پلار اِسرائيل د اُردن نه پورې وباسى

اُردن سیند په سیلاب کې دی او خلک مخکې هیڅکله له دې لارې نه دي تېر شوي. زموږ پلار کاهنانو ته وايي چې صندوق پورته کړي او اوبو ته ننوځي، او یوازې کله چې د هغوی پښې اوبو ته ورسېږي سیند ودرېږي او ټولېږي. ټول قوم په وچه ځمکه تېرېږي.

څپرکی 3.

يوشع سحر وختى پاڅېدو، او هغه او ټول اِسرائيل د شطيم نه روان شول، اُردن ته ورسېدل، او د پورې وتلو نه مخکښې هلته يې خېمې ولګولې. درې ورځې پس سردارانو د لښکرګاه په مينځ کښې تاؤ وکړو، او خلقو ته يې حُکم وکړو چې، ”کله چې تاسو د خپل پلار د لوظ صندوق ووينئ چې لاوى کاهنان يې اوچتوى، نو خپل ځائ پرېږدئ او د هغۀ پسې روان شئ. خو د ځان او د هغۀ په مينځ کښې فاصله وساتئ، نژدې درې زره فُوټه په اندازه؛ هغۀ ته مۀ ورنژدې کېږئ، دې دپاره چې تاسو هغه لاره وپېژنئ چې پرې ځئ، ځکه چې تاسو مخکښې هيچرې په دې لاره نۀ يئ تللى.“

يوشع خلقو ته ووئيل چې، ”ځانونه پاک کړئ، ځکه چې سبا به زمونږ پلار ستاسو په مينځ کښې عجائبات ښکاره کوى.“ بيا يوشع کاهنانو ته ووئيل چې، ”د لوظ صندوق اوچت کړئ او د خلقو نه مخکښې پورې وځئ.“ نو هغوئ د لوظ صندوق اوچت کړو او د خلقو نه مخکښې لاړل.

زمونږ پلار يوشع ته وفرمائيل چې، ”نن به زۀ تا د ټول اِسرائيل په نظر کښې لوئ کول شروع کړم، دې دپاره چې هغوئ پوهه شى چې لکه څنګه چې زۀ د موسىٰ سره وم، هم هغه شان به زۀ ستا سره يم. هغه کاهنانو ته حُکم وکړه چې د لوظ صندوق اوچتوى چې، ’کله چې تاسو د اُردن د اوبو غاړې ته ورسئ، نو په اُردن کښې ودرېږئ.‘“

يوشع اِسرائيليانو ته ووئيل چې، ”دلته راشئ او د خپل پلار خبرې واورئ.“ يوشع ووئيل چې، ”په دې به تاسو پوهه شئ چې ژوندے پلار ستاسو په مينځ کښې دے: هغه به خامخا ستاسو د مخې نه کنعانيان، حِتيان، حِويان، فرِزيان، جِرجاشيان، اموريان او يبوسيان وشړى. وګورئ، د ټولې زمکې د مالِک د لوظ صندوق ستاسو نه مخکښې اُردن ته پورې ځى. نو اوس د اِسرائيل د قبيلو نه دولس سړى غوره کړئ، د هرې قبيلې نه يو سړے. کله چې د هغه کاهنانو د پښو تلى چې د ټولې زمکې د مالِک پلار صندوق اوچتوى د اُردن په اوبو کښې کېنى، نو د اُردن اوبۀ به پرې شى، هغه اوبۀ چې د پاسه نه راروانې دى، او په يوه ډېرۍ کښې به ودرېږى.“

کله چې خلق د اُردن د پورې وتلو دپاره د خپلو خېمو نه روان شول، نو کاهنانو د لوظ صندوق د هغوئ نه مخکښې اوچت کړے وو، او کله چې هغه کاهنان چې صندوق يې اوچت کړے وو اُردن ته ورسېدل، او د هغه کاهنانو پښې چې صندوق يې اوچت کړے وو د اوبو غاړې ته کېنوتې (ځکه چې اُردن د لو د ټولو ورځو په دوران کښې په خپلو ټولو غاړو باندې راوځى)، نو هغه اوبۀ چې د پاسه نه راروانې وې ودرېدلې، او د ادم په خوا کښې چې د ضرتان نژدې ښار دے په يوه ډېرۍ کښې لرې اوچتې شوې، او هغه اوبۀ چې د عربې سمندر يعنې مړ سمندر ته راروانې وې بالکل پرې شوې. نو خلق د يريحو مخامخ پورې لاړل. ^a هغه کاهنان چې د زمونږ پلار د لوظ صندوق يې اوچت کړے وو د اُردن په مينځ کښې په وچه زمکه مضبوط ودرېدل، او ټول اِسرائيل په وچه زمکه پورې شو، ترڅو چې ټول قوم د اُردن د پورې وتلو نه فارغ شو.