ପିତା ଗିଲ୍‌ଗଲ୍‌ରେ ଆପଣା ଲୋକଙ୍କୁ ନୂତନ କରନ୍ତି

କୌଣସି ଯୁଦ୍ଧ ପୂର୍ବରୁ, ଏକ ବିରତି। ନୂତନ ପିଢ଼ିର ସୁନ୍ନତ କରାଯାଏ ଏବଂ ସୁସ୍ଥ ହେବା ପର୍ଯ୍ୟନ୍ତ ସେମାନେ ଛାଉଣିରେ ରହନ୍ତି, ନିସ୍ତାରପର୍ବ ପାଳନ କରାଯାଏ, ଏବଂ ଯେଉଁ ଦିନ ସେମାନେ ଦେଶର ନିଜ ଉତ୍ପନ୍ନ ଖାଦ୍ୟ ଖାଆନ୍ତି ସେହି ଦିନ ମାନ୍ନା ବନ୍ଦ ହୁଏ। ତାʼପରେ ଖଡ୍ଗ କାଢ଼ିଥିବା ଜଣେ ପୁରୁଷ ଯିହୋଶୂୟଙ୍କୁ କହନ୍ତି ଯେ ସେ ଆମର ପିତାଙ୍କ ସୈନ୍ୟର ସେନାପତି।

ଅଧ୍ୟାୟ 5।

ଯର୍ଦ୍ଦନର ପଶ୍ଚିମ ଦିଗସ୍ଥ ଇମୋରୀୟମାନଙ୍କ ସମସ୍ତ ରାଜା ଓ ସମୁଦ୍ର ନିକଟସ୍ଥ କିଣାନୀୟମାନଙ୍କ ସମସ୍ତ ରାଜା, ଇସ୍ରାଏଲ ପାର ହେବା ପର୍ଯ୍ୟନ୍ତ ଆମ୍ଭମାନଙ୍କ ପିତା ସେମାନଙ୍କ ସମ୍ମୁଖରେ ଯର୍ଦ୍ଦନର ଜଳ ଶୁଷ୍କ କରିଅଛନ୍ତି ବୋଲି ଯେତେବେଳେ ଶୁଣିଲେ, ସେତେବେଳେ ସେମାନଙ୍କ ହୃଦୟ ତରଳି ଗଲା, ଆଉ ଇସ୍ରାଏଲ ସକାଶୁ ସେମାନଙ୍କଠାରେ ଆଉ ପ୍ରାଣ ରହିଲା ନାହିଁ।

ସେହି ସମୟରେ ଆମ୍ଭମାନଙ୍କ ପିତା ଯିହୋଶୂୟଙ୍କୁ କହିଲେ, “ତୁମ୍ଭେ ଆପଣା ନିମନ୍ତେ ଚକ୍‌ମକି ପଥରର ଛୁରୀ ନିର୍ମାଣ କର, ପୁଣି ଇସ୍ରାଏଲ-ସନ୍ତାନମାନଙ୍କୁ ଦ୍ଵିତୀୟ ଥର ପୁନର୍ବାର ସୁନ୍ନତ କର।”

