UBawo Uwela amaSirayeli ngeYordan

UYordan uzele uphuphuma, yaye abantu abazange bahambe le ndlela ngaphambili. UBawo wethu uxelela ababingeleli ukuba bangene emanzini bethwele ityeya, kuze kuthi xa kuphela iinyawo zabo zichukumisa amanzi, afumbeke umlambo. Lonke uhlanga luwela emhlabeni owomileyo.

Isahluko 3.

Wavuka kwakusasa uYoshuwa, waza yena namaSirayeli onke banduluka eShitim, bafika eYordan, bamisa iintente khona bengekaweli. Emva kweentsuku ezintathu ababhali bacanda eminqubeni, babawisela umthetho abantu, besithi: “Xa niyibone ityeya yomnqophiso kaBawo wenu ithwalwe ngababingeleli abaLevi, nisuke endaweni yenu niyilandele. Noko nize nibe mgama phakathi kwenu nayo, malunga neekubhite ezingamawaka amabini ngomlinganiso; nize ningasondeli kuyo, ukuze niyazi indlela yokuhamba, kuba anizange nihambe le ndlela ngaphambili.”

Wathi uYoshuwa ebantwini: “Zingcwaliseni, kuba ngomso uBawo wethu uya kwenza imimangaliso phakathi kwenu.” Waza uYoshuwa wathi kubabingeleli: “Thabathani ityeya yomnqophiso, niyithwale niwele phambi kwabantu.” Bayithwala ke ityeya leyo yomnqophiso, bahamba phambi kwabantu.

Wathi uBawo wethu kuYoshuwa: “Namhlanje ndiya kuqala ukukuphakamisa phambi kwamaSirayeli onke, ukuze bazi ukuba njengokuba ndandinoMoses, ndiya kuba nawe. Bawisele umthetho ababingeleli abathwele ityeya yomnqophiso, uthi: ‘Nakufika encamini yamanzi aseYordan, nize nime eYordan.’”

Wathi uYoshuwa koonyana bakaSirayeli: “Yizani apha, niphulaphule amazwi kaBawo wenu.” Wathi uYoshuwa: “Niya kwazi ngale nto ukuba uBawo ophilileyo uphakathi kwenu: inene uya kuwagqogqa amaKanan, namaHeti, namaHivi, namaPerizi, namaGirgashi, nama-Amori, namaYebhusi, asuke phambi kwenu. Yabonani, ityeya yomnqophiso yeNkosi yehlabathi lonke iya kuwela phambi kwenu, iye eYordan. Ngoku ke, zikhetheleni amadoda alishumi elinamabini ezizweni zakwaSirayeli, indoda ibe nye esizweni. Kuya kuthi, xa iintende zeenyawo zababingeleli abathwele ityeya yeNkosi uBawo wehlabathi lonke zithe zafika zema emanzini aseYordan, anqunyulwe amanzi aseYordan, lawo abaleka evela ngasentla, eme abe yimfumba-nye.”

Kwathi, xa abantu bephuma ezintenteni zabo ukuba bawele iYordan, ababingeleli abathwele ityeya yomnqophiso behamba phambi kwabo, ekufikeni kwabathwele ityeya eYordan, zathi iinyawo zababingeleli abathwele ityeya zafika encamini yamanzi (kuba iYordan iyazala, iphuphume iindonga zayo zonke ngayo yonke imihla yokuvuna), ema amanzi abaleka evela ngasentla, enyuka esiba yimfumba-nye mgama eAdam, umzi ongaseTsaretan, kwathi amanzi abaleka esihla esiya elwandle lweArabha, uLwandle lweTyuwa, anqanyulwa aphela. Bawela ke abantu malunga neYeriko. ^a Ababingeleli abathwele ityeya yomnqophiso kaBawo wethu bema beqinile emhlabeni owomileyo eYordan phakathi, logama amaSirayeli onke ewela emhlabeni owomileyo, lada uhlanga lonke lugqiba ukuyiwela iYordan.