hibü Joshuaei laang akbü in kümbei, hoba Gibeat-Haaralot, kho phekhop shongh ka Israelbü shousi shuong kipan apbukei. 4Joshuaei haoen kipan apbü shangabü kho ho ki: Ijep ka longbü mütshuong pendou, kho bousu shuong, lakjaibü mütshuong pendou, Ijep ka meimeijung phaia lama yama haikei. 5Longbü müt pendou kho kipbü kikei, lausikei Ijep ka longbü lama yama bukbü shuong kho akipbü kikei. 6Israelbü shuong po saonyi yamlamanga paikei, Ijep ka longbü lakjaibü mütshuong phang khümbo haikhümbei shongko; aishanga haoenei Bou ngüh adit. Bouei haoen to, haoeibü nyusibou to sen la kula theyolanyobü kaodak, sendei hoba naodei koubü kaodak kho haoen la ahaplabü dogo theyolanyoko laukei. 7Haoei haoeneibü jeiko haoeneibü shousi shuong langngaitikei, hoba Joshuaei haoen kipan apbukei; aishanga haoen akipbü kikei, lama haoen akip. 8Ladang phang khümbo kipan apbü wankei, haoen maitikei shongko shaishanga ngaikei.
9Kheijinei Bouei Joshua to laukei, “Tat ngei ka ka jaüan Ijepbü himou khokan apa.” Khoei kho kao tat chalou sühko Gilgal dogo nyena.
10Gilgala shaibü Israelbüei lit anthük leiboubü chasemlamto Jerikho pholia Püetbü Lem noukei. 11Püetbü Lem phainyet, khünyettham, haoenei kaonyek kabü shausiyung shaukei: tokai ajinbü wentek hoba wana ngouan youshou. 12Haoenei kaonyek kabü shausiyung shaubü phainyet mana thonan apbei. Israelbü to touje mana aki; kho poa haoenei Kanan kaodak langle shaukei.
Bou Sepai Tan Leiyeibou
13Joshuaei Jerikho nyangko kijinei, nyek thükae chühkei hoba müt che hao thedanga ika in jungan loan hapbei. Haoei nyangko louan phekei, “No kün shanga lo, ayingsi küneibü labou shanga lo?”
14“Aying,” haoei jongaikei. “Ngo tou Bou sepai tan leiyeibü yeian loua.” Joshuaei kao ae the khüpetkei hoba lembei, hoba laukei, “Kü bunyubouei hao khangenbou to ai lauda?”
15Bou sepai tan leiyeibouei Joshua to laukei, “Kaibü you ka nguok hangletashi, aishanga no lanei loan ki kho kao saopobü kao ki.” Hobaje Joshuaei khei kümbei.
