Joshua 3 FHB Father's Heart Bible™

3 ¹Joshua phojur te uthise, aru tai aru sob Israel khan Shittim pora rowana hoi kene, Jordan nodi te punchise, aru paar nohokai age te ta te tambu lagai thakise. ²Tin din pichete adhikari khan tambu khan laga majot pora berai jaise, ³aru manuh khan ke hukum dise: “Jitia tumikhan Levi laga purohit khan pora bhukai thaka tumar Pitri laga vachan laga sinduk ke dikhibo, titia nijor jagah chari kene eitu laga pichete jabi. ⁴Khali tumikhan aru eitu laga majot te dur rakhibi, naph kori kene prai 3,000 feet nisina; eitu usorte na-ahhibi, titia tumikhan jabole rasta jani bo paribo, kilemane tumikhan age te eneka rasta pora kitia bhi jua nai.”

⁵Joshua pora manuh khan ke koise, “Nijor ke pobitro koribi—kali amar Pitri pora tumikhan majot te aschorjo kaam khan koribo.” ⁶Titia Joshua pora purohit khan ke koise, “Vachan laga sinduk uthai loi kene manuh khan laga age te paar hoi jabi.” Titia tarkhan vachan laga sinduk uthai loise, aru manuh khan laga age te jaise.

⁷Amar Pitri pora Joshua ke koise, “Aji Moi sob Israel laga age te tumi ke dangor kori bole shuru koribo, titia tarkhan janibo je Moi Moses logot thaka nisina, Moi tumi logot thakibo. ⁸Vachan laga sinduk bhukai thaka purohit khan ke hukum dibi: ‘Jitia tumikhan Jordan laga pani laga kinar te punchibo, titia Jordan te chup-chap rukhi thakibi.’”

⁹Joshua pora Israel laga manuh khan ke koise, “Yate ahhibi aru tumar Pitri laga kotha khan huni bi.” ¹⁰Joshua pora koise, “Eneka kori kene tumikhan janibo je jivit Pitri tumikhan majot te ase: Tai hosa pora tumikhan laga age pora Kanaani, Hitti, Hivi, Perizzi, Girgashi, Amori, aru Jebusi khan ke khedai dibo. ¹¹Sabi—sob prithibi laga Malik laga vachan laga sinduk tumikhan laga age te Jordan laga bhitor te paar hoi jai ase. ¹²Etiya titia, Israel laga bongsho khan pora baro-jon manuh basi lobi, ekta bongsho pora ekjon manuh. ¹³Jitia sob prithibi laga Malik Pitri laga sinduk bhukai thaka purohit khan laga theng laga tola Jordan laga pani te rukhibo, titia Jordan laga pani kati jabo—uporte pora boi aha pani—aru ekta dhip hoi kene rukhibo.”

¹⁴Jitia manuh khan Jordan paar koribole nijor tambu khan chari dise, titia purohit khan tarkhan laga age te vachan laga sinduk bhukai loise, ¹⁵jitia sinduk bhukai thaka khan Jordan te punchise, aru sinduk bhukai thaka purohit khan laga theng pani laga kinar te dhubi jaise (kilemane dhaan kata sob din khan te Jordan tar sob kinar paar kori bohi jai), ¹⁶uporte pora boi aha pani rukhi jaise, aru Zarethan usorte thaka Adam sheher te bisi dur te ekta dhip hoi kene uthise, aru Arabah laga Samundar, Mora Samundar phale boi jua pani pura kati jaise. Titia manuh khan Jericho laga samne te paar hoise. ^a a v16 Adam tu Jordan Nodi uporte thaka ekta sheher ase, Bible laga manuh nohoi. Ibrani bhasa te: Nimok laga Samundar. ¹⁷Amar Pitri laga vachan laga sinduk bhukai thaka purohit khan Jordan laga majot te sukha mati te mojbut hoi kene khara hoise, aru sob Israel sukha mati pora paar hoise, jitia tak pura desh Jordan paar kori kene khotom nohoise.