Avāna Gilgalli Awui Mibingli Kadhar Onphalungmi
Rālkhuingāngāwui kathāng kasāi. Kharing kathar akhana kharung sākhai kala kachāsheng ngaphāng thānali leihai, Passover sāhai, kala ram khatungwui athuk chākhavai ni eina manna khaimaila. Hāwui thili, meikhan phukshok mi akhana Joshuali ina ithumwui Avāwui rālmi kaihakpa da haikhai.
5 1Jordan zingtunshong khalei Amorwui awungabing saikora, kala shamadru ngalemli khalei Canaanwui awungabing saikorana, athum mamakānseranglakha eina tangda ithumwui Avāna Israelwui mangāli Jordanwui tara̱ chi theng ngasak da kashā eina, athumwui malung menghaowa, Israelwui vang eina athumli manglā khipākha maleithuwa.
2Atam chitharan ithumwui Avāna Joshuali hānga, "Nakhalatta lungkainao khainaobing sālu, kala Israelnaobingli latluida, kakhaneli ahui rimshoklu."
3Chiwui vang eina Joshuana lungkainao khainaobing sāda ahui kaphung Gibeath-haaralothli Israelwui naomayarabingli ahui rimshokmi. 4Joshuana athumli ahui rimshokmiwui kakhalat hiya: Egyptwui eina zatphok kahai mayarnaobing, raimibing saikora, Egyptwui eina kharā kahaiwui thili shongfali lamhāngli thihaowa. 5Zatphok kahai mi saikora ahui rimshokhaowa, kha Egyptwui eina kharā shongfa lamhāngli pharā kahaibing chi ahui rimshok masāmana. 6Egyptwui eina zatphok kahai raimibing yur katonga chi thi mayumranglakha eina tangda, Israelwui mibingna lamhāngli zingkum hangmati zata; kaja athumna ithumwui Avāwui akhon manganaimana. Ana athumwui avā ngarāli ithumli mikhavai khangashit sākahai, seina̱ eina khuira̱ khalonga ngalei chi athumli matheimimara da ithumwui Avāna khangashit sai. 7Ana athumwui naongarāli athumwui pamli khāngmathotmi, kala Joshuana athumli ahui rimshokmi, kaja athum ahui marimkashokbingna, shongfali ahui rimshok masāmana. 8Yur katonga chi ahui rimshokmi peihairakasā tharan, athum raimiseranglakha eina tangda rāmrahli pamsanghaowa.
9Chiwui thili ithumwui Avāna Joshuali hānga, "Aja zimiksho ina Egyptwui maikashi chi nathumwui eina khalangshokmihaira." Chiwui vang eina apam chiwui ming aja eina tangda Gilgal da hokahaina.
10Israelnaobingna Gilgalli rāmrah sāpamlakha kachāngwui tharāda khamatethang ngazin Jericho tampākli makānkhami phanit chi mayona. 11Makānkhami phanitwui akhama kathā, chithang ngalāngda, athumna ngaleiwui theishirai, khawok makazang khamui kala māngatai zai. 12Athumna ngaleiwui theishirai chi zaiwui akhama kathā manna chi ngasāmhaowa. Israelnaobingli manna maleiluimana; chi kumthang athumna Canaanwui theishirai chi zai.
Avāwui Raimi Kathāna
13Joshua Jericho ngalemli leilakha, Joshuana yangkakā tharan, yanglu, raighai hunda apāngli singkhui mipā akha awui mangāli nganinga. Joshuana ali vāda ngahāna, "Na ithumwui vangna lah ithumwui yangkashewui vangkhala?"
14"Chi maningmana," da ana ngahānkai. "Ina ara ithumwui Avāwui raimi kathāna sāda kharāna." Joshuana ngaleili mai mashunzangda khoruma, kala hānga, "Iwui amei ana awui raoli khi hānghaira?"
15Ithumwui Avāwui raimi kathānana Joshuali hānga, "Nawui pheiwui pheihop chi khuitāhaolu, kaja na nganingsai apam chi kathara ngaleina." Chieina Joshuana chithāda sai.
