ኢያሱ 2 FHB Father's Heart Bible™

2 ¹ኢያሱ ወዲ ነዌ ድማ ካብ ሽጢም ክልተ ሰብኡት ብሕቡእ ዝስልሉ ሰደደ፦ “ኪዱ፥ ነታ ምድሪ፥ ኣውራ ኸዓ ንኢያሪኮ ስለልዋ።” ንሳቶም ድማ ከይዶም ረኣብ ናብ እትብሃል ኣመንዝራ ገዛ ኣተዉ፤ ኣብኡ ኸዓ ሓደሩ።

²ንጉስ ኢያሪኮ ኸዓ “እንሆ፥ ነታ ምድሪ ኽስልሉ፥ በዛ ለይቲ እዚኣ ካብ ደቂ እስራኤል ሰብኡት ናብዙይ መፂኦም” ኢሎም ነገርዎ።

³ንጉስ ኢያሪኮ ድማ ናብ ረኣብ ለኣኸ፦ “ነቶም ናባኺ መፂኦም ናብ ገዛኺ ዝኣተዉ ሰብኡት ኣውፅእዮም፤ ንዅላ እታ ምድሪ ኽስልሉ መፂኦም እዮም እሞ።”

⁴እታ ሰበይቲ ግና ነቶም ክልተ ሰብኡት ወሲዳ ሓብአቶም፤ ከምዙይ ከዓ በለት፦ “እወ፥ እቶም ሰብኡት ናባይ መፂኦም ነይሮም፥ ካበይ ከም ዝመፁ ግና ኣይፈለጥኩን። ⁵ኣብ ፀልማት፥ እቲ ደገ ኽዕፀው እንተሎ፥ እቶም ሰብኡት ወፁ። እቶም ሰብኡት ናበይ ከም ዝኸዱ ኣይፈልጥን እየ። ክተርክብዎም ኢኹም እሞ፥ ቀልጢፍኩም ስዓብዎም።” ⁶ንሳ ግና ናብ ናሕሲ ኣደዪባ፥ ኣብቲ ኣብ ናሕሲ ዝዘርግሐቶ እንጣጢዕ ሓብአቶም። ⁷እቶም ሰብኡት ድማ ብመንገዲ ዮርዳኖስ ክሳዕ መሳገሪታት ሰዓብዎም፤ እቶም ሰዓብቲ ምስ ወፁ ኸዓ፥ እቲ ደገ ተዓፅወ።

⁸እቶም ሰለልቲ ቅድሚ ምድቃሶም ድማ፥ ረኣብ ናብኣቶም ናብ ናሕሲ ደየበት፤ ⁹ከምዙይ ከዓ በለቶም፦ “እግዚኣብሄር ነዛ ምድሪ ኸም ዝሃበኩም፥ ራዕድኹም ከዓ ኣባና ኸም ዝወደቐ፥ ኣብዛ ምድሪ ዝነብሩ ዅሎም ከዓ ኣብ ቅድሜኹም ከም ዝመኽኹ እፈልጥ እየ። ¹⁰እግዚኣብሄር ካብ ግብፂ ምስ ወፃእኹም ንባሕሪ ኤርትራ ኣብ ቅድሜኹም ከም ዘንፀፎ፥ ነቶም ኣብ ስግር ዮርዳኖስ ዝነበሩ ክልተ ነገስታት ኣሞራውያን፥ ንሴዎንን ንዖግን ዝገበርኩም፥ ፈፂምኩም ከም ዘጥፋእኩሞም ሰሚዕና ኢና። ¹¹ሰሚዕና ኸዓ ልብና መኸኸ፤ ብሰንክኹም ድማ ኣብ ሓደ እኳ ትብዓት ኣይተረፈን፤ እግዚኣብሄር ኣምላኽኩም ኣብ ላዕሊ ኣብ ሰማይ፥ ኣብ ታሕቲ ኣብ ምድሪ ኣምላኽ እዩ እሞ። ¹²ሕዚ ኸዓ፥ ኣነ ፅቡቕ ስለ ዝገበርኩልኩም፥ ንስኻትኩም ድማ ንቤት ኣቦይ ፅቡቕ ከም እትገብሩ፥ በይዛኻትኩም ብእግዚኣብሄር ምሓሉለይ፤ እሙን ምልክትውን ሃቡኒ፤ ¹³ንኣቦይን ኣደይን ኣሕዋተይን ኣሓተይን ንዅሎም ናታቶም ዝኾኑን ብህይወት ክትገድፉ፥ ንነፍስናውን ካብ ሞት ከተድሕኑ።”