ତେଣୁ ଯିହୋଶୂୟ ଚକ୍‌ମକି ପଥରର ଛୁରୀ ନିର୍ମାଣ କରି ଗିବୀୟଥ୍‌-ହାରାଲୋତ୍‌, ଅର୍ଥାତ୍‌ ଅଗ୍ରଚର୍ମ-ଗିରିରେ ଇସ୍ରାଏଲର ସନ୍ତାନମାନଙ୍କୁ ସୁନ୍ନତ କଲେ। ଯିହୋଶୂୟ ଯେଉଁ କାରଣରୁ ସେମାନଙ୍କୁ ସୁନ୍ନତ କଲେ, ତାହା ଏହି: ମିସରରୁ ବାହାରି ଆସିଥିବା ସମସ୍ତ ଲୋକ, ଅର୍ଥାତ୍‌ ପୁରୁଷମାନେ, ସମସ୍ତ ଯୋଦ୍ଧା ମିସରରୁ ବାହାରିବା ଉତ୍ତାରେ ପଥ ମଧ୍ୟରେ ପ୍ରାନ୍ତରରେ ମୃତ୍ୟୁବରଣ କରିଥିଲେ। ବାହାରି ଆସିଥିବା ସମସ୍ତ ଲୋକ ସୁନ୍ନତ ହୋଇଥିଲେ, କିନ୍ତୁ ମିସରରୁ ବାହାରିବା ଉତ୍ତାରେ ପଥ ମଧ୍ୟରେ ପ୍ରାନ୍ତରରେ ଜନ୍ମ ହୋଇଥିବା ଲୋକମାନେ ସୁନ୍ନତ ହୋଇ ନ ଥିଲେ। କାରଣ ମିସରରୁ ବାହାରି ଆସିଥିବା ଯୋଦ୍ଧାମାନେ, ଅର୍ଥାତ୍‌ ସମୁଦାୟ ଜାତି ବିନଷ୍ଟ ହେବା ପର୍ଯ୍ୟନ୍ତ ଇସ୍ରାଏଲ-ସନ୍ତାନମାନେ ଚାଳିଶ ବର୍ଷ ପ୍ରାନ୍ତରରେ ଭ୍ରମଣ କଲେ, ଯେହେତୁ ସେମାନେ ଆମ୍ଭମାନଙ୍କ ପିତାଙ୍କ ରବ ମାନିଲେ ନାହିଁ। ଯେଉଁ ଦେଶ ଆମ୍ଭମାନଙ୍କୁ ଦେବା ପାଇଁ ପିତା ସେମାନଙ୍କ ପିତୃପୁରୁଷଗଣ ନିକଟରେ ଶପଥ କରିଥିଲେ, ସେହି ଦୁଗ୍ଧ ଓ ମଧୁ ପ୍ରବାହୀ ଦେଶ ସେମାନଙ୍କୁ ଦେଖିବାକୁ ଦେବେ ନାହିଁ ବୋଲି ଆମ୍ଭମାନଙ୍କ ପିତା ସେମାନଙ୍କ ନିକଟରେ ଶପଥ କରିଥିଲେ। ପୁଣି ସେ ସେମାନଙ୍କ ପଦରେ ସେମାନଙ୍କ ସନ୍ତାନମାନଙ୍କୁ ଉତ୍ପନ୍ନ କଲେ, ଆଉ ଯିହୋଶୂୟ ସେମାନଙ୍କୁ ସୁନ୍ନତ କଲେ, କାରଣ ପଥ ମଧ୍ୟରେ ସେମାନଙ୍କୁ ସୁନ୍ନତ କରାଯାଇ ନ ଥିବାରୁ ସେମାନେ ଅସୁନ୍ନତ ଥିଲେ। ପୁଣି ସମୁଦାୟ ଜାତିର ସୁନ୍ନତ କର୍ମ ସମାପ୍ତ ହେଲାଉତ୍ତାରେ ସେମାନେ ସୁସ୍ଥ ହେବା ପର୍ଯ୍ୟନ୍ତ ଆପଣା ଆପଣା ସ୍ଥାନରେ ଛାଉଣିରେ ରହିଲେ।

ତହିଁ ଉତ୍ତାରେ ଆମ୍ଭମାନଙ୍କ ପିତା ଯିହୋଶୂୟଙ୍କୁ କହିଲେ, “ଆଜି ଆମ୍ଭେ ତୁମ୍ଭମାନଙ୍କଠାରୁ ମିସରର ଅପମାନ ଘୁଞ୍ଚାଇ ଦେଲୁ।” ଏଣୁ ଆଜି ପର୍ଯ୍ୟନ୍ତ ସେହି ସ୍ଥାନର ନାମ ଗିଲ୍‌ଗଲ୍‌ ଅଟେ।

ଇସ୍ରାଏଲ-ସନ୍ତାନମାନେ ଗିଲ୍‌ଗଲ୍‌ରେ ଛାଉଣି କରି ସେହି ମାସର ଚତୁର୍ଦ୍ଦଶ ଦିନ ସନ୍ଧ୍ୟା ସମୟରେ ଯିରୀହୋ ପଦାରେ ନିସ୍ତାର ପର୍ବ ପାଳନ କଲେ। ପୁଣି ନିସ୍ତାର ପର୍ବର ପରଦିନ, ସେହି ଦିନ ହିଁ ସେମାନେ ସେହି ଦେଶର ଉତ୍ପନ୍ନ ଦ୍ରବ୍ୟ, ଅର୍ଥାତ୍‌ ତାଡ଼ିଶୂନ୍ୟ ରୁଟି ଓ ଭର୍ଜିତ ଶସ୍ୟ ଭୋଜନ କଲେ। ଆଉ ସେମାନେ ସେହି ଦେଶର ଉତ୍ପନ୍ନ ଦ୍ରବ୍ୟ ଭୋଜନ କରିବାର ପରଦିନ ମାନ୍ନା ବନ୍ଦ ହୋଇଗଲା। ଇସ୍ରାଏଲ-ସନ୍ତାନମାନଙ୍କ ପାଇଁ ଆଉ ମାନ୍ନା ରହିଲା ନାହିଁ; ମାତ୍ର ସେହି ବର୍ଷ ସେମାନେ କିଣାନ ଦେଶର ଫସଲ ଭୋଜନ କଲେ।

ପିତାଙ୍କ ସୈନ୍ୟଦଳର ସେନାପତି

ଯିରୀହୋ ନିକଟରେ ଯିହୋଶୂୟ ଆଖି ଉଠାଇ ଅନାନ୍ତେ ଦେଖିଲେ, ଜଣେ ପୁରୁଷ ହସ୍ତରେ ନିଷ୍କୋଷିତ ଖଡ଼୍‌ଗ ଧରି ତାହାଙ୍କ ସମ୍ମୁଖରେ ଠିଆ ହୋଇଅଛନ୍ତି। ତେଣୁ ଯିହୋଶୂୟ ତାହାଙ୍କ ନିକଟକୁ ଯାଇ ପଚାରିଲେ, “ଆପଣ କି ଆମ୍ଭମାନଙ୍କ ପକ୍ଷ, ନା ଆମ୍ଭମାନଙ୍କ ଶତ୍ରୁମାନଙ୍କ ପକ୍ଷ?”

ସେ ଉତ୍ତର ଦେଲେ, “ନା, ମାତ୍ର ମୁଁ ଆମ୍ଭମାନଙ୍କ ପିତାଙ୍କ ସୈନ୍ୟଦଳର ସେନାପତି ହୋଇ ଏବେ ଆସିଅଛି।” ସେଥିରେ ଯିହୋଶୂୟ ଭୂମିରେ ମୁହଁ ମାଡ଼ି ପଡ଼ି ପ୍ରଣାମ କରି କହିଲେ, “ମୋʼ ପ୍ରଭୁ ଆପଣା ଦାସକୁ କʼଣ କହୁଅଛନ୍ତି?”

ତହିଁରେ ଆମ୍ଭମାନଙ୍କ ପିତାଙ୍କ ସୈନ୍ୟଦଳର ସେନାପତି ଯିହୋଶୂୟଙ୍କୁ କହିଲେ, “ତୁମ୍ଭେ ଆପଣା ପାଦରୁ ପାଦୁକା କାଢ଼, କାରଣ ଯେଉଁ ସ୍ଥାନରେ ତୁମ୍ଭେ ଠିଆ ହୋଇଅଛ, ତାହା ପବିତ୍ର।” ତହିଁରେ ଯିହୋଶୂୟ ସେହିପରି କଲେ।