Bouei Israelbü Jordan dantida
Jordan dei pihban kikei, hoba müt shuongei ho lam shaanga toukei adankei. Seneibü Bouei ungshedbou shuong to, theyolanyobü Busen lengan dei maang to paiashi dogo laukei, hoba haoeneibü you dei to nyangbü chaloutham dei loan kiteikei. Mütshuong pendou kaolin to dankei.
3 1Joshua ngeyang enyu pikei, hoba hao hoba Israelbü pendou Shittim ka meimeijung hauan Jordan to loukei, hoba haoen adansühtoua khünei shaikei. 2Hobaje chalou sem kian leiyeibü shuongei shaishang maang ka haukei, 3hoba mütli la sakkuko laukei, “Kanei kaneibü Bou theyolanyobü Busen Levi ungshedbou shuongei lengbü haplaje, kaneibü loshang ka kukan kho phai semashi. 4Lankei kan si kho kanglanga saan loan kiteiashi, takan ka hajar sem an; kho to nyangko telou, kanei haula lam ngela shanga, aishanga kanei ho lam shaanga adankei.”
5Joshuaei mütli to laukei, “Kan lulu saopobou yeiashi, ngiet seneibü Bouei kan maanga seikümseilei kümlabü.” 6Kheijinei Joshuaei ungshedbou shuong to laukei, “Theyolanyobü Busen lengan mütli thedangto danjung haushi.” Hibü haoenei theyolanyobü Busen lengan mütli thedang ka haukei.
7Seneibü Bouei Joshua to laukei, “Tat ngei Israelbü pendou thedanga no yaangentila khangda, ngei Mosa yoa kikei tegü, ka yoa kilabü dogo haoenei ngela shanga. 8Theyolanyobü Busen lengbü ungshedbou shuong la ngühkhüm kushi, ‘Kanei Jordan dei thonbü to loulaje, Jordana loan kiteiashi.’”
9Joshuaei Israelbü to laukei, “Hibü louan kaneibü Bou ngüh ditashi.” 10Joshuaei laukei, “Kanei ho danko langkei Bou kan maanga ki dogo ngelabü: haoei maimaitham kan thedang ka Kananbü, Hitbü, Hivbü, Perizbü, Girgasbü, Amorbü, hoba Jebusbü shian sattilabü. 11Chühashi, kaodak pendou Bunyuboueibü theyolanyobü Busen kan thedang ka Jordan to danjung hauda. 12Tou Israelbü chung ka müt anthüknyi pienashi, chung weko ka müt che che. 13Kheijinei kaodak pendou Saopobü Boueibü Busen lengbü ungshedbou shuongeibü you phanga Jordan deia lojinlaje, Jordan dei janyinan aplabü, thükae ka kou longbü dei ongshai che tegü lolabü.”
14Hobaje ladang mütshuong Jordan danla shanga haoeneibü neichem ka meimeikei, ungshedbou shuongei theyolanyobü Busen haoen thedang ka lengkei, 15Busen lengbü shuong Jordan to loulaje, hoba Busen lengbü ungshedbou shuongeibü you dei thonbüa jukettilaje (aishanga youlat chalou pendoua Jordan yungko pendou kho sopbo koukei), 16thüka ka kou longbü dei, saabüa Zarethan nyangko kibü sangnyu Adama ongshai che tegü angan lokei; lausikei Araba Yungnyu, kho Jemdei Yungnyu to kou yanbü dei lepde janyinan apbei. Hibü mütshuong Jerikho thedanga dankei. a a v16 Adam kho Jordan shumanga kibü sangnyu che ki, Lai Saopobüa kibü müt aying. Hibru ngüha: Chü Yungnyu. 17Seneibü Boueibü theyolanyobü Busen lengbü ungshedbou shuong Jordan maanga kao ulangbüa loan kiteikei, hoba Israelbü pendouei kao ulangbüa dankei, phang pendouei Jordan kho lepde danbü sühko.
