اسان جو پيءُ يشوع کي ذميواري سونپي ٿو
يشوع جي اڳواڻيءَ ۾ واعدي واري ملڪ جي فتح ۽ آبادي. جيئن هڪ ڏکيو ڪم شروع ٿئي ٿو، اسان جو پيءُ پنهنجي قوم کي سندن پنهنجي همت ۾ نه، پر پنهنجي حضوريءَ ۾ مضبوط ڪري ٿو.
اسان جو پيءُ آيتن ۾ ڳالهائي ٿو 2–9
1 1اسان جي پيءُ جي ٻانهي موسيٰ جي وفات کان پوءِ، اسان جي پيءُ موسيٰ جي مددگار، نون جي پٽ يشوع کي چيو تہ
2”منهنجو ٻانهو موسيٰ مري ويو آهي. هاڻي اُٿ، تون ۽ هي سڀ ماڻهو يردن پار ڪري انهيءَ ملڪ ڏانهن هلو جيڪو آئون کين، يعني بني اسرائيل کي ڏيان ٿو. 3جنهن بہ جاءِ تي تنهنجا پير پوندا، اها سڀ مون تو کي ڏني آهي، جهڙيءَ طرح مون موسيٰ سان واعدو ڪيو هو. 4تنهنجي سرحد بيابان ۽ هن لبنان کان وٺي وڏي نديءَ فرات تائين، سڄي حتين جي ملڪ تائين، ۽ سج لهڻ جي طرف وڏي سمنڊ تائين هوندي. 5سڄي حياتيءَ ۾ ڪوبہ تنهنجي مقابلي ۾ نہ بيهي سگهندو. جيئن آئون موسيٰ سان گڏ هوس، تيئن تو سان گڏ هوندس؛ آئون تو کي نہ ڇڏيندس ۽ نہ وساريندس.
6”مضبوط ۽ همٿ وارو ٿي، ڇاڪاڻ تہ تون انهن ماڻهن کي انهيءَ ملڪ جو وارث بڻائيندين جيڪو مون سندن ابن ڏاڏن سان قسم کڻي واعدو ڪيو هو تہ کين ڏيندس. 7رڳو مضبوط ۽ تمام همٿ وارو ٿي، ۽ انهيءَ سڄي شريعت تي عمل ڪرڻ ۾ هوشيار رهج جنهن جو حڪم منهنجي ٻانهي موسيٰ تو کي ڏنو هو. انهيءَ کان ساڄي يا کاٻي پاسي نہ ڦرج، جيئن جتي بہ وڃين اتي ڪامياب ٿين. 8شريعت جو هي ڪتاب ڪڏهن بہ تنهنجي چپن کان جدا نہ ٿئي؛ ڏينهن رات انهيءَ تي ڌيان ڏج، جيئن جيڪي ڪجهه انهيءَ ۾ لکيل آهي سو سڀ احتياط سان ڪرين. پوءِ تنهنجي راهہ ڀلي ٿيندي ۽ تون ڪامياب ٿيندين. 9ڇا مون تو کي حڪم نہ ڏنو آهي؟ مضبوط ۽ همٿ وارو ٿي. نہ ڊڄ ۽ نہ مايوس ٿي، ڇاڪاڻ تہ جتي بہ وڃين، آئون، تنهنجو پيءُ، تو سان گڏ آهيان.“
يشوع ماڻهن کي پار ٿيڻ لاءِ همٿائي ٿو
10پوءِ يشوع ماڻهن جي سردارن کي حڪم ڏنو تہ
11”ڇانوڻيءَ ۾ گھمي ماڻهن کي حڪم ڏيو تہ ’کاڌو تيار ڪريو، ڇاڪاڻ تہ ٽن ڏينهن ۾ اوهان يردن پار ڪري انهيءَ ملڪ ۾ داخل ٿي ان تي قبضو ڪندا جيڪو اوهان جو پيءُ اوهان کي ملڪيت ڪري ڏئي ٿو.‘“
12روبن جي قبيلي، جاد جي قبيلي ۽ منسي جي اڌ قبيلي کي يشوع چيو تہ
13”جيڪو حڪم اسان جي پيءُ جي ٻانهي موسيٰ اوهان کي ڏنو هو سو ياد ڪريو تہ ’اوهان جو پيءُ اوهان کي آرام ڏئي ٿو ۽ هي ملڪ اوهان کي ڏيندو.‘ 14اوهان جون زالون، ٻار ۽ ڍور ڍڳا انهيءَ ملڪ ۾ رهندا جيڪو موسيٰ اوهان کي يردن جي اوڀر پاسي ڏنو آهي؛ پر اوهان سڀ ويڙهاڪ هٿيارن سان پنهنجن ڀائرن کان اڳ پار ڪري وڃو ۽ سندن مدد ڪريو، 15جيستائين اسان جو پيءُ اوهان جي ڀائرن کي آرام نہ ڏئي، جيئن اوهان کي ڏنائين، ۽ اهي بہ انهيءَ ملڪ تي قبضو نہ ڪن جيڪو هو کين ڏئي ٿو. تنهن کان پوءِ اوهان پنهنجي ملڪ ڏانهن موٽي اچي ان تي قبضو ڪجو، يعني انهيءَ ملڪ تي جيڪو اسان جي پيءُ جي ٻانهي موسيٰ اوهان کي يردن جي هن پار، اوڀر طرف ڏنو آهي.“
16هنن يشوع کي وراڻيو تہ ”جيڪي حڪم تو اسان کي ڏنا آهن سي سڀ ڪنداسين، ۽ جتي بہ اسان کي موڪليندين اتي هلنداسين. 17جيئن اسان هر ڳالهہ ۾ موسيٰ جي فرمانبرداري ڪئي، تيئن تنهنجي بہ ڪنداسين. رڳو تنهنجو پيءُ تو سان گڏ هجي، جيئن موسيٰ سان گڏ هو. 18جيڪو بہ تنهنجي حڪم کان سرڪشي ڪري ۽ تنهنجي ڳالهين جي، جيڪي بہ تون فرمائين، نافرماني ڪري، سو ضرور قتل ڪيو وڃي. رڳو مضبوط ۽ همٿ وارو ٿي.“
