Agya no Yɛ Ne Nkurɔfo Foforo wɔ Gilgal
Ansa na ɔko biara refi ase no, ahomegye. Wɔtwa awo ntoatoaso foforo twetia na wɔma wɔtena nsraban mu kosi sɛ wɔn akuru bɛsa, wodi Twam afahyɛ, na mana no gyae da a wodi asase no ankasa aduan no. Afei ɔbarima bi a watwe n'akofena ka kyerɛ Yosua sɛ ɔno na odi yɛn Agya asraafo anim.
Yɛn Agya kasa wɔ nkyekyɛmu ahorow 2, 9
5 1Bere a Amorifo ahemfo a wɔwɔ Yordan atɔe fam nyinaa ne Kanaanfo ahemfo a wɔwɔ po no ho nyinaa tee sɛ yɛn Agya ama Yordan nsu no ayow wɔ Israelfo anim kosii sɛ wɔtwa kɔɔ agya no, wɔn akoma butuwii, na honhom biara anka wɔn mu bio esiane Israelfo nti.
2Saa bere no, yɛn Agya ka kyerɛɛ Yosua se, “Yɛ abotan sekan ma wo ho, na twa Israelfo twetia bio, ne mprenu so.”
3Enti Yosua yɛɛ abotan sekan, na ɔtwaa Israel mmabarima twetia wɔ Gibeat-Haaralot, Twetia Koko no so. 4Nea enti a Yosua twaa wɔn twetia ne sɛ: nnipa a wofii Misraim no nyinaa—mmarima no, akofo no nyinaa—wuwuu wɔ sare so wɔ ɔkwan so bere a wofii Misraim no akyi. 5Wɔtwaa wɔn a wofii hɔ no nyinaa twetia, nanso wɔn a wɔwoo wɔn wɔ sare so wɔ ɔkwan so bere a wofi Misraim reba no, wɔntwaa wɔn twetia. 6Israelfo nantew mfe aduanan wɔ sare so kosii sɛ ɔman no nyinaa—akofo a wofii Misraim no—wuwui, efisɛ wɔantie yɛn Agya nne. Yɛn Agya kaa ntam kyerɛɛ wɔn sɛ ɔremma wɔnhu asase a ɔkaa ntam kyerɛɛ wɔn agyanom sɛ ɔde bɛma yɛn no, asase a nufusu ne ɛwo sen so. 7Ɔma wɔn mma sɔre sii wɔn anan mu, na Yosua twaa wɔn twetia, efisɛ na wɔyɛ momonotofo, na wɔantwa wɔn twetia wɔ ɔkwan so. 8Bere a wɔtwaa ɔman no nyinaa twetia wiee no, wɔtenaa nsraban no mu kosii sɛ wɔn ho san tɔɔ wɔn.
9Afei yɛn Agya ka kyerɛɛ Yosua se, “Nnɛ mapire Misraim animguase afi mo so.” Enti wɔfrɛ saa beae no Gilgal de besi nnɛ.
10Israelfo a wɔbɔɔ nsraban wɔ Gilgal no dii Twam Afahyɛ no wɔ ɔsram no da a ɛtɔ so dunan no anwummere wɔ Yeriko tataw so. 11Twam Afahyɛ no akyi da no, ɛda no ankasa, wodii asase no so nnɔbae: brodo a mmɔkaw nni mu ne aburow a wɔatoto. 12Ɛda a edi so a wodii asase no so nnɔbae no, mana no gyae. Israelfo annya mana bio; saa afe no wodii Kanaan nnɔbae.
Agya no Asraafo Sahene
13Bere a Yosua bɛn Yeriko no, ɔmaa nʼani so hui sɛ ɔbarima bi gyina nʼanim a ɔkura nkrante a watwe. Yosua kɔɔ ne nkyɛn kobisaa no se, “Wowɔ yɛn afa anaa yɛn atamfo afa?”
14“Dabi,” ɔbuae. “Seesei maba sɛ yɛn Agya asraafo sahene.” Yosua de nʼanim butuw fam som, na ɔbisaa no se, “Dɛn na me wura ka kyerɛ nʼakoa?”
15Yɛn Agya asraafo sahene no ka kyerɛɛ Yosua se, “Yi wo mpaboa fi wo nan ase, efisɛ beae a wugyina hɔ no yɛ kronkron.” Yosua yɛɛ saa.
