ኢያሱ 4

4 ¹ሕዝቡ ሁሉ ዮርዳኖስን ተሻግሮ ከጨረሰ በኋላ፣ አባታችን ኢያሱን እንዲህ አለው፤

²“ከሕዝቡ መካከል ዐሥራ ሁለት ሰዎችን፣ ከእያንዳንዱ ነገድ አንዳንድ ሰው ውሰድ። ³እንዲህ ብለህ እዘዛቸው፤ ‘ከዚህ ከዮርዳኖስ መካከል፣ ካህናቱ እግሮቻቸው ጸንተው ከቆሙበት ስፍራ ዐሥራ ሁለት ድንጋዮችን አንሡ፤ ከእናንተም ጋራ አሻግራችሁ ዛሬ ሌሊት በምታድሩበት ሰፈር አስቀምጧቸው።’”

⁴ኢያሱም ከእስራኤል ልጆች መካከል ከእያንዳንዱ ነገድ አንዳንድ ሆነው የተመረጡትን ዐሥራ ሁለት ሰዎች ጠራ። ⁵እንዲህም አላቸው፤ “በአባታችሁ ታቦት ፊት ወደ ዮርዳኖስ መካከል ተሻገሩ፤ እያንዳንዳችሁ እንደ እስራኤል ልጆች ነገዶች ቍጥር አንዳንድ ድንጋይ አንሥታችሁ በጫንቃችሁ ተሸከሙ፤ ⁶ይህም በመካከላችሁ ምልክት ይሆናል፤ ወደ ፊት ልጆቻችሁ፣ ‘እነዚህ ድንጋዮች ለእናንተ ምን ማለት ናቸው?’ ብለው በሚጠይቁ ጊዜ፣ ⁷እንዲህ ብላችሁ ንገሯቸው፤ የዮርዳኖስ ውሃ በአባታችን ኪዳን ታቦት ፊት ተቋረጠ፤ ታቦቱ ዮርዳኖስን በተሻገረ ጊዜ፣ የዮርዳኖስ ውሃ ተቋረጠ። እነዚህ ድንጋዮች ለእስራኤል ሕዝብ ለዘላለም መታሰቢያ ይሆናሉ።”

⁸የእስራኤልም ልጆች ኢያሱ እንዳዘዛቸው አደረጉ፤ አባታችን ኢያሱን እንደ ነገረው እንደ እስራኤል ነገዶች ቍጥር ከዮርዳኖስ መካከል ዐሥራ ሁለት ድንጋዮችን አንሥተው ወደ ሰፈራቸው ተሸክመው ወስደው በዚያ አስቀመጧቸው። ⁹ኢያሱም የኪዳኑን ታቦት የተሸከሙ ካህናት እግሮች በቆሙበት በዮርዳኖስ መካከል ዐሥራ ሁለት ድንጋዮችን አቆመ፤ እስከ ዛሬም ድረስ በዚያ አሉ። ¹⁰ታቦቱን የተሸከሙ ካህናት፣ አባታችን ኢያሱን ለሕዝቡ እንዲነግር ያዘዘው ሁሉ እስኪፈጸም ድረስ፣ በዮርዳኖስ መካከል ቆሙ፤ ይህም ሙሴ ኢያሱን ባዘዘው መሠረት ነበር። ሕዝቡም ፈጥነው ተሻገሩ። ¹¹ሕዝቡ ሁሉ ተሻግሮ ከጨረሰ በኋላ፣ የአባታችን ታቦትና ካህናቱ በሕዝቡ ፊት ተሻገሩ። ¹²የሮቤል ልጆች፣ የጋድ ልጆችና የምናሴ ነገድ እኩሌታ፣ ሙሴ እንደ ነገራቸው ታጥቀው በእስራኤል ሕዝብ ፊት ተሻገሩ። ¹³ለጦርነት የታጠቁ አርባ ሺህ ያህል ሰዎች፣ ለውጊያ በአባታችን ፊት ወደ ኢያሪኮ ሜዳ ተሻገሩ። ¹⁴በዚያም ቀን አባታችን ኢያሱን በእስራኤል ሁሉ ዐይን ፊት ከፍ ከፍ አደረገው፤ ሙሴን እንደ ፈሩት ዕድሜውን ሁሉ ፈሩት።

¹⁵ከዚያም አባታችን ኢያሱን እንዲህ አለው፤

¹⁶“የምስክር ታቦትን የተሸከሙ ካህናት ከዮርዳኖስ እንዲወጡ እዘዛቸው።”

¹⁷ኢያሱም ካህናቱን፣ “ከዮርዳኖስ ውጡ” ብሎ አዘዛቸው። ¹⁸የአባታችንን ኪዳን ታቦት የተሸከሙ ካህናት ከዮርዳኖስ መካከል በወጡና እግሮቻቸው የብስ በረገጡ ጊዜ፣ የዮርዳኖስ ውሃ እንደ ቀድሞው ዳርቻውን ሁሉ ሞልቶ እየፈሰሰ ወደ ስፍራው ተመለሰ።

¹⁹ሕዝቡም በመጀመሪያው ወር በዐሥረኛው ቀን ከዮርዳኖስ ወጥተው በኢያሪኮ ምሥራቅ ዳር በጌልገላ ሰፈሩ። ²⁰ኢያሱም ከዮርዳኖስ ያነሡአቸውን እነዚያን ዐሥራ ሁለት ድንጋዮች በጌልገላ አቆመ። ²¹የእስራኤልንም ልጆች እንዲህ አላቸው፤ “ወደ ፊት ልጆቻችሁ አባቶቻቸውን፣ ‘እነዚህ ድንጋዮች ምን ማለት ናቸው?’ ብለው በሚጠይቁ ጊዜ፣ ²²ልጆቻችሁን እንዲህ ብላችሁ ንገሩ፤ ‘እስራኤል ይህን ዮርዳኖስ በየብስ ተሻገረ።’ ²³አባታችሁ እስክትሻገሩ ድረስ የዮርዳኖስን ውሃ በፊታችሁ አደረቀላችሁና፤ ይህም አባታችሁ እስክንሻገር ድረስ ቀይ ባሕርን በፊታችን እንዳደረቀልን ነው፤ ²⁴ይህም የምድር ሕዝቦች ሁሉ የአባታችን እጅ ኀያል እንደ ሆነ እንዲያውቁ፣ እናንተም አባታችሁን ሁልጊዜ እንድትፈሩ ነው።”