Josue 1

1 ¹Human mamatay si Moises nga alagad sa atong Amahan, misulti ang atong Amahan kang Josue nga anak ni Nun, nga katabang ni Moises:

²“Namatay na si Moises nga akong alagad. Karon, tindog, tabok sa Jordan, ikaw ug kining tanang katawhan, ngadto sa yuta nga akong ihatag kanila, sa mga anak sa Israel. ³Ang matag dapit nga tumban sa lapalapa sa inyong mga tiil gihatag ko na kaninyo, sama sa akong gisaad kang Moises. ⁴Ang inyong teritoryo molugway gikan sa kamingawan ug niining Lebanon hangtod sa dakong suba sa Eufrates—ang tibuok yuta sa mga Hitihanon—ug ngadto sa Dakong Dagat dapit sa salopan sa adlaw. ⁵Walay makasukol kanimo sa tibuok mong kinabuhi. Maingon nga nag-uban ako kang Moises, magauban ako kanimo; dili ko ikaw biyaan ni pasagdan.

⁶“Pagmakusganon ug pagmaisogon, kay ikaw ang mangulo niini nga katawhan sa pagpanunod sa yuta nga akong gipanumpaan sa ilang mga katigulangan nga akong ihatag kanila. ⁷Pagmakusganon lamang ug pagmaisogon gayod, nga mabinantayon sa pagtuman sa tanang balaod nga gisugo kanimo ni Moises nga akong alagad. Ayaw pagtipas gikan niini sa tuo o sa wala, aron magmauswagon ka bisan asa ka moadto. ⁸Ayaw gayod tugoti nga mobiya kining Basahon sa Balaod sa imong mga ngabil; palandonga kini sa adlaw ug sa gabii, aron mabinantayon mong buhaton ang tanang nahisulat niini. Unya mouswag ang imong dalan ug magmalampuson ka. ⁹Dili ba gisugo ko man ikaw? Pagmakusganon ug pagmaisogon. Ayaw kahadlok ni kaluya, kay ako, ang imong Amahan, nag-uban kanimo bisan asa ka moadto.”

Gidasig ni Josue ang Katawhan sa Pagtabok

¹⁰Unya misugo si Josue sa mga pangulo sa katawhan:

¹¹“Lakaw ngadto sa tibuok kampo ug sugoa ang katawhan: ‘Pangandam ug mga balon, kay tulo ka adlaw gikan karon motabok kamo sa Jordan aron mosulod ug manag-iya sa yuta nga gihatag kaninyo sa inyong Amahan aron panag-iyahon.’”

¹²Ngadto sa mga Rubenhon, sa mga Gadhon, ug sa katunga sa tribo ni Manases, miingon si Josue:

¹³“Hinumdomi ninyo ang gisugo kaninyo ni Moises, nga alagad sa atong Amahan: ‘Ang inyong Amahan naghatag kaninyo ug pahulay ug magahatag kaninyo niini nga yuta.’ ¹⁴Ang inyong mga asawa, mga anak, ug mga kahayopan magpabilin sa yuta nga gihatag kaninyo ni Moises sa sidlakan sa Jordan; apan kamong tanan nga mga manggugubat motabok nga sangkap sa hinagiban una sa inyong mga igsoon aron sa pagtabang kanila, ¹⁵hangtod nga ang atong Amahan mohatag ug pahulay sa inyong mga igsoon, sama sa iyang gihatag kaninyo, ug maangkon usab nila ang yuta nga iyang gihatag kanila. Unya mobalik kamo sa inyong kaugalingong yuta ug panag-iyahon kini—ang yuta nga gihatag kaninyo ni Moises, nga alagad sa atong Amahan, tabok sa Jordan dapit sa subangan sa adlaw.”

¹⁶Mitubag sila kang Josue, “Ang tanan nga imong gisugo kanamo among buhaton, ug bisan asa mo kami ipadala, moadto kami. ¹⁷Maingon nga mituman kami kang Moises sa tanang butang, motuman usab kami kanimo. Hinaot lamang nga ang imong Amahan mag-uban kanimo, sama sa iyang pag-uban kang Moises. ¹⁸Si bisan kinsa nga mosukol sa imong sugo ug dili motuman sa imong mga pulong, bisan unsa ang imong isugo, pagapatyon. Pagmakusganon lamang ug pagmaisogon.”