Pitri pora Jericho laga deowal khan ke girai dise

Choi din tak ekta sena bondh kori diya sheher laga chari phale chup-chap ghurise. Saat number din te tarkhan saat bar ghuri kene hikar korise, aru amar Pitri pora deowal tu giri bole dise. Sob jinis nash koribole alag kori dise, khali Rahab laga ghor laga manuh khan bina, jun khan ke tai logot kosom kora dekha jowan duijon pora bahar te ulai anise.

Adhyay 6.

Etiya Israel laga manuh khan karone Jericho tu khub bhal kori bondho thakise; kun bhi bahar jua nai aru kun bhi bhitor te aha nai.

Tetiya amar Pitri pora Joshua ke koise, “Sabi, Moi Jericho, tar laga raja, aru tar laga takot thaka sipahi khan ke tumar hath te di dise.

“Tumikhan juddho kora manuh sob, sheher tu laga chari phale ekbar ghuri kene jabi. Eitu choi din tak koribi. Saat jon purohit khan ke vachan laga sanduk laga age te mer laga saat ta seng loi kene jabole dibi. Saat number din te, purohit khan pora seng phuki thaka homoi te, sheher tu laga chari phale saat bar ghuribi. Jitia mer laga seng pora lamba awaj ulabo aru tumikhan eitu hunibo, titia sob manuh ke dangor awaj pora hala koribole dibi. Sheher laga deowal tu girai jabo, aru sob manuh nijor age te sidha uthi jabo.”

Nun laga putro Joshua pora purohit khan ke mati kene tarkhan ke koise, “Vachan laga sanduk tu uthabi, aru saat jon purohit khan ke amar Pitri laga sanduk age te mer laga saat ta seng loi kene jabole dibi.”

Tar pora manuh khan ke koise, “Age te jabi! Sheher laga chari phale ghuribi, aru hathiar thaka manuh khan ke amar Pitri laga sanduk age te jabole dibi.”

Joshua kotha kua khotom huwa pichete, amar Pitri age te mer laga saat ta seng loi thaka saat jon purohit khan seng khan ke phuki kene age te bahri jaise, aru amar Pitri laga vachan laga sanduk tu tarkhan laga pichete jaise. Hathiar thaka manuh khan seng phuki thaka purohit khan laga age te jaise, aru pichete thaka rokhiya khan sanduk laga pichete jaise, aru seng khan hodai awaj kori thakise.

Kintu Joshua pora manuh khan ke hukum dise, “Hala nakoribi aru tumikhan laga awaj ke huni bole nadibi; Moi ‘Hala koribi!’ nakua tak tumikhan laga mukh pora ekta kotha bhi naulabi. Titia hala koribi.” Titia tar pora amar Pitri laga sanduk ke sheher laga chari phale ekbar ghurai dise. Tetiya tarkhan tombu-ghor te ahhi kene tombu-ghor te rati katise. Joshua dusera din phojur te joldi uthise, aru purohit khan pora amar Pitri laga sanduk ke uthaise. Amar Pitri laga sanduk age te mer laga saat ta seng loi thaka saat jon purohit khan, seng khan ke lagatar phuki kene, age te jaise. Hathiar thaka manuh khan age te jaise; aru seng khan awaj kori thaka homoi te pichete thaka rokhiya khan amar Pitri laga sanduk laga pichete jaise. Titia dusera din te tarkhan sheher laga chari phale ekbar ghuri kene tombu-ghor te wapas ahhise. Tarkhan eitu choi din tak korise.

Saat number din te tarkhan phojur-phojur te uthi kene age nisena sheher laga chari phale ghurise, kintu eitu din te saat bar. Saat bar ghura homoi te, purohit khan pora seng phuki thaka homoi te, Joshua pora manuh khan ke koise, “Hala koribi! Kilemane amar Pitri pora tumikhan ke sheher tu di dise. Sheher tu aru tar bhitor te thaka sob khan amar Pitri karone khotom kori dibole samarpan kori dise. Khali beschya Rahab aru tai laga ghor te tai logot thaka sob manuh jinda thakibo, kilemane tai amikhan pora pathai diya khobor-bahok khan ke lukai rakhise. ^a Kintu khotom koribole alag kori rakha jinis khan pora dur te thakibi, nahole tate pora kiba loi kene tumikhan nijor uporte khotom hua anibo, aru pura Israel laga tombu-ghor ke khotom hua laga khatra te halai dibo aru tate dukh ani dibo. Kintu sob chandi, suna, aru pitol aru luha laga jinis khan amar Pitri karone pobitro ase; eitu khan Tar laga dhun-bhandar te jabo lage.”

Titia purohit khan pora seng phuki thaka homoi te manuh khan hala korise. Seng laga awaj huni kene, tarkhan dangor awaj pora hala korise, aru deowal tu girai jaise. Manuh khan sheher bhitor te, sob nijor sidha age te, dhaki ghusi kene eitu ke dhori loise. Tarkhan talwar laga dhar pora sheher bhitor te thaka sob khan ke—mota aru maiki, jawan aru bura, goru, mer, gadha—khotom kori dise. ^b Jei duijon manuh desh tu ke gupi kori saise, taikhan ke Joshua pora koise, “Beschya laga ghor te jabi aru tumikhan taike kosom diya nisena, hei maiki aru tai laga sob manuh ke bahar te ani dibi.” Titia jawan guptachar khan bhitor te ghusi kene Rahab, tai laga baba, ama, bhai khan, aru tai laga sob manuh ke bahar te ani dise. Tarkhan tai laga pura poribar ke bahar te ani kene Israel laga tombu-ghor laga bahar te rakhise. Tarkhan sheher tu aru tar bhitor te thaka sob khan ke jolai dise, kintu chandi, suna, aru pitol aru luha laga jinis khan ke amar Pitri laga ghor laga bhandar-ghor te rakhise. Joshua pora beschya Rahab, tai laga baba laga ghor manuh, aru tai laga sob manuh ke jinda rakhise. Tai aji tak Israel laga majote thaki ase, kilemane Joshua pora Jericho ke gupi kori sabole pathai diya khobor-bahok khan ke tai lukai rakhise.

Tetiya Joshua pora tarkhan ke eitu kosom khabole dise: “Kun manuh eitu sheher, Jericho ke aru ekbar bonabole uthibo, tai amar Pitri age te shrapit ase. Tai laga poila jonom huwa bacha laga daam pora eitu laga bhetti rakhibo aru tai laga sob pora chutu bacha laga daam pora eitu laga dorja khan khara koribo.” Titia amar Pitri Joshua logot te thakise, aru Joshua laga naam pura desh te punchise.