ኢያሱ 1 FHB Father's Heart Bible™

1 ¹ባርያ ኣቦና ሙሴ ምስ ሞተ፥ ኣቦና ንኢያሱ ወዲ ነዌ፥ ኣገልጋሊ ሙሴ፥ ከምዙይ በሎ፦

²“ባርያይ ሙሴ ሞይቱ እዩ። ሕዚ ተስእ፤ ንስኻን እዞም ኵሎም ህዝብን ናብታ ኣነ ንደቂ እስራኤል ዝህቦም ዘለኹ ምድሪ ነዝ ዮርዳኖስ ተሳገሩ። ³ከምቲ ንሙሴ ዝተስፈኽዎ፥ ነፍሲ ወከፍ እግርኻ ዝረግፆ ቦታ ንኣኻ ሂበዮ ኣለኹ። ⁴ወሰንካ ካብዝ ምድረ በዳን ካብዝ ሊባኖስ እዙይን ክሳዕ እቲ ዓብዪ ሩባ ኤፍራጥስ፥ ኵላ ምድሪ ኬጢያውያንን ክሳዕ እቲ ዓብዪ ባሕሪ ብወገን ምዕራብ ፀሓይን ይኸውን። ⁵ኣብ ኵሉ ዘመን ህይወትካ ኣብ ቅድሜኻ ደው ዝብል ሰብ የለን። ከምቲ ምስ ሙሴ ዝነበርኩ፥ ምሳኻ ክኸውን እየ፤ ኣይጠልመካን፤ ኣይሓድገካንውን እየ።

⁶“ፅኑዕን ተባዕን ኩን፤ ነዝ ህዝቢ እዙይ ናብታ ኣነ ነቦታቶም ክህቦም ዝመሓልኩሎም ምድሪ ኽተውርሶም ኢኻ እሞ። ⁷ጥራሕ ፅኑዕን የመና ተባዕን ኩን፤ እቲ ባርያይ ሙሴ ዝኣዘዘካ ዅሉ ሕጊ ተጠንቂቕካ ኽትሕልዎ ተኣዘዞ። ኣብ ዝኸድካዮ ዅሉ ምእንቲ ኽትዕወት፥ ካብኡ ናብ የማን ወይ ናብ ፀጋም ኣይትዘንብል። ⁸እዝ መፅሓፍ ሕጊ እዙይ ካብ ከናፍርካ ኣይፈለ፤ ኣብኡ ዝተፅሓፈ ዅሉ ተጠንቂቕካ ኽትገብሮ፥ ብመዓልትን ብለይትን ኣብኡ ሕሰብ። ሽዑ መንገድኻ ይቕናዕ፥ ትዕወትውን። ⁹ኣነዶ ኣይኣዘዝኩኻን? ፅኑዕን ተባዕን ኩን። ኣነ ኣቦኻ ኣብ ዝኸድካዮ ዅሉ ምሳኻ እየ እሞ፥ ኣይትፍራሕ፤ ኣይትደንግፅ።”

ኢያሱ ንህዝቢ ኽሳገሩ ኣዳለዎም

¹⁰ሽዑ ኢያሱ ነሕሉቕ እቲ ህዝቢ ኸምዙይ ኢሉ ኣዘዞም፦

¹¹“ብማእኸል ሰፈር ሓሊፍኩም ነቲ ህዝቢ ኸምዙይ ኢልኩም ኣዝዝዎ፦ ‘ስንቂ ኣዳልዉ፤ ድሕሪ ሰለስተ መዓልቲ ነታ ኣቦኹም ክትወርስዋ ዝህበኩም ምድሪ ክትኣትዉ፥ ነዝ ዮርዳኖስ ክትሳገሩ ኢኹም እሞ።’”

¹²ንሮቤላውያንን ንጋዳውያንን ንፍርቂ ነገድ ምናሴን ከዓ ኢያሱ ኸምዙይ በሎም፦

¹³“ነቲ ባርያ ኣቦና ሙሴ ዝኣዘዘኩም ዘክሩ፦ ‘ኣቦኹም ዕረፍቲ ይህበኩም ኣሎ፥ እዛ ምድሪ እዚኣ ድማ ክህበኩም እዩ።’ ¹⁴ኣንስትኹምን ደቅኹምን ጥሪትኩምን ኣብታ ሙሴ ኣብ ምብራቕ ዮርዳኖስ ዝሃበኩም ምድሪ ይንበሩ፤ ንስኻትኩም ኵሎም ጀጋኑ ግና ተዓጢቕኩም ቀቅድሚ ኣሕዋትኩም ተሳጊርኩም ርድእዎም፥ ¹⁵ክሳዕ ኣቦና ከምቲ ንኣኻትኩም ዝሃበኩም፥ ነሕዋትኩምውን ዕረፍቲ ዝህቦም፥ ንሳቶምውን ነታ ዝህቦም ዘሎ ምድሪ ዝወርስዋ። ሽዑ ናብ ርስትኹም ተመሊስኩም ውረስዋ፤ ንሳ ኸዓ እታ ባርያ ኣቦና ሙሴ ኣብ ማዕዶ ዮርዳኖስ ብወገን ምብራቕ ፀሓይ ዝሃበኩም ምድሪ እያ።”

¹⁶ንኢያሱ ድማ ከምዙይ ኢሎም መለስዎ፦ “ነቲ ዝኣዘዝካና ዅሉ ክንገብሮ ኢና፤ ናብ ዝለኣኽካና ዅሉውን ክንከይድ ኢና። ¹⁷ንሙሴ ብዅሉ ነገር ከም ዝተኣዘዝናዮ፥ ንኣኻ ኸዓ ክንእዘዘካ ኢና። ጥራሕ ኣቦኻ፥ ከምቲ ምስ ሙሴ ዝነበረ፥ ምሳኻ ይኹን። ¹⁸ነቲ ትእዛዝካ ዝዓምፅ፥ ኣብ ዝኾነ እትእዝዞ ንቓላትካ ዘይእዘዝ ዝኾነ ሰብ፥ ይቀተል። ንስኻ ጥራሕ ፅኑዕን ተባዕን ኩን።”