ଯିହୋଶୂୟ 1 FHB Father's Heart Bible™

1 ¹ଆମ୍ଭମାନଙ୍କ ପିତାଙ୍କ ସେବକ ମୋଶାଙ୍କ ମୃତ୍ୟୁ ପରେ ଆମ୍ଭମାନଙ୍କ ପିତା ମୋଶାଙ୍କ ସେବକ ନୂନର ପୁତ୍ର ଯିହୋଶୂୟଙ୍କୁ କହିଲେ,

²“ଆମ୍ଭର ସେବକ ମୋଶା ମୃତ ହୋଇଅଛି। ଏବେ ଉଠ, ତୁମ୍ଭେ ଓ ଏହିସବୁ ଲୋକ ଯର୍ଦ୍ଦନ ପାର ହୋଇ ଆମ୍ଭେ ଇସ୍ରାଏଲ-ସନ୍ତାନମାନଙ୍କୁ ଯେଉଁ ଦେଶ ଦେଉଅଛୁ, ସେଠାକୁ ଯାଅ। ³ତୁମ୍ଭେ ଯେଉଁ ଯେଉଁ ସ୍ଥାନରେ ପାଦ ରଖିବ, ସେହି ପ୍ରତ୍ୟେକ ସ୍ଥାନ ଆମ୍ଭେ ତୁମ୍ଭକୁ ଦେଇଅଛୁ, ଯେପରି ଆମ୍ଭେ ମୋଶାଙ୍କ ନିକଟରେ ପ୍ରତିଜ୍ଞା କରିଥିଲୁ। ⁴ପ୍ରାନ୍ତରଠାରୁ ଓ ଏହି ଲିବାନୋନଠାରୁ ମହାନଦୀ ଫରାତ ପର୍ଯ୍ୟନ୍ତ—ହିତ୍ତୀୟମାନଙ୍କର ସମୁଦାୟ ଦେଶ—ପୁଣି ସୂର୍ଯ୍ୟାସ୍ତ ଆଡ଼େ ମହାସମୁଦ୍ର ପର୍ଯ୍ୟନ୍ତ ତୁମ୍ଭର ସୀମା ହେବ। ⁵ତୁମ୍ଭ ଜୀବନ ଯାଏ କୌଣସି ଲୋକ ତୁମ୍ଭ ସମ୍ମୁଖରେ ଠିଆ ହୋଇ ପାରିବ ନାହିଁ। ଆମ୍ଭେ ଯେପରି ମୋଶାଙ୍କ ସଙ୍ଗରେ ଥିଲୁ, ସେପରି ତୁମ୍ଭ ସଙ୍ଗରେ ରହିବୁ; ଆମ୍ଭେ ତୁମ୍ଭକୁ ଛାଡ଼ିବୁ ନାହିଁ କି ତ୍ୟାଗ କରିବୁ ନାହିଁ।

