Ithumwui Avāna Joshuali otpam chisin
Joshuawui ngayākhuili Kasangkhavai Ram kahapkhui kala kapamkhavai. Rāng kharāwui sharem kaphungda, ithumwui Avāna Awui mi hi athumwui mangla kakhamashung eina maning, Awui ngalāli kaphungkhui.
1 1Ithumwui Avāwui rao Moses thikahaiwui thili, ithumwui Avāna Moseswui otram ngatha̱me Nunwui naomayara Joshuali hānga:
2"Iwui rao Moses thihaira. Ara na kala hi mibing saikora ngakarthuida, ina Israelwui naomayarabingli mikhavai ngalei chili zangkhavai Jordan hi kānlu. 3Nana phei naikasang pam kachiva̱ ina Mosesli ngashitmi kahai athishurda nali mihaira. 4Nawui leiret lamhāng kala hi Lebanon eina thuida Euphrates kong khareili, Hitnaobingwui ngalei saikora, kala zingtunshong shamadru khareili vāshungra. 5Nawui mirin peida khipākha nawui mangāli manganingrarmara. Ina Mosesli ngasoda leilakha thāda, ina nali ngasomira; ina nali masākhami maleimara lah horkahaila masālakmara.
6"Pingmeida malung zangmeilu, kaja ina athumwui avāva̱ ngarāli mira da ngashit kahai ngalei chi nana mibing hili thanvāda samphang ngasakki kajina. 7Kha pingmeida hakva malung zangmeida, iwui rao Mosesna nali kaso kahai ain saikora chi ning ngasharda mayonlu. Chiwui eina yāshongla uishongla makārsangphaphālu, chieina na vāki pam kachiva̱li na ungshungra. 8Hi ainwui lairik nawui khamor eina makhavaimara; chili kapihaida khalei saikora chi ning ngasharda mayon khavai, chi ngashun kala ngayā phaninglu. Chithakha nawui shongfa mataisangra kala na ungshungra. 9Ina nali makaso kahaila? Pingmeida malung zangmeilu. Mangacheealu lah ningla masuitāhaialu, kaja nawui Avā ina na vāki pam kachiva̱li nali ngasomira."
Joshuana mibingli kānkhavai ngararmi
10Chiwui thili Joshuana mibingwui otva̱bingli hāngchithei:
11"Rāmrahlungli zangvāda mibingli hāngchitheilu: 'Kashakazā ngarānlu, kaja kakathumathang nathumna, nathumwui Avāna nathumli shimlui sākhavai mikahai ngalei chi vāzangda khuikhavai, Jordan hi kānkāra.'"
12Reuben, Gad kala Manasseh shang tangkhaili Joshuana hānga:
13"Ithumwui Avāwui rao Mosesna nathumli kaso kahai tui chi phaningunglu: 'Nathumwui Avāna nathumli ngasāmkhui ngasakda hi ngalei chi mira.' 14Nathumwui preiva̱, naoshinao kala sha̱kei chi Jordan kānda zingshoshong Mosesna nathumli mikahai ngaleili pamsāra; kha nathum raikapinga saikora nathumwui achinā ngarāwui mangāli raisāri shakta kānda athumli ngachonra, 15ithumwui Avāna nathumli sākahai thāda nathumwui achināli ngasāmkhui ngasakda, athumnala ana athumli mikahai ngalei chi khuiranglakha eina tangda chithāda sālu. Chithakha ithumwui Avāwui rao Mosesna Jordan kānda zingshoshong nathumli mikahai, nathumwui kachichāwui ngalei chili latungda khuilu."
16Athumna Joshuali ngahānkāda hānga, "Nana ithumli kaso kahai saikora chi ithumna sāra, kala nana ithumli chihovā pam kachiva̱li ithum vāra. 17Ithumna atam kachida Mosesli kahāng nganāsang thāda, ithumna nawui kahāng nganāsangra. Kha nawui Avāna Mosesli ngasoda leilakha thāda nalila ngasomiranu. 18Kachikathāna nawui ningkhamili ngakaishida nana kaso kahai saikorali nawui tuila makhuisangakha, ali shaothatphalungra. Kha pingmeida malung zangmeilu."
