Mi eng' bukuit

Joshua 3 FHB Father's Heart Bible™

Kiistoi 15% eng' kiy ne iale korook →
Bukuit

Kondoe Kwanda Israel kolandae Jordan

Kanyiisyen peegap Jordan ak koombeny, ak ma kigobwa piik ooreeni kiny. Mwaei Kwandanyo tisiik si koip moingetap arorutyet koba peek, ak ye kagotuch keelyekwak peek kityo kotononse araraita. Kolanda pororyet tugul eng' ng'wony ne yaam.

Ng'alaali Kwandanyo eng' mustarisyek 7–8

Sura 3.

Ki ng'eet Joshua karon, ak ki pa ineendet ak Israel tugul eng' Shitim, ak koit Jordan, ak ki imuung'ee olooto kota ko tomo kolanda. Kingo pata peetuusyek somok, kibwanunde kiptainik kwenutap nganaseet, ak kong'at piik, koleenji, “Ye ogeere moingetap arorutyetap Kwandang'wong' ne ibei tisiik Lawiik, ong'eet eng' ole omite ak osup. Koek kityo ko loo kwenung'wong' ak ineendet, ole uu kakwaet elep somok; mat oriik ineendet, si onai oriit ne owendi, amu ma kiobwanunde oriit ni kota.”

Ki leenji Joshua piik, koleenji, “Otabaangei, amu mutai koyai Kwandanyo kwang'utik eng' kwenung'wong'.” Ki leenji Joshua tisiik, koleenji, “Oip moingetap arorutyet ak olandae eng' taitap piik.” Ki ip anyun icheek moingetap arorutyet ak koba eng' taitap piik.

Ki ng'alaalji Kwandanyo Joshua, koleenji, “Atau ra alasu inyee eng' taitap Israel tugul, si konai keele, ko uu ye ki amiten ak Musa, amiten ak inyee. Ng'at tisiik che ibei moingetap arorutyet, koleenji, ‘Ye oit tabandap peegap Jordan, otononse eng' Jordan.’”

Ki leenji Joshua piigap Israel, koleenji, “Obwa yu ak ogas ng'aleegap Kwandang'wong'.” Ki le Joshua, “Ni ole onaitoe keele mi Kwanda ne sabei eng' kwenung'wong': koon iman eng' taing'wong' Kanaanik, Hitik, Hibik, Perisik, Girgasik, Amorik, kobooto Jebusik. Keero—kolandae moingetap arorutyetap Kiptaiyatap ng'wony tugul eng' taing'wong' koba Jordan. Nguno anyun, olewen piik taman ak aeng' eng' pororyosyegap Israel, mureno agenge eng' pororyet age tugul. Ye kotyech keldebesaigap keelyegap tisiik che ibei moingetap Kwanda Kiptaiyatap ng'wony tugul eng' peegap Jordan, kotil peegap Jordan, peek che punu parak, ak kotonone eng' karurugutyet agenge.”

Ye ki pa piik eng' emaisyekwak si kolandae Jordan, ki ibei tisiik moingetap arorutyet eng' tainnywa, ye koit Jordan che ibei moinget, ak koilee keelyegap tisiik che ibei moinget eng' tabandap peek (amu kong'irtagei Jordan ngeguusyekyik tugul eng' peetuusyegap kesisyet tugul), kotonone peek che choortoi kobun parak, kotogosta koek karurugutyet agenge, eng' Adam ye loo, nganaseet ne tokyingei Zarethan, ago peek che choortoi kwo nyanjetap Arabah, Araraitap Munyuk, kotil kiwong'u. Ki landa anyun piik ne tokyingei Jeriko. a a v16 Adam ko nganaseet ne mi ainetap Jordan, ma ko chiito ne kiguure Adam eng' Bukuit ne Tiliil. Eng' ng'aleekap Heberek: Araraitap Munyuk. Ki tonone tisiik che ibei moingetap arorutyetap Kwandanyo komyee eng' emet ne yaamaat eng' kwenutap Jordan, ye kilandoe Israel tugul eng' emet ne yaamaat, agoi kolanda pororyet tugul eng' Jordan.