ኢያሱ 3 FHB Father's Heart Bible™

3 ¹ኢያሱ ኣንጊሁ ተስአ፤ ንሱን ኵሉ ህዝቢ እስራኤልን ከዓ ካብ ሽጢም ተልዒሎም ናብ ዮርዳኖስ በፂሖም፥ ከይተሳገሩ ኣብኡ ሰፈሩ። ²ድሕሪ ሰለስተ መዓልቲ ድማ እቶም ኣሕሉቕ ብማእኸል እቲ ሰፈር ሓለፉ፥ ³ነቲ ህዝቢ ድማ ከምዙይ ኢሎም ኣዘዝዎም፦ “ነቲ ታቦት ኪዳን ኣቦኻትኩም እቶም ሌዋውያን ዝኾኑ ካህናት ፆይሮም ምስ ረኣኹምዎ፥ ካብ ቦታኹም ተልዒልኩም ስዓብዎ። ⁴ግና ኣብ መንጎኹምን ኣብ መንጎኡን ርሕቐት ይኹን፤ ኣስታት ሰለስተ ሽሕ ጫማ ብመጠን ይኹን፤ ነዛ መንገዲ እዚኣ ካብ ቅድሚ ሕዚ ሓሊፍኩማ ኣይትፈልጡን ኢኹም እሞ፥ እታ እትኸድዋ መንገዲ ምእንቲ ኽትፈልጡ፥ ናብኡ ኣይትቕረቡ።”

⁵ኢያሱ ድማ ነቲ ህዝቢ “ፅባሕ ኣቦና ኣባኻትኩም ተኣምራት ክገብር እዩ እሞ፥ ንባዕልኻትኩም ቀድሱ” በሎም። ⁶ሽዑ ኢያሱ ነቶም ካህናት “ነቲ ታቦት ኪዳን ፆሩ እሞ ቀቅድሚ እቲ ህዝቢ ተሳገሩ” በሎም። ንሳቶም ድማ ነቲ ታቦት ኪዳን ፆይሮም ቀቅድሚ እቲ ህዝቢ ኸዱ።

⁷ኣቦና ንኢያሱ ከምዙይ በሎ፦ “ከምቲ ምስ ሙሴ ዝነበርኩ ምሳኻ ኸም ዝህሉ ምእንቲ ኽፈልጡ፥ ሎሚ ኣብ ቅድሚ ኵሉ እስራኤል ልዕል ልዕል ከብለካ ክጅምር እየ። ⁸ነቶም ታቦት ኪዳን ዝፆሩ ካህናት ድማ ‘ናብ ወሰን ማይ ዮርዳኖስ ምስ በፃሕኹም፥ ኣብ ዮርዳኖስ ደው በሉ’ ኢልካ ኣዝዞም።”

⁹ኢያሱ ድማ ንደቂ እስራኤል “ናብዙይ ቅረቡ እሞ ቃል ኣቦኻትኩም ስምዑ” በሎም። ¹⁰ኢያሱ ኸዓ ከምዙይ በለ፦ “ህያው ኣቦ ኣብ ማእኸልኩም ከም ዘሎ ብእዙይ ክትፈልጡ ኢኹም፦ ንሱ ነቶም ከነዓናውያንን ኬጢያውያንን ሔዋውያንን ፈሪዛውያንን ጌርጌሳውያንን ኣሞራውያንን ኢያቡሳውያንን ካብ ቅድሜኹም ብርግፅ ከሳጕጎም እዩ። ¹¹እንሆ፥ ታቦት ኪዳን ጐይታ ኵሉ ምድሪ ቀቅድሜኹም ናብ ዮርዳኖስ ይሳገር ኣሎ። ¹²ሕዚ እምበኣር ካብ ነገዳት እስራኤል ዓሰርተ ኽልተ ሰባት፥ ከካብ ነገድ ሓድሓደ ሰብ፥ ምረፁ። ¹³ከብዲ ኣእጋር እቶም ታቦት ጐይታ ኣቦ ኵሉ ምድሪ ዝፆሩ ካህናት ኣብ ማይ ዮርዳኖስ ምስ ረገፀ፥ እቲ ካብ ላዕሊ ዝውሕዝ ማይ ዮርዳኖስ ክቕረፅ እዩ፤ ኣብ ሓደ ኵምራ ኸዓ ደው ክብል እዩ።”

¹⁴እቲ ህዝቢ ንዮርዳኖስ ክሳገር ካብ ድንኳናቶም ምስ ተልዓለ፥ እቶም ካህናት ነቲ ታቦት ኪዳን ፆይሮም ቀቅድሚኦም ከዱ፤ ¹⁵እቶም ታቦት ዝፆሩ ናብ ዮርዳኖስ ምስ በፅሑ፥ ኣእጋር እቶም ታቦት ዝፆሩ ካህናት ከዓ ኣብ ወሰን እቲ ማይ ተጠልቀ፥ (ዮርዳኖስ ብዅለን መዓልቲታት ዓፂድ ኣፍ ንኣፍ መሊኡ ኵሉ ገምገም ይፈስስ ነበረ እሞ)፥ ¹⁶እቲ ካብ ላዕሊ ዝውሕዝ ማይ ደው በለ፥ ኣብ ርሑቕ ኣብ ኣዳም፥ እታ ኣብ ጥቓ ፃርታን ዘላ ኸተማ፥ ኣብ ሓደ ኵምራ ኾይኑ ተላዕለ፤ እቲ ናብ ባሕሪ ዓረባ፥ ባሕሪ ጨው፥ ዝወርድ ማይ ከዓ ፈፂሙ ተቘረፀ። እቲ ህዝቢ ድማ ኣብ መንፅር ኢያሪኮ ተሳገረ። ^a a v16 ኣዳም ኣብ ፈለግ ዮርዳኖስ ዘላ ኸተማ እያ እምበር፥ እቲ ኣብ መፅሓፍ ቅዱስ ዘሎ ሰብ ኣይኮነን። እብራይስጢ፦ ባሕሪ ጨው። ¹⁷እቶም ታቦት ኪዳን ኣቦና ዝፆሩ ካህናት ኣብ ማእኸል ዮርዳኖስ ኣብ ንቑፅ ምድሪ ፀኒዖም ደው በሉ፤ ኵሉ እስራኤል ድማ ኵሉ እቲ ህዝቢ ንዮርዳኖስ ፈፂሙ ክሳዕ ዝሳገር ኣብ ንቑፅ ምድሪ ተሳገረ።