Avāna Israelli Jordan Kānkā Ngasaka
Jordan tuina kachungkhai kala mithumna hi langli ālākha makaoda. Ithumwui Avāna purohitthumli sanduk phaira tuili chāthangla da haikhai, kala athumwui khongna tui kakhakhai eina chuhla tuiluikhai kachāt khaisho. Khararā ramyar ram kaphaoli karāhai.
3 1Joshuana ngathorthak thuida, ana kala Israel saikorana Shittimwui eina zatphokta, Jordanli vāshunglaga, kānkā mamānda chili rāmrah vasāpama. 2Zimiksho kathum sha̱kha shānglaga, otva̱bingna rāmrah alungli ngaruivai, 3kala mibingli kasoi, "Levi pāngmonbingna nathumwui Avāwui tuingashit oko phungkazata nathumna kathei tharan, nathumwui apam chihohailaga chiwui thi shurlu. 4Kha nathum eina chiwui ngachaili asānli feet thingkathum shakha katāda leiranu; chili manganailu. Kaja nathumna hi shongfa sāngngarānda mashongkaza̱; chieina nathumna vāki shongfa theipaira."
5Joshuana mibingli hānga, "Nathum khalatta tharchigatkhuilu, kaja akhama ithumwui Avāna nathumwui ngachaili matakhak kahai ot sāra." 6Chiwui thili Joshuana pāngmonbingli hānga, "Tuingashit oko chi khuiphunglaga mibingwui mangāli kānkalu." Chieina athumna tuingashit oko chi khuiphunglaga mibingwui mangāli vai.
7Ithumwui Avāna Joshuali hānga, "Aja zimiksho, Israel saikorawui miktāli nali masot chikat khavai ina zanga, chieina ina Moses khangaso leisa thāda, na khangaso leira kaji athumna theipaira. 8Tuingashit oko phungkazata pāngmonbingli kasolu, 'Nathumna Jordan tara̱wui ayarli vāshung tharan, Jordanli nganinglu.'"
9Joshuana Israelwui mibingli hānga, "Hili rālu kala nathumwui Avāwui tui nganālu." 10Joshuana hānga, "Hi eina nathumna kharinga Avā nathumwui ngachaili lei kaji theipaira: ana kachangkhat eina nathumwui miktāli Canaannaobing, Hitnaobing, Hivnaobing, Periznaobing, Girgashnaobing, Amornaobing, kala Jebusnaobing, athumli kashamshokra. 11Yanglu, okathui huptawui Awungawui tuingashit oko chi nathumwui mangāli Jordanli kānkāra. 12Ara, Israelwui shang-shangwui eina mi ava̱va̱, mi tharāda khani pangkhuilu. 13Okathui huptawui Awunga Avāwui oko phungkazata pāngmonbingwui pheimayā Jordanwui tara̱li khaning tharan, atungshong eina longkashoka Jordanwui tara̱ chi katathaida ngaror akha ngasāda nganingra."
14Mibingna Jordan kānkā khavai athumwui kachonshim chihohai tharan, pāngmonbingna tuingashit oko chi athumwui mangāli phungda vai, 15oko phungkazatabing Jordanli vāshung tharan, kala oko phungkazata pāngmonbingwui phei tara̱wui ayarli rurhaowa (kaja Jordanna māhā zimiksho peida awui kongphei katonga eina pemtha̱haowa), 16atungshong eina longkashoka tara̱ chi nganinga, katāva̱li Zarethan ngalemwui keinung Adamli ngaror akha ngasāda ngakarhaowa; kha Arabah Ngayi, chiya Thikahai Ngayili longtunga tara̱ chi katatserhaowa. Chieina mibingna Jericholi kāroda kānkā. a a v16 Adam hi Jordan Kongwui khalei keinung akhana, lairik katharali khalei mi Adam chi maningmana. Hebrew tuili: Salt Sea. 17Israel saikorana katheng ngaleili kānkāda yur katonga chi Jordan mamakānseranglakha eina tangda, ithumwui Avāwui tuingashit oko phungkazata pāngmonbing Jordan alungthungli katheng ngaleili nganinga.
