Amar Pitri pora Joshua ke kaam di dise
Joshua laga tolot te Kosom Diya Desh ke jiti kene ta te bosti kora. Ekta bhoi lagi jaise kaam shuru hoi thaka homoi te, amar Pitri Tai laga manu khan ke taikhan nijor laga sahas te nohoi, kintu Tai laga usorte thaka te dhori rakhe.
1 1Amar Pitri laga noukar Moses mori juwa pichete, amar Pitri pora Nun laga putro Joshua, Moses laga sahayak ke koise,
2“Moi laga noukar Moses mori jaise. Etiya uthibi, tumi aru eitu sob manuh khan, Jordan nodi paar hobi, aru Moi Israel laga bacha khan ke di thaka desh te ghusi jabi. 3Tumi laga theng ju jagate rakhibo, hei jaga sob Moi tumikhan ke di dise, Moses ke Moi koi diya nisina. 4Tumi laga desh tu basa jaga pora aru eitu Lebanon pora, dangor nodi Euphrates tak—Hittite manuh khan laga sob desh—aru beli bohi juwa phale Dangor Samudra tak hobo. 5Tumi laga pura jivon te kun bhi tumi laga bipokhe khara hobo naparibo. Moi Moses logote thaka nisina, Moi tumi logote thakibo; Moi tumi ke chari nadibo aru pelai nadibo.
6“Takot koribi aru mon dangor koribi, kilemane Moi taikhan laga baba khan ke dibole kosom kha desh tu, tumi eitu manuh khan ke uttoradhikar pabole loi jabo. 7Khali takot koribi aru bisi mon dangor koribi, Moi laga noukar Moses pora tumi ke hukum diya sob niyom bhal pora manibi. Eitu pora dyna nahole baya phale namuribi, titia tumi ju jagate jabo, ta te safol hobo. 8Eitu Niyom laga Kitab tumi laga mukh pora kitia bhi najabo dibi; din-raat eitu uporte chinta koribi, eitu te likha sob bhal pora koribole. Titia tumi laga rasta safol hobo aru tumi bhi safol hobo. 9Moi tumi ke hukum diya nai naki? Takot koribi aru mon dangor koribi. Bhoi nakoribi aru mon chutu nakoribi, kilemane Moi, tumi laga Pitri, tumi ju jagate jabo, ta te tumi logote thakibo.”
Joshua pora manuh khan ke paar hobole mati loise
10Titia Joshua pora manuh khan laga adhikari khan ke hukum dise,
11“Chaoni majote jabi aru manuh khan ke hukum dibi, ‘Kha-luwa taiyar koribi, kilemane tin din pichete tumikhan Jordan nodi paar hobo, aru tumi laga Pitri pora tumikhan ke adhikar koribole di thaka desh te ghusi kene eitu lobole jabo.’”
12Reuben bongso, Gad bongso, aru Manasseh laga adha bongso ke Joshua pora koise,
13“Amar Pitri laga noukar Moses pora tumikhan ke hukum diya kotha tu monte rakhibi, ‘Tumi laga Pitri pora tumikhan ke aram di ase aru eitu desh bhi tumikhan ke dibo.’ 14Tumikhan laga maiki khan, bacha khan, aru goru-chagol khan, Jordan nodi laga purab phale Moses pora tumikhan ke diya desh te thakibo; kintu tumikhan laga sob sipahi khan hathiar loi kene, tumikhan laga bhai khan ke modot koribole, taikhan laga age te paar hobi, 15jitia tak amar Pitri pora tumikhan ke diya nisina tumikhan laga bhai khan ke bhi aram nadibo, aru taikhan bhi Tar pora di thaka desh nalobo. Titia tumikhan nijor desh te wapas ahi kene eitu lobi—Jordan nodi laga paar te, beli ulah juwa phale, amar Pitri laga noukar Moses pora tumikhan ke diya desh tu.”
16Taikhan pora Joshua ke jawab dise, “Apuni amikhan ke hukum diya sob kaam amikhan koribo, aru apuni amikhan ke ju jagate pathabo, ta te amikhan jabo. 17Amikhan Moses laga sob kotha mana nisina, amikhan apuni laga kotha bhi manibo. Khali, Moses logote thaka nisina, apuni laga Pitri apuni logote thaki thakibi. 18Kun manuh apuni laga hukum laga bipokhe uthibo aru apuni laga kotha namanibo, apuni ki hukum dibo, taike morai dibo lage. Khali takot koribi aru mon dangor koribi.”