Avāna Jerichowui Phākho Sakhaimi
Ni tharuk rālmina kaopāk khalei khunga kakhomda kakhong eina akhong makhamada kasāi. Tharā nini ni kathāwuili tharā sini kakhomda rakkharahai, kala ithumwui Avāna chungrong kathashokhai. Kaphungngachang eina makhāli kaphung khavai, Rahabwui shimmi dakhuiyung, athali nganaokhai lāmayarna phakhai.
6 1Chitharān Jerichowui keinung chi Israelnaobingwui vang eina lonkazakta shunghaowa; khipākha mashokmana, kala khipākha mazangmana.
2Kala ithumwui Avāna Joshuali hānga, "Yanglu, ina Jericho, chiwui awunga, kala chiwui kapanga saikora chi nawui pāngli horsangmihaira.
3"Nathum raimi kapinga saikorana, keinung chi akhali kuimareizatlu. Tharukthang hithāda sālu. 4Pāngmon shinina oko mangāli talla̱ shini phungra. Kashinethang, pāngmonbingna talla̱ khongda keinung chi shinishida kuimareizatra. 5Talla̱ chi kasāng khongda nathumna chi shā tharan, mi saikorana mathānda vaora. Chieina keinungwui phākho chi pitāda kongluihaora, kala mi kachiva̱na shingāda mangāshong yongra."
6Nunwui naomayara Joshuana pāngmonbingli hokhuida hānga, "Tuingashitwui oko chi ngava̱kālu, kala pāngmon shinina ithumwui Avāwui oko mangāli talla̱ shini phungra."
7Ana mibingli hānga, "Muivālu! Keinung chi kuimareizatlu, kala raisāri shaksāda mibingna ithumwui Avāwui oko mangāli zatra."
8Joshuana mibingli hāngchithei kahaiwui thili, talla̱ shini phunga pāngmon shini china ithumwui Avāwui mangāli talla̱ khongda mangāshong zata, kala ithumwui Avāwui tuingashit oko china athumli shurthuwa. 9Raisāri shaksāda mibingna talla̱ khonga pāngmonbingwui mangāli zata, kala rai khangākabing china oko khanukli zata, talla̱ china khongchinga.
10Kha Joshuana mibingli kasoda hānga, "Mavaohaialu, kala nathumwui akhon mashā ngasakalu; ina 'Vaolu!' da mahāngranglakha eina tangda nathumwui khamor eina tui akhala mashokla. Chieina vaolu." 11Chieina ana ithumwui Avāwui oko chi keinung chi akhali kuimareiya ngasaka. Chieina athum rāmrahli latungda chili apisanga. 12Joshuana ngathorthak ngakarthui, kala pāngmonbingna ithumwui Avāwui oko chi ngava̱kāhaowa. 13Ithumwui Avāwui oko mangāli talla̱ shini phunga pāngmon shini china talla̱ khongchingda zata. Raisāri shaksāda mibingna mangāli zata; rai khangākabing china talla̱ khongda ithumwui Avāwui oko chi shurthuwa. 14Chieina kakhanethang athumna keinung chi akhali kuimareizatlaga rāmrahli latunga. Tharukthang hithāda sai.
15Kashinethang athum ngathorthak thuida, achālakha sai thāda keinung chi kuimareizata, kha chithangva shinishida kuimareizata. 16Kashine khali kuimareida, pāngmonbingna talla̱ khong tharan, Joshuana mibingli hānga, "Vaolu! Kaja ithumwui Avāna nathumli keinung chi mihaira. 17Sāshimān khavai, keinung chi kala chiwui alungli khalei saikora ithumwui Avāli tharchigat kahaina. Khayorva̱ Rahab kala awui shimli ali ngasotabing saikora, athummāng ringra, kaja ana ithumna chihovā kahai paomebing chi ngathumhai. a a v17 'Ithumwui Avāli tharchigat kahai sāshimān khavai' kaji chi hithāna: saikora chi sāshimānda Vareli chithāda horsangmi kaji china, kala khipānakha kachichāwui vang khalei chi khuiwui mahaimana. 18Kha shiman ngasak khavai horsang kahai otbing chi eina chihochaohaolu, chiwui eina khikha khuida nathum khalattali shimān makhuirā ngasakla, kala Israel rāmrah katonga chi shimānki kalākashili aphanshokta chili kakhanang khuirāra. 19Kha lupāsā saikora, sinā, kala pithrai eina mariwui khorkhong chi ithumwui Avāwui mangāli katharana; chi awui lanshimli zatphalungra."
20Chiwui vang eina pāngmonbingna talla̱ khong tharan mibingna panglāk eina vaowa. Talla̱khon kashā tharan athumna khamathānkhon eina panglāk eina vaoda, phākho chi kaiyānghaowa. Mibingna mi kachiva̱ ngatartei eina keinung chili azangda chi yuikhuiya. 21Athumna keinung chiwui alungli khalei sha̱nao mayarnao, naoshinao kasarnao, mukkā, yao kala gadhā saikora raighai eina shimān sākazammiserhaowa. b b v21 Jericho chi shimānli sākazamser kahai hi Kathara Tuiwui apong kachangkap kaje akhana: makhayā otmāng kala naoshinao chigat pha̱ khavaili chihonao apamli ithumwui Avāna sāngnā khāmda mi kahai bichar. Hilila awui lukhamashan pemting chi rāfa, khangashik eina awuili hor kahai ayarpa Rahab kala awui shimkhur katonga chi huimihaina. 22Joshuana ngalei ra̱yang kahai mi khani chili hānga, "Nathumna ali khangashit sākahai thāda, khayorva̱wui shimli vālaga sha̱nao chi kala awuili khalei saikora chi khuishoklu." 23Chiwui vang eina ra̱yang kahai yaronnaobingna vāzangda Rahab, awui avāva̱, ava̱va̱, achinā ngarā, kala awuili khalei saikora chi khuishoka. Athumna awui shimkhur katonga chi khuishokta Israel rāmrahwui ayarli pam ngasaka. 24Athumna keinung chi kala chiwui alungli khalei saikora chi mei eina riktāhaowa, kha lupāsā, sinā, kala pithrai eina mariwui khorkhong chi ithumwui Avāwui shimwui lan kazip kahai kāli sanghaowa. 25Kha khayorva̱ Rahab, awui avāva̱wui shimkhur, kala awuili khalei saikora chi Joshuana ringngasaka. Ana aja eina tangda Israelwui ngachaili ringvai, kaja Joshuana Jericho ra̱yang khavai chihovā kahai paomebing chi ana ngathum ngasakhaira.
26Chiwui thili Joshuana athumli khangashit ngasakta hānga, "Jericho keinung hi sakāluishit khavai nganingdalei mipā chi ithumwui Avāwui mangāli khonkashi ngasāra. Ana chiwui shimphunga chi awui naochizaili pha̱ra, kala chiwui ngaveibing chi awui naopaisholi pha̱ra." 27Chiwui vang eina ithumwui Avāna Joshuali ngasomi, kala Joshuawui mingkhamayāng ngalei saikorali ngayaovai.
