Tebui Israel Yordan Ajanga Anir Aor
Yordan tzü tulu tokdakba liasü, aser nübur tamasa iba lenmang nungi mesüka marudang. Asen Tebui putirtem dang tezüngzüktepba Ozüng Süngden abena tzü nung tutsü ashi, aser parnok tetsüng tzü nung tatembang tashiji, ayong tzü ajema noktak. Kin ajaki ali takong madang ajanga or.
3 1Yihusuai anepdang yakta sak, aser pa aser Israel ajak Shittim nungi apusoa oa, Yordan tonga aru, aser ajanga marudang yangji anen. 2Anogo asem lir tanishirtemi tanendak tiyong ajanga ao, 3aser nüburtem dang mela-a ashi, “Kodang Levi putirtemi nenok Tebu tezüngzüktepba Ozüng Süngden abenba nenoki angur, nenok talidak toktsür aji sülen anitakang. 4Saka nenok aser aji tsüngda nung tasadangba feet meyirijang asem tatsüka apiga liang; aji anasa marutsüla, nenoki aotsü lenmangji metettsü asoshi, kechiaser nenoki tamasa iba lenmangi mesüka marudang.”
5Yihusuai nüburtem dang ashi, “Nenok sasa meshitetang—asüng asen Tebui nenok rongnung sayatenya tulutem inyaktsü.” 6Idangji Yihusuai putirtem dang ashi, “Tezüngzüktepba Ozüng Süngden benang, aser nüburtem jakdang ajanga oang.” Anungji parnoki tezüngzüktepba Ozüng Süngden abena nüburtem jakdang ao.
7Tebui Yihusua dang ashi, “Tanü ni Israel ajak madang ne ulutsü tenzüktsü, idangji ni Mosa den liasü ama ni ne den alitsü ta parnoki metettsü. 8Tezüngzüktepba Ozüng Süngden abenba putirtem dang melaang, ‘Kodang nenoki Yordan tzü tatembang nung tudir, Yordan nung ajema noktakang.’”
9Yihusuai Israel chirtem dang ashi, “Anasa arung aser nenok Tebu o angang.” 10Yihusuai ashi, “Taküm Tebu nenok rongnung lir ta nenoki yamaji metettsü: pai nenok jakdang Kanan nunger, Het nunger, Hiv nunger, Periz nunger, Girgas nunger, Amor nunger aser Yebus nungertemji atangji aridoktsü. 11Ajiang, alima ajak Kibuba tezüngzüktepba Ozüng Süngden nenok jakdang Yordan nung ajanga aor. 12Tang Israel kidong nungi nisung terana shimtetang, kidong shia nungi nisung ka ka. 13Kodang alima ajak Tebu tezüngzüktepba Ozüng Süngden abenba putirtem tsüng kübok Yordan tzü nung tudir, Yordan tzüji, temalen nungi ayimba tzüji, jentoktsü, aser ka dang mesentepa noktaktsü.”
14Kodang nüburtemi Yordan ajanga otsü asoshi pei süki toktsür ao, putirtemi parnok jakdang tezüngzüktepba Ozüng Süngden aben, 15Süngden abenba putirtem Yordan nung tua, Süngden abenba putirtem tetsüng tzü tatembang nung meten, (kechiaser aluruwa anogo ajak Yordani pei mezüng ajak moshia ayimer), 16temalen nungi ayimba tzüji noktak, oji nung Zarethan anasa aliba Adam yimti nung tali ka ama noktak, aser Araba Tzüyim, aji Metsü Tzüyim, leni ayimba tzüji meshimeshia jentok. Anungji nüburtem Yeriko tsütsü ajanga aru. a a v16 Adam Yordan ayong nung aliba yimti ka lir, Tsüngrem O nung aliba nisung masü. Hibru o nung: Machi Tzüyim. 17asen Tebu tezüngzüktepba Ozüng Süngden abenba putirtem Yordan tiyong ali takong nung akang akanga noktak, aser kin ajongai Yordanji meshi meshia ajang tashi Israel ajak ali takong manung ajanga aru.