Indauloan ti Ama ti Israel a Lumasat iti Karayan Jordan

Napunno ti Jordan ket saan pay a naglasat iti daytoy a dalan dagiti tao. Ibaga ni Amatayo kadagiti papadi a sumrek iti danum nga awitenda ti lakasa, ket kabayatan laeng a mangsagid dagiti sakada iti daytoy agbunton ti karayan. Lumasat ti intero a nasion iti namaga a daga.

Agsao ni Amatayo kadagiti bersikulo 7–8

Kapitulo 3.

Bimmangon a nasapa ni Josue, ket isuna ken amin nga Israelita pimmanaw idiay Sittim, nakadanonda iti Jordan, ket nagkampoda sadiay sakbay a lumasatda. Kalpasan ti tallo nga aldaw, linawlawan dagiti opisial ti kampo, ket imbilinda kadagiti tattao, “Inton makitayo ti lakasa ti tulag ni Amayo a bagbagkaten dagiti papadi a Levita, panawanyo ti lugaryo ket surotenyo. Ngem agbayatkayo iti pagilet nga agarup 3,000 a tapak ti sukat iti nagbaetan dakayo ken daytoy; dikay umasideg, tapno maammoanyo ti dalan nga papanan, ta saanyo pay a pulos a nagnaan daytoy a dalan.”

Kinuna ni Josue kadagiti tattao, “Ilasinyo ti bagiyo—inton bigat aramiden ni Amatayo dagiti nakaskasdaaw a banag iti nagbaetanyo.” Kalpasanna, kinuna ni Josue kadagiti papadi, “Bagkatenyo ti lakasa ti tulag ket lumasatkayo iti sangoanan dagiti tattao.” Isu a binagkatda ti lakasa ti tulag ket immunada iti sangoanan dagiti tattao.

Kinuna ni Amatayo ken ni Josue, “Ita nga aldaw, irugik ti panangitan-oktayo kenka iti sangoanan ti entero nga Israel, tapno ammoda a kas iti kinaaddak ken ni Moises, addaakto met kenka. Ibilinmo kadagiti papadi a mangbagkat iti lakasa ti tulag: ‘Inton makadanonkayo iti igid ti danum ti Jordan, agtakderkayo iti Jordan.’”

Kinuna ni Josue kadagiti Israelita, “Umaykayo ditoy ket denggenyo dagiti sasao ni Amayo.” Kinuna ni Josue, “Iti daytoy maammoanyo nga adda ti sibibiag nga Ama iti nagbaetanyo: pudno a papanawenna iti sangoananyo dagiti Canaanita, Heteo, Heveo, Perezeo, Gergeseo, Amoreo, ken Jebuseo. Kitaenyo—ti lakasa ti tulag ti Apo ti entero a daga ket lumasat iti sangoananyo a mapan iti Jordan. Ita ngarud, mangpilikayo iti sagpulo ket dua a lallaki manipud kadagiti tribu ti Israel, maysa a lalaki iti tunggal tribu. Inton dumanon ken sumango ti dapan dagiti papadi a mangbagkat iti lakasa ni Apo nga Ama ti entero a daga iti danum ti Jordan, maputed ti danum ti Jordan—ti danum nga umay manipud ngato—ket agtakder a kas maysa a bunton.”

Idi pimmanaw dagiti tattao kadagiti toldada tapno lumasatda iti Jordan, binagkat dagiti papadi ti lakasa ti tulag iti sangoananda, ket idi dimmanon iti Jordan dagiti nagbagkat iti lakasa, ken nasaplit iti igid ti danum dagiti saka dagiti papadi a nagbagkat iti lakasa (ta aglayus ti Jordan iti amin nga igidna iti amin nga aldaw ti panagani), nagtakder ti danum nga umay manipud ngato ket nagbunton iti adayo idiay Adam, ti siudad iti asideg ti Zaretan, bayat a ti danum nga agpababa iti Baybay ti Araba, ti Baybay a Natay, ket naputed a naan-anay. Isu a limmasat dagiti tattao iti sangoanan ti Jerico. ^a Nagtakder a natibker dagiti papadi a mangbagkat iti lakasa ti tulag ni Amatayo iti namaga a daga iti tengnga ti Jordan, bayat a limmasat ti entero nga Israel iti namaga a daga agingga a nalpas a limmasat ti entero a nasion iti Jordan.