ኢያሱ 5

5 ¹በዮርዳኖስ ማዶ በምዕራብ ያሉ የአሞራውያን ነገሥታት ሁሉና በባሕር ዳር ያሉ የከነዓናውያን ነገሥታት ሁሉ፣ እስራኤላውያን እስኪሻገሩ ድረስ አባታችን በእስራኤል ፊት የዮርዳኖስን ውሃ እንዳደረቀ በሰሙ ጊዜ፣ ልባቸው ቀለጠ፤ ከእስራኤልም የተነሣ በውስጣቸው መንፈስ አልቀረም።

²በዚያን ጊዜ አባታችን ኢያሱን እንዲህ አለው፤ “የድንጋይ ቢላዎች ሠርተህ እስራኤላውያንን እንደ ገና ለሁለተኛ ጊዜ ግረዝ።”

³ስለዚህ ኢያሱ የድንጋይ ቢላዎች ሠርቶ የእስራኤልን ልጆች በጊብዓት ሃራሎት፣ በሸለፈት ኰረብታ ገረዛቸው። ⁴ኢያሱ የገረዛቸውም ምክንያት ይህ ነው፤ ከግብፅ የወጡ ሕዝብ ሁሉ፣ ወንዶቹ፣ የጦር ሰዎች ሁሉ፣ ከግብፅ ከወጡ በኋላ በመንገድ ላይ በምድረ በዳ ሞተው ነበር። ⁵ከግብፅ የወጡት ሁሉ ተገርዘው ነበር፤ ከግብፅ ሲወጡ ግን በመንገድ ላይ በምድረ በዳ የተወለዱት አልተገረዙም ነበር። ⁶እስራኤላውያን የአባታችንን ድምፅ ስላልሰሙ፣ ከግብፅ የወጡት የጦር ሰዎች ሕዝቡ ሁሉ እስኪያልቅ ድረስ አርባ ዓመት በምድረ በዳ ተመላለሱ። አባታችንም ለአባቶቻቸው ሊሰጠን የማለውን ምድር፣ ወተትና ማር የምታፈስሰውን ምድር እንዳያዩ ማለባቸው። ⁷በእነርሱም ፋንታ ልጆቻቸውን አስነሣ፤ ኢያሱም ገረዛቸው፤ በመንገድ ላይ ስላልተገረዙ ያልተገረዙ ነበሩና። ⁸የሕዝቡ ሁሉ መገረዝ በተፈጸመ ጊዜ፣ እስኪድኑ ድረስ በሰፈሩ ውስጥ ቈዩ።

⁹አባታችንም ኢያሱን እንዲህ አለው፤ “ዛሬ የግብፅን ነቀፋ ከእናንተ ላይ አንከባልዬ አስወገድሁ።” ስለዚህ ያ ስፍራ እስከ ዛሬ ድረስ ጌልገላ ተብሎ ይጠራል።

¹⁰በጌልገላ ሰፍረው የነበሩት እስራኤላውያን በወሩ በዐሥራ አራተኛው ቀን ማታ በኢያሪኮ ሜዳ ፋሲካን አከበሩ። ¹¹ከፋሲካ ማግስት፣ በዚያኑ ዕለት የምድሪቱን ፍሬ፣ ያልቦካ ቂጣንና የተጠበሰ እህል በሉ። ¹²የምድሪቱን ፍሬ ከበሉበት ማግስት መናው ቀረ። ከዚያ በኋላ እስራኤላውያን መና አልነበራቸውም፤ በዚያ ዓመት የከነዓንን ምርት በሉ።

የአብ ሠራዊት አዛዥ

¹³ኢያሱ በኢያሪኮ አጠገብ ሳለ፣ ዓይኑን አንሥቶ ተመለከተ፤ እነሆም፣ የተመዘዘ ሰይፍ በእጁ የያዘ ሰው በፊቱ ቆሞ አየ። ወደ እርሱም ቀርቦ፣ “ከእኛ ወገን ነህ ወይስ ከጠላቶቻችን?” ብሎ ጠየቀው።

¹⁴“አይደለም” ሲል መለሰ። “አሁን የአባታችን ሠራዊት አዛዥ ሆኜ መጥቻለሁ።” ኢያሱም በግንባሩ ወደ መሬት ተደፍቶ ሰገደ፤ “ጌታዬ ለባሪያው ምን ይላል?” አለ።

¹⁵የአባታችንም ሠራዊት አዛዥ ኢያሱን እንዲህ አለው፤ “የቆምህበት ስፍራ የተቀደሰ ነውና ጫማህን ከእግርህ አውልቅ።” ኢያሱም እንዲሁ አደረገ።