UYoshuwa 1 FHB Father's Heart Bible™

1 ¹Kwathi emveni kokufa kukaMoses umkhonzi kaBawo wethu, uBawo wethu wathi kuYoshuwa unyana kaNun, umlungiseleli kaMoses:

²“UMoses umkhonzi wam ufile. Ngoku vuka, uwele iYordan, wena nabantu bonke aba, niye kwelo zwe ndibanika lona, oonyana bakaSirayeli. ³Yonke indawo onyathela ngonyawo lwakho kuyo ndikunike yona, njengoko ndathethayo kuMoses. ⁴Umda wakho woya uthabathele entlango nakule Lebhanon, ude uye emlanjeni omkhulu ongumEfrati, ilizwe lonke lamaHeti, ude uye kuLwandle Olukhulu ngasekutshoneni kwelanga. ⁵Akukho namnye oya kuma phambi kwakho bonke ubomi bakho. Njengoko ndandinoMoses, ndiya kuba nawe nawe; andiyi kukuyekela, andiyi kukushiya.

⁶“Yomelela ukhaliphe, kuba wena uya kubakhokela aba bantu ukuba balidle ilifa ilizwe endalifungela ooyise ukuba ndiya kubanika lona. ⁷Kodwa yomelela ukhaliphe kakhulu, ugcine ukuwenza wonke umthetho akuwiselayo uMoses umkhonzi wam. Uze ungatyeki kuwo usinge ekunene nasekhohlo, ukuze uphumelele apho uya khona. ⁸Le ncwadi yomthetho mayingasuki emlonyeni wakho; uze ucamngce ngayo imini nobusuku, ukuze ugcine ukwenza konke okubhaliweyo kuyo. Wandule ke uyiphumelelise indlela yakho, uphumelele. ⁹Andikuwiselanga na umthetho? Yomelela ukhaliphe. Uze ungoyiki, ungaqhiphuki mbilini, kuba mna, uBawo wakho, ndinawe apho uya khona.”

UYoshuwa Ukhuthaza Abantu Ukuba Bawele

¹⁰Waza uYoshuwa wabawisela umthetho ababhali babantu, esithi:

¹¹“Candani phakathi kweminquba, niwawisele umthetho abantu, nithi: ‘Lungisani umphako, kuba emveni kweentsuku ezintathu niya kuwela le Yordan, ningene nilime ilizwe aninika lona uBawo wenu ukuba nilime.’”

¹²Ke kumaRubhen, namaGadi, nesiqingatha sesizwe sakwaManase, uYoshuwa wathi:

¹³“Khumbulani oko akuwiselayo uMoses, umkhonzi kaBawo wethu, esithi: ‘UBawo wenu uyaniphumza, uya kuninika eli lizwe.’ ¹⁴Abafazi benu, nabantwana benu, nemfuyo yenu, bahlale ezweni aninika lona uMoses ngasempumalanga kweYordan; ke nina magorha onke anobukroti, niwele nixhobile phambi kwabazalwana benu, nibancede, ¹⁵ade uBawo wethu abaphumze abazalwana benu, njengani, balime nabo ilizwe abanika lona. Nibuyele ke ezweni lenu, nilidle, elo lizwe aninika lona uMoses, umkhonzi kaBawo wethu, phesheya kweYordan ngasempumalanga.”

¹⁶Baphendula uYoshuwa, bathi: “Konke osiwisele umthetho ngako siya kukwenza, naphi na apho usithume khona siya kuya. ¹⁷Njengoko samphulaphulayo uMoses ezintweni zonke, siya kukuphulaphula nawe. Makabe nawe kodwa uBawo wakho, njengoko wayenoMoses. ¹⁸Wonke othe wawuphikisa umlomo wakho, angawaphulaphuli amazwi akho, kuyo yonke into omwisela umthetho ngayo, makabulawe afe. Kodwa yomelela ukhaliphe.”