ኢያሱ 1

1 ¹የአባታችን አገልጋይ ሙሴ ከሞተ በኋላ፣ አባታችን የሙሴን ረዳት የነዌን ልጅ ኢያሱን እንዲህ አለው፤

²“አገልጋዬ ሙሴ ሞቷል። አሁን ተነሥተህ አንተና ይህ ሕዝብ ሁሉ ዮርዳኖስን ተሻገሩ፤ ለእነርሱ ለእስራኤል ልጆች ወደምሰጣቸው ምድር ግቡ። ³ሙሴን ተስፋ እንደ ሰጠሁት፣ እግርህ የሚረግጠውን ስፍራ ሁሉ ለአንተ ሰጥቻለሁ። ⁴ድንበርህ ከምድረ በዳውና ከዚህ ሊባኖስ ጀምሮ እስከ ታላቁ ወንዝ እስከ ኤፍራጥስ፣ የኬጢያውያንም ምድር ሁሉ፣ እስከ ታላቁ ባሕር እስከ ፀሓይ መግቢያ ድረስ ይደርሳል። ⁵በሕይወትህ ዘመን ሁሉ ማንም ሊቆምብህ አይችልም። ከሙሴ ጋር እንደ ነበርሁ፣ ከአንተም ጋር እሆናለሁ፤ አልተውህም፤ አልጥልህም።

⁶“በርታ፤ ጠንካራም ሁን፤ ለአባቶቻቸው ልሰጣቸው የማልሁላትን ምድር እንዲወርሱ ይህን ሕዝብ ትመራቸዋለህና። ⁷ብቻ በርታ፤ እጅግም ጠንካራ ሁን፤ አገልጋዬ ሙሴ ያዘዘህን ሕግ ሁሉ ለመጠበቅ ተጠንቀቅ። በሄድህበት ሁሉ እንድትከናወንልህ፣ ከእርሱ ወደ ቀኝ ወይም ወደ ግራ ፈቀቅ አትበል። ⁸ይህ የሕግ መጽሐፍ ከአፍህ ከቶ አይለይ፤ በውስጡ የተጻፈውን ሁሉ በጥንቃቄ ታደርግ ዘንድ፣ ቀንና ሌሊት አሰላስለው። ያን ጊዜ መንገድህ ይቀናል፤ ይከናወንልሃል። ⁹አላዘዝሁህምን? በርታ፤ ጠንካራም ሁን። አትፍራ፤ አትደንግጥ፤ እኔ አባትህ በሄድህበት ሁሉ ከአንተ ጋር ነኝና።”

ኢያሱ ሕዝቡን ለመሻገር አነሣሣ

¹⁰ከዚያም ኢያሱ የሕዝቡን አለቆች እንዲህ አዘዛቸው፤

¹¹“በሰፈሩ ውስጥ ዙሩና ሕዝቡን እንዲህ እዘዙ፤ ‘ስንቅ አዘጋጁ፤ አባታችሁ ትወርሷት ዘንድ የሚሰጣችሁን ምድር ገብታችሁ ለመያዝ፣ ከሦስት ቀን በኋላ ዮርዳኖስን ትሻገራላችሁና።’”

¹²ኢያሱም ለሮቤላውያን፣ ለጋዳውያንና ለምናሴ ነገድ እኩሌታ እንዲህ አለ፤

¹³“የአባታችን አገልጋይ ሙሴ ያዘዛችሁን ቃል አስታውሱ፤ ‘አባታችሁ ዕረፍት ይሰጣችኋል፤ ይህችንም ምድር ይሰጣችኋል።’ ¹⁴ሚስቶቻችሁ፣ ልጆቻችሁና ከብቶቻችሁ ሙሴ በዮርዳኖስ ምሥራቅ በሰጣችሁ ምድር ይቅሩ፤ እናንተ ተዋጊዎች ሁሉ ግን ወንድሞቻችሁን ልትረዱ ከፊታቸው ታጥቃችሁ ተሻገሩ፤ ¹⁵አባታችን ለእናንተ እንደ ሰጣችሁ ለወንድሞቻችሁም ዕረፍት እስኪሰጥ፣ እነርሱም እርሱ የሚሰጣቸውን ምድር እስኪወርሱ ድረስ፣ ከዚያም ወደ ገዛ ምድራችሁ ተመልሳችሁ ውረሷት፤ ይህችም የአባታችን አገልጋይ ሙሴ በዮርዳኖስ ማዶ በፀሓይ መውጫ በኩል የሰጣችሁ ምድር ናት።”

¹⁶እነርሱም ኢያሱን መልሰው እንዲህ አሉት፤ “ያዘዝኸንን ሁሉ እናደርጋለን፤ ወደ ላክኸንም ስፍራ ሁሉ እንሄዳለን። ¹⁷በሁሉ ነገር ሙሴን እንደ ታዘዝነው፣ አንተንም እንታዘዝሃለን። ብቻ አባትህ ከሙሴ ጋር እንደ ነበረ፣ ከአንተም ጋር ይሁን። ¹⁸ትእዛዝህን የሚቃወም፣ የምታዝዘውንም ሁሉ ቃልህን የማይታዘዝ ማንም ሰው ይገደል። አንተ ብቻ በርታ፤ ጠንካራም ሁን።”