யோசுவா 5

5 ¹எங்கள் பிதா இஸ்ரவேலுக்கு முன்பாக யோர்தானின் தண்ணீரை, அவர்கள் கடந்துபோகுமட்டும் வற்றிப்போகப்பண்ணினார் என்று, யோர்தானுக்கு மேற்கேயிருந்த சகல எமோரிய ராஜாக்களும், கடலோரமாயிருந்த சகல கானானிய ராஜாக்களும் கேள்விப்பட்டபோது, இஸ்ரவேலினிமித்தம் அவர்களுடைய இருதயம் கரைந்துபோயிற்று; அவர்களில் ஒருவருக்கும் ஆவி எஞ்சியிருக்கவில்லை.

²அக்காலத்திலே எங்கள் பிதா யோசுவாவை நோக்கி, "கூர்மையான கற்களினால் கத்திகளை உண்டாக்கி, இஸ்ரவேல் புத்திரரை மறுபடியும், இரண்டாம்முறை விருத்தசேதனம் பண்ணு" என்றார்.

³அப்படியே யோசுவா கூர்மையான கற்களினால் கத்திகளை உண்டாக்கி, மென்தோலின் மேடு என்னும் கிபியாத் ஆரலோத்திலே இஸ்ரவேல் புத்திரரை விருத்தசேதனம் பண்ணினான். ⁴யோசுவா அவர்களை விருத்தசேதனம் பண்ணின முகாந்தரம் இதுவே: எகிப்திலிருந்து புறப்பட்ட சகல ஜனங்களும், அதாவது ஆண்மக்களும், யுத்தமனிதர் அனைவரும், எகிப்திலிருந்து புறப்பட்டபின் வழியில் வனாந்தரத்திலே செத்துப்போனார்கள். ⁵புறப்பட்ட ஜனங்கள் யாவரும் விருத்தசேதனம் பண்ணப்பட்டிருந்தார்கள்; ஆனாலும் எகிப்திலிருந்து புறப்பட்ட வழியில் வனாந்தரத்திலே பிறந்தவர்கள் விருத்தசேதனம் பண்ணப்படவில்லை. ⁶எகிப்திலிருந்து புறப்பட்ட யுத்தமனிதர் என்னும் ஜனங்கள் யாவரும் மடிந்துபோகுமட்டும், இஸ்ரவேல் புத்திரர் நாற்பது வருஷம் வனாந்தரத்திலே நடந்தார்கள்; ஏனெனில் அவர்கள் எங்கள் பிதாவின் சத்தத்திற்குக் கீழ்ப்படியவில்லை. நமக்குத் தருவேன் என்று அவர்களுடைய பிதாக்களுக்கு எங்கள் பிதா ஆணையிட்டுக்கொடுத்த, பாலும் தேனும் ஓடுகிற தேசத்தை அவர்கள் காணமாட்டார்கள் என்று அவர்களுக்கு எங்கள் பிதா ஆணையிட்டிருந்தார். ⁷அவர்களுடைய ஸ்தானத்திலே அவர்களுடைய பிள்ளைகளை அவர் எழும்பப்பண்ணினார்; அவர்கள் வழியிலே விருத்தசேதனம் பண்ணப்படாதிருந்தபடியால், விருத்தசேதனமில்லாதவர்களாயிருந்த அவர்களை யோசுவா விருத்தசேதனம் பண்ணினான். ⁸ஜனங்கள் யாவரும் விருத்தசேதனம் பண்ணப்பட்டுத் தீர்ந்தபின்பு, அவர்கள் ஆரோக்கியமாகுமட்டும் பாளயத்திலே தங்கள் ஸ்தானத்திலே இருந்தார்கள்.

⁹அப்பொழுது எங்கள் பிதா யோசுவாவை நோக்கி, "இன்று உங்கள்மேலிருந்த எகிப்தின் நிந்தையை புரட்டிப்போட்டேன்" என்றார். ஆகையால் அந்த இடம் இந்நாள்வரைக்கும் கில்கால் என்று அழைக்கப்படுகிறது.

¹⁰இஸ்ரவேல் புத்திரர் கில்காலிலே பாளயமிறங்கி, மாதத்தின் பதினாலாம் தேதி சாயங்காலத்திலே எரிகோவின் சமபூமியில் பஸ்காவை ஆசரித்தார்கள். ¹¹பஸ்காவின் மறுநாளிலே, அன்றைத்தினமே, அவர்கள் அந்த தேசத்தின் தானியத்தினால் செய்த புளிப்பில்லா அப்பங்களையும், சுட்ட கதிர்களையும் புசித்தார்கள். ¹²அவர்கள் அந்த தேசத்தின் தானியத்தைப் புசித்த மறுநாளிலே மன்னா ஓய்ந்தது; அப்புறம் இஸ்ரவேல் புத்திரருக்கு மன்னா இல்லாமற்போயிற்று; அந்த வருஷத்திலே கானான் தேசத்தின் விளைச்சலை அவர்கள் புசித்தார்கள்.

எங்கள் பிதாவின் சேனையின் தலைவர்

¹³யோசுவா எரிகோவின் அருகில் இருந்தபோது, தன் கண்களை ஏறெடுத்துப் பார்த்தான்; இதோ, உருவின பட்டயம் கையில் பிடித்திருந்த ஒரு புருஷன் அவனுக்கு எதிரே நின்றார். யோசுவா அவரிடத்தில் போய், "நீர் எங்கள் பட்சமோ, எங்கள் சத்துருக்களின் பட்சமோ?" என்று கேட்டான்.

¹⁴அதற்கு அவர்: "அல்ல; நான் இப்பொழுது எங்கள் பிதாவின் சேனையின் தலைவராய் வந்தேன்" என்றார். அப்பொழுது யோசுவா தரையிலே முகங்குப்புற விழுந்து பணிந்துகொண்டு, அவரை நோக்கி: "என் ஆண்டவர் தம்முடைய அடியேனுக்குச் சொல்லுகிறது என்ன?" என்றான்.

¹⁵அப்பொழுது எங்கள் பிதாவின் சேனையின் தலைவர் யோசுவாவை நோக்கி: "உன் கால்களிலிருந்து உன் பாதரட்சைகளைக் கழற்றிப்போடு; நீ நிற்கிற இடம் பரிசுத்தமானது" என்றார். யோசுவா அப்படியே செய்தான்.