ኢያሱ 3

3 ¹ኢያሱም ማልዶ ተነሣ፤ እርሱና እስራኤል ሁሉ ከሰጢም ተነሥተው ወደ ዮርዳኖስ ደረሱ፤ ሳይሻገሩም በዚያ ሰፈሩ። ²ከሦስት ቀን በኋላም መኰንኖቹ በሰፈሩ ውስጥ አለፉ፤ ³ሕዝቡንም እንዲህ ብለው አዘዟቸው፤ “የአባታችሁን የኪዳን ታቦት ሌዋውያን ካህናት ተሸክመውት ባያችሁ ጊዜ፣ ከስፍራችሁ ተነሥታችሁ ተከተሉት። ⁴በእናንተና በእርሱ መካከል ግን ርቀት አኑሩ፤ በመለኪያ ሦስት ሺህ ጫማ ያህል ይሁን፤ ይህን መንገድ ከዚህ በፊት ሄዳችሁበት አታውቁምና የምትሄዱበትን መንገድ ታውቁ ዘንድ ወደ እርሱ አትቅረቡ።”

⁵ኢያሱም ሕዝቡን፣ “ራሳችሁን ቀድሱ፤ ነገ አባታችን በመካከላችሁ ድንቅ ነገር ያደርጋልና” አላቸው። ⁶ከዚያም ኢያሱ ካህናቱን፣ “የኪዳኑን ታቦት ተሸክማችሁ ከሕዝቡ በፊት ተሻገሩ” አላቸው። እነርሱም የኪዳኑን ታቦት ተሸክመው ከሕዝቡ በፊት ሄዱ።

⁷አባታችንም ኢያሱን እንዲህ አለው፤ “ከሙሴ ጋር እንደ ነበርሁ ከአንተም ጋር እንደ ምሆን ያውቁ ዘንድ፣ ዛሬ በእስራኤል ሁሉ ፊት ከፍ ከፍ ላደርግህ እጀምራለሁ። ⁸የኪዳኑን ታቦት የተሸከሙትን ካህናት፣ ‘የዮርዳኖስን ውሃ ዳር በደረሳችሁ ጊዜ፣ በዮርዳኖስ ውስጥ ቁሙ’ ብለህ እዘዛቸው።”

⁹ኢያሱም እስራኤላውያንን፣ “ወደዚህ ቅረቡና የአባታችሁን ቃል ስሙ” አላቸው። ¹⁰ኢያሱም እንዲህ አለ፤ “ሕያው አባት በመካከላችሁ እንዳለ በዚህ ታውቃላችሁ፤ ከነዓናውያንን፣ ኬጢያውያንን፣ ኤዊያውያንን፣ ፌርዛውያንን፣ ጌርጌሳውያንን፣ አሞራውያንንና ኢያቡሳውያንን ከፊታችሁ በእርግጥ ያባርራል። ¹¹እነሆ፣ የምድር ሁሉ ጌታ የኪዳን ታቦት ከፊታችሁ ወደ ዮርዳኖስ ይሻገራል። ¹²እንግዲህ ከእስራኤል ነገዶች ዐሥራ ሁለት ሰዎችን ምረጡ፤ ከእያንዳንዱ ነገድ አንድ ሰው ይሁን። ¹³የምድር ሁሉ ጌታ የሆነውን የአባትን ታቦት የተሸከሙት ካህናት የእግራቸው ጫማ በዮርዳኖስ ውሃ ውስጥ ባረፈ ጊዜ፣ የዮርዳኖስ ውሃ፣ ከላይ የሚፈሰው ውሃ፣ ተቋርጦ እንደ አንድ ክምር ሆኖ ይቆማል።”

¹⁴ሕዝቡም ዮርዳኖስን ሊሻገሩ ከድንኳኖቻቸው በተነሡ ጊዜ፣ ካህናቱ የኪዳኑን ታቦት ተሸክመው ከፊታቸው ሄዱ፤ ¹⁵ታቦቱን የተሸከሙት ወደ ዮርዳኖስ ደረሱ፤ ታቦቱን የተሸከሙት የካህናት እግሮች የውሃውን ዳር በነኩ ጊዜ፣ (ዮርዳኖስ በመከር ወራት ሁሉ ዳርቻውን ሁሉ ይሞላልና) ¹⁶ከላይ የሚወርደው ውሃ ቆመ፤ ከጸረታን አጠገብ ባለችው ከተማ በአዳም አካባቢ ርቆ እንደ አንድ ክምር ሆኖ ተነሣ፤ ወደ ዓረባ ባሕር፣ ወደ ሙት ባሕር፣ የሚወርደው ውሃ ፈጽሞ ተቋረጠ። ሕዝቡም በኢያሪኮ ትይዩ ተሻገሩ። ^a a v16 አዳም በዮርዳኖስ ወንዝ ላይ ያለች ከተማ ናት እንጂ በመጽሐፍ ቅዱስ የተጠቀሰው ሰው አይደለም። በዕብራይስጥ፦ የጨው ባሕር። ¹⁷የአባታችንን የኪዳን ታቦት የተሸከሙት ካህናት በዮርዳኖስ መካከል በደረቅ መሬት ላይ ጸንተው ቆሙ፤ ሕዝቡ ሁሉ ዮርዳኖስን ተሻግሮ እስኪጨርስ ድረስ፣ እስራኤል ሁሉ በደረቅ መሬት ተሻገሩ።