¹⁴እቶም ሰብኡት ድማ “ነፍስና ኣብ ክንዲ ህይወትኩም ይኹን! ነዚ እንገብሮ ዘለና እንተ ዘይሓበርክዮ፥ ኣቦና ነዛ ምድሪ ምስ ሃበና፥ ርህራሀን ሓቅን ክንገብረልኪ ኢና” በልዋ።

¹⁵ገዛኣ ኣብ መንደቕ እታ ኸተማ ስለ ዝነበረ፥ ንሳ ኣብቲ መንደቕ ትነብር ነበረት እሞ፥ ብመስኮት ብገመድ ኣውረደቶም። ¹⁶ከምዙይ ከዓ በለቶም፦ “እቶም ሰዓብቲ ከይረኽቡኹም፥ ናብ እምባ ኺዱ፤ ክሳዕ ዝምለሱ ኣብኡ ሰለስተ መዓልቲ ተሓብኡ፤ ድሕሪኡ ናብ መንገድኹም ኪዱ።”

¹⁷እቶም ሰብኡት ድማ “ካብዛ ዘምሓልክና ማሕላ እዚኣ ንፁሃት ክንኸውን ኢና፤ ¹⁸ናብዛ ምድሪ ምስ ኣቶና፥ ነዛ ቀይሕ ፈትሊ ኣብቲ ዘውረድክናሉ መስኮት እንተ ዘይኣሰርክዮ፥ ንኣቦኺ፥ ንኣዴኺ፥ ነሕዋትኪ፥ ንዅሉ ቤት ኣቦኺ ኸዓ ናብ ገዛ እንተ ዘይኣከብክዮም፤ ¹⁹ካብ ኣፍ ደገ ገዛኺ ናብ ኣደባባይ ዝወፅእ ዝኾነ ሰብ፥ ደሙ ኣብ ርእሱ ይኹን፤ ንሕና ንፁሃት ኢና። ምሳኺ ኣብ ውሽጢ ዘሎ ሰብ ኢድ እንተ ተንከፎ ግና፥ ደሙ ኣብ ርእስና ይኹን። ²⁰ነዚ እንገብሮ ዘለና እንተ ሓበርኪ ግና፥ ካብታ ዘምሓልክና ማሕላ ንፁሃት ክንኸውን ኢና።”

²¹ንሳ ድማ “ከምቲ እትብልዎ ይኹን” በለት። ሰደደቶም ከዓ፤ ንሳቶም ድማ ከዱ፤ ነታ ቀይሕ ፈትሊ ኣብቲ መስኮት ኣሰረታ።

²²ናብ እምባ ኸዱ፤ ክሳዕ እቶም ሰዓብቲ ዝምለሱ ኸዓ ኣብኡ ሰለስተ መዓልቲ ፀንሑ። እቶም ሰዓብቲ ድማ ንዅላ መንገዲ ደለይዋ፤ ሓንቲ እኳ ኣይረኸቡን። ²³እቶም ክልተ ሰብኡት ድማ ተመሊሶም ካብ እምባ ወሪዶም ተሳገሩ፤ ናብ ኢያሱ ወዲ ነዌ መፂኦም ከዓ፥ እቲ ዝበፅሖም ዅሉ ነገርዎ። ²⁴ንኢያሱ ኸዓ “ኣቦና ብርግፅ ንዅላ እታ ምድሪ ኣብ ኢድና ሂቡና እዩ፤ እቶም ኣብኣ ዝነብሩ ዅሎም ከዓ ብፍርሒ ኣብ ቅድሜና ይመኽኹ ኣለዉ” በልዎ።