Koik taman ak aeng' che po kabwaatetap Kwanda
Eng' ng'olyootap Kwandanyo koip murenik taman ak aeng' koik taman ak aeng' kobun kwenutap Jordan si koteech kaboorunet eng' Gilgal. Igesunet ne ki kigoonet ko agobo let komugul: peetuut age koteebenak lagok kole ‘Po nee koichu?’, ak koetu pareet kiy ne iboorchin icheek.
Ng'alaali Kwandanyo eng' mustarisyek 2–3, 16
4 1Ye kingo koges pororyet tugul kolanda Jordan, komwachi Kwandanyo Joshua, koleenji,
2“Inam murenik taman ak aeng' eng' piik, chii agenge eng' ooreet age tugul. 3Ng'at icheek ileenji, ‘Onam koik taman ak aeng' eng' yu, kwenutap Jordan, eng' ole kitononso keldoogap tisiik; oip kobun okweek ak onde eng' nganaseet ole oruiye kemouni.’”
4Ki kuur anyun Joshua murenik taman ak aeng' che kiga king'at eng' lagogap Israel, chii agenge eng' ooreet age tugul. 5Ki leenji icheek, “Olandae eng' taitap moingetap Kwandang'wong' kwenutap Jordan, inam chii age tugul koik ak koip eng' tigigonnyi—agenge eng' ooreet age tugul eng' lagogap Israel, 6si koek niito kaboorunet eng' okweek: ye tuun teebenak lagokwok kasieen, kole, ‘Po nee koichu eng' okweek?’ 7Imwachi icheek: ki kitil peegap Jordan eng' taitap moingetap arorutyetap Kwandanyo. Ye kingo kolanda Jordan, ki kitil peegap Jordan. Koek koichu koigap kabwaatet eng' piigap Israel agoi koigeny.”
8Ki yai piigap Israel ko uu ye king'at Joshua: ki nam koik taman ak aeng' eng' kwenutap Jordan, agenge eng' ooreet age tugul eng' Israel, ko uu ye kamwachi Kwandanyo Joshua, ak ki ip koba nganasennywa, ak ki inde olooto. 9Ki tany kora Joshua koik taman ak aeng' eng' kwenutap Jordan, ole kitononso keldoogap tisiik che ki ibei moingetap arorutyet; tebee olooto agoi rani. 10Ki tonone tisiik che ibei moinget eng' kwenutap Jordan agoi kogees tuguuk tugul che king'atyi Kwandanyo Joshua komwachi piik—ko uu ye king'atyi Musa Joshua. Ki landa piik kochaakta. 11Ye kingo koges piik tugul kolanda, kolanda moingetap Kwandanyo ak tisiik eng' taitap piik. 12Ki landa lagogap Reuben, ak lagogap Gad, ak kebebertap pororyetap Manasseh, kolanda che tinyei kariik eng' taitap piigap Israel, ko uu ye kamwachi Musa icheek. 13Ki landa murenik eliphuusyek artam che tinyei kariigap lugeet eng' taitap Kwandanyo koba lugeet, koba warengetap Jeriko. 14Eng' peetuunooto, ki iyai Kwandanyo Joshua koek ne oo eng' konyegap Israel tugul; ki iywei icheek ineendet ko uu ye kiga iywei Musa, eng' peetuusyekyik tugul.
15Ki mwachi anyun Kwandanyo Joshua, koleenji,
16“Ng'at tisiik che ibei moingetap paornateet koong'eet kobun Jordan.”
17Ki ng'at anyun Joshua tisiik, koleenji, “Oong'eet kobun Jordan.” 18Ye kingo koong'eet tisiik che ibei moingetap arorutyetap Kwandanyo eng' kwenutap Jordan ak kingo tyech keldoogwak ng'wony ne yaamaat, koweek peegap Jordan koba oldanywa, konyiie kosiir ngeguusyekyik tugul ko uu tai.
19Ki ong'eet piik kobun Jordan eng' peetuut ne po taman ne po arawet ne po tai, ak ki imuung'ee Gilgal, eng' komostap kong'asiis ne po Jeriko. 20Ki tany Joshua koichooto taman ak aeng' eng' Gilgal—che ki nam eng' Jordan. 21Ki leenji piigap Israel, “Eng' peetuusyek che pwoonei, ye tuun teebee lagokwok kwanisyekwak, kole, ‘Po nee koichu?’ 22omwachi lagokwok, kole, ‘Ki landa Israel Jordanini eng' ng'wony ne yaamaat.’ 23Amu ki iyaam Kwandang'wong' peegap Jordan eng' taing'wong' agoi olandae, ko uu ye ki iyaam Kwandang'wong' Araraita ne Piriir eng' tainnyo agoi kelandae, 24si kobiit konai piik tugul che po ng'wony kole, oo eunegap Kwandanyo, ak si koiywei okweek Kwandang'wong' kotugul.”