⁶“ବଳବାନ ଓ ସାହସିକ ହୁଅ, କାରଣ ଆମ୍ଭେ ଏହି ଲୋକମାନଙ୍କ ପିତୃପୁରୁଷଙ୍କ ନିକଟରେ ଯେଉଁ ଦେଶ ଦେବା ନିମନ୍ତେ ଶପଥ କରିଥିଲୁ, ତୁମ୍ଭେ ତାହା ଅଧିକାର କରିବା ନିମନ୍ତେ ଏହି ଲୋକମାନଙ୍କୁ କଢ଼ାଇ ନେବ। ⁷କେବଳ ବଳବାନ ଓ ଅତ୍ୟନ୍ତ ସାହସିକ ହୁଅ, ପୁଣି ଆମ୍ଭର ସେବକ ମୋଶା ତୁମ୍ଭକୁ ଯେଉଁ ସମୁଦାୟ ବ୍ୟବସ୍ଥା ଆଜ୍ଞା ଦେଇଅଛି, ତାହା ପାଳନ କରିବା ନିମନ୍ତେ ଯତ୍ନଶୀଳ ହୁଅ। ତୁମ୍ଭେ ଯେଉଁଆଡ଼େ ଯାଅ, ସେଠାରେ ଯେପରି କୃତକାର୍ଯ୍ୟ ହୁଅ, ଏଥିପାଇଁ ତାହାଠାରୁ ଦକ୍ଷିଣ କି ବାମକୁ ଫେରିବ ନାହିଁ। ⁸ଏହି ବ୍ୟବସ୍ଥା-ପୁସ୍ତକ ତୁମ୍ଭ ମୁଖରୁ ବିଚଳିତ ନ ହେଉ; ବରଞ୍ଚ ତହିଁରେ ଲିଖିତ ସମସ୍ତ ବିଷୟ ଯତ୍ନପୂର୍ବକ ପାଳନ କରିବା ନିମନ୍ତେ ଦିବାରାତ୍ର ତାହା ଧ୍ୟାନ କର। ତେବେ ତୁମ୍ଭର ପଥ ସମୃଦ୍ଧ ହେବ ଓ ତୁମ୍ଭେ କୃତକାର୍ଯ୍ୟ ହେବ। ⁹ଆମ୍ଭେ କʼଣ ତୁମ୍ଭକୁ ଆଜ୍ଞା ଦେଇ ନାହୁଁ? ବଳବାନ ଓ ସାହସିକ ହୁଅ। ଭୟ କର ନାହିଁ କି ନିରାଶ ହୁଅ ନାହିଁ, କାରଣ ତୁମ୍ଭେ ଯେଉଁଆଡ଼େ ଯାଅ, ସେଠାରେ ଆମ୍ଭେ, ତୁମ୍ଭ ପିତା, ତୁମ୍ଭ ସଙ୍ଗରେ ଅଛୁ।”

ଯିହୋଶୂୟ ଲୋକମାନଙ୍କୁ ପାର ହେବା ନିମନ୍ତେ ଏକତ୍ର କରନ୍ତି

¹⁰ତହୁଁ ଯିହୋଶୂୟ ଲୋକମାନଙ୍କର ଅଧ୍ୟକ୍ଷମାନଙ୍କୁ ଆଜ୍ଞା ଦେଲେ,

¹¹“ଛାଉଣି ମଧ୍ୟଦେଇ ଯାଇ ଲୋକମାନଙ୍କୁ ଆଜ୍ଞା ଦିଅ, ‘ତୁମ୍ଭେମାନେ ଆପଣାମାନଙ୍କ ପାଇଁ ଖାଦ୍ୟସାମଗ୍ରୀ ପ୍ରସ୍ତୁତ କର, କାରଣ ତୁମ୍ଭମାନଙ୍କ ପିତା ତୁମ୍ଭମାନଙ୍କୁ ଅଧିକାର କରିବା ନିମନ୍ତେ ଯେଉଁ ଦେଶ ଦେଉଅଛନ୍ତି, ତାହା ପାଇବାକୁ ପ୍ରବେଶ କରିବା ନିମନ୍ତେ ତିନି ଦିନ ମଧ୍ୟରେ ତୁମ୍ଭେମାନେ ଏହି ଯର୍ଦ୍ଦନ ପାର ହେବ।’”

¹²ପୁଣି ଯିହୋଶୂୟ ରୂବେନୀୟ, ଗାଦୀୟ ଓ ମନଃଶିର ଅର୍ଦ୍ଧ ବଂଶକୁ କହିଲେ,

¹³“ଆମ୍ଭମାନଙ୍କ ପିତାଙ୍କ ସେବକ ମୋଶା ତୁମ୍ଭମାନଙ୍କୁ ଯାହା ଆଜ୍ଞା ଦେଇଥିଲେ, ତାହା ସ୍ମରଣ କର, ‘ତୁମ୍ଭମାନଙ୍କ ପିତା ତୁମ୍ଭମାନଙ୍କୁ ବିଶ୍ରାମ ଦେଉଅଛନ୍ତି ଓ ଏହି ଦେଶ ଦେବେ।’ ¹⁴ମୋଶା ତୁମ୍ଭମାନଙ୍କୁ ଯର୍ଦ୍ଦନର ପୂର୍ବ ପାରିରେ ଯେଉଁ ଦେଶ ଦେଇଥିଲେ, ସେଠାରେ ତୁମ୍ଭମାନଙ୍କ ସ୍ତ୍ରୀ, ବାଳକ ଓ ପଶୁପଲ ରହିବେ; ମାତ୍ର ତୁମ୍ଭମାନଙ୍କ ଯୋଦ୍ଧାସମସ୍ତେ ସସଜ୍ଜ ହୋଇ ଆପଣା ଭ୍ରାତୃଗଣର ଆଗେ ଆଗେ ପାର ହୋଇ ସେମାନଙ୍କୁ ସାହାଯ୍ୟ କର, ¹⁵ଆମ୍ଭମାନଙ୍କ ପିତା ଯେପରି ତୁମ୍ଭମାନଙ୍କୁ ବିଶ୍ରାମ ଦେଇଅଛନ୍ତି, ସେପରି ଯେଯାଏ ସେ ତୁମ୍ଭମାନଙ୍କ ଭ୍ରାତୃଗଣକୁ ବିଶ୍ରାମ ନ ଦିଅନ୍ତି ଓ ସେମାନେ ମଧ୍ୟ ସେ ଦେଉଥିବା ଦେଶ ଅଧିକାର ନ କରନ୍ତି, ସେଯାଏ ସାହାଯ୍ୟ କର। ତହିଁ ଉତ୍ତାରେ ତୁମ୍ଭେମାନେ ଆପଣାମାନଙ୍କ ଅଧିକୃତ ଦେଶକୁ ଫେରିଯାଇ ତାହା ଭୋଗ କର—ଯର୍ଦ୍ଦନର ସୂର୍ଯ୍ୟୋଦୟ ଆଡ଼େ ଥିବା ଯେଉଁ ଦେଶ ଆମ୍ଭମାନଙ୍କ ପିତାଙ୍କ ସେବକ ମୋଶା ତୁମ୍ଭମାନଙ୍କୁ ଦେଇଅଛନ୍ତି।”

¹⁶ତହିଁରେ ସେମାନେ ଯିହୋଶୂୟଙ୍କୁ ଉତ୍ତର ଦେଲେ, “ଆପଣ ଆମ୍ଭମାନଙ୍କୁ ଯାହା ଯାହା ଆଜ୍ଞା ଦେଇଅଛନ୍ତି, ତାହାସବୁ ଆମ୍ଭେମାନେ କରିବୁ, ପୁଣି ଆପଣ ଆମ୍ଭମାନଙ୍କୁ ଯେଉଁଆଡ଼େ ପ୍ରେରଣ କରିବେ, ସେଠାକୁ ଆମ୍ଭେମାନେ ଯିବୁ। ¹⁷ଆମ୍ଭେମାନେ ସବୁ ବିଷୟରେ ଯେପରି ମୋଶାଙ୍କ ଆଜ୍ଞା ମାନୁଥିଲୁ, ସେପରି ଆପଣଙ୍କ ଆଜ୍ଞା ମାନିବୁ। କେବଳ ଆପଣଙ୍କ ପିତା ଯେପରି ମୋଶାଙ୍କ ସଙ୍ଗରେ ଥିଲେ, ସେପରି ଆପଣଙ୍କ ସଙ୍ଗରେ ଥାଉନ୍ତୁ। ¹⁸ଯେକେହି ଆପଣଙ୍କ ଆଜ୍ଞାର ବିରୁଦ୍ଧାଚରଣ କରିବ ଓ ଆପଣ ଯାହା ଯାହା ଆଜ୍ଞା ଦେବେ, ଆପଣଙ୍କ ସେହି ବାକ୍ୟ ନ ମାନିବ, ସେ ନିହତ ହେବ। କେବଳ ଆପଣ ବଳବାନ ଓ ସାହସିକ ହୁଅନ୍ତୁ